Deste xeito, as/os usuarias/os confinadas/os non serán sancionados por non poder entregar os seus préstamos en prazo.
venres, 30 de outubro de 2020
Adiamento dos préstamos por mor do confinamento perimetral
sábado, 24 de outubro de 2020
Música Miúda para celebrar o Día das bibliotecas en Brión
Para conmemorar esta efeméride tan especial, a biblioteca municipal celebrou un concerto a cargo dos amigos de Música Miúda. Un recital de aproximadamente 50 min. cheo de boa música e cancións para toda a familia: “Bemol Pequeno”, “Vén bailar e cantar coa meiga Xela”, ”O dinosauro Pepón”, etc.
O concerto tivo lugar na Sala Municipal de Exposicións, espazo onde a biblioteca organiza habitualmente este tipo de actividades. Comezou pasadas as 12:00 h. e reuniu un total de 17 persoas, entre adultos e crianzas, que previamente se inscribiron para asistir como público.
No recital tomáronse as habituais medidas de seguridade e hixiene necesarias para garantir que todas/os gocemos da cultura con seguridade: distancia física entre persoas, hixiene de mans, uso de máscara facial, etc. Porque #aculturasegue e #aculturaesegura.
O espectáculo contou co patrocinio do programa “Ler conta moito” da Rede de Bibliotecas de Galicia.
Imaxes da actividade:
sábado, 17 de outubro de 2020
Atopamos en Brión "O tesouro da avoa" da man de Os Quinquilláns
Os actores Lucho Penabade e Tero Rodríguez foron os protagonistas dunha función para toda a familia que nos narrou a historia de Jacinta, unha muller intelixente e feliz que traballaba de mestra nunha escola na que se aprendía xogando e se xogaba aprendendo. Tiña canto quería; casa, familia, amigas, traballo… Pero veu a guerra e quitáronllo case todo. Tivo que fuxir para moi lonxe, mais conseguiu levar escondido un tesouro segredo que moitos anos despois entregou ás súas netas.
Aínda que a inscrición previa na actividade foi maior, ao evento acudiron finalmente un total de 8 persoas, entre crianzas e adultos acompañante. Comezou pasadas as 12:00 h. e prolongouse aproximadamente durante 50 min.
A sesión contou co patrocinio do programa “Ler conta moito” da Rede de Bibliotecas de Galicia.
Imaxes da actuación:
Imaxes da actuación:
Concerto de Música Miúda para conmemorar o Día das bibliotecas [Actividade de balde-Inscrición previa]
Para conmemorar esta data tan especial, a biblioteca municipal convídate a un concerto a cargo dos amigos de Música Miúda. O recital comezará ás 12:00 h. Durante aproximadamente 50 min, coñeceremos as cancións de “Bemol Pequeno”, “Vén bailar e cantar coa meiga Xela”, ”O dinosauro Pepón”, etc. Un espectáculo de música para toda a familia!
En principio, celebraranse na Sala Municipal de Exposicións (Casa da Cultura). Se o tempo o permitise, trasladaranse ao exterior da Carballeira de Santa Minia. A entrada é de balde, con aforo limitado e inscrición previa no tfno.: 981 50 99 69 ou a través dos enderezos de correo electrónico da biblioteca.
Por mor da crise sanitaria, tomaranse todas as medidas de seguridade e
hixiene necesarias para garantir que todas/os gocemos da cultura con
seguridade: distancia física entre persoas, hixiene de mans, uso de
máscara facial, etc.
Porque #aculturasegue e #aculturaesegura, en outubro as bibliotecas
celebraremos o noso día. Como en calquera aniversario, agora só faltas
ti para conmemoralo
Este espectáculo conta co patrocinio do programa "Ler conta moito" da Rede de Bibliotecas de Galicia.
Cartel:
xoves, 15 de outubro de 2020
Día das bibliotecas 2020: bibliotecas, sempre ao teu carón
A edición deste ano, e baixo o lema “Bibliotecas, sempre ao teu carón” céntrase en destacar o importante papel que xogan as bibliotecas ofrecendo acceso á cultura, ao coñecemento e ao entretemento en calquera lugar e circunstancia. Especialmente na actual situación, cando vimos de vivir un longo confinamento e continuamos a loitar para superar unha crise sanitaria onde o acceso á cultura e á información veraz e de calidade toman especial sentido e importancia.
As bibliotecas, independentemente da súa tipoloxía ou titularidade, continuamos a ofrecer os nosos servizos en circunstancias tan complexas como as derivadas desta situación. Algo que se fixo con esforzo, adaptándonos ás novas necesidades dos usuarios para continuar desenvolvendo o traballo a través da redes, mesmo dende a casa.
Este ano, e pese ás limitacións impostas pola crise sanitaria, dende a biblioteca municipal desexamos conmemorar este día tan especial cunha serie de actividades de animación que celebraremos ao longo do mes de outubro. Baixo o lema “Celebramos o mes da biblio”, a biblioteca convídavos a participar en tres espectáculos pensados especialmente para as crianzas e novos e dirixidos a toda a familia. Podes consultar a programación premendo aquí.
Feliz días das bibliotecas!
Cartel conmemorativo:
sábado, 10 de outubro de 2020
"O tesouro da avoa" con Os Quinquilláns, unha funcion para celebrar o mes das bibliotecas [Actividade de balde, con inscrición previa]
O sábado 24 de outubro celebramos o Día da biblioteca,
unha efeméride especialmente dirixida ao público infantil e novo. Unha
data na que queremos trasladar á cidadanía a importancia da biblioteca
como lugar de encontro de lectoras/es de todas as idades coa cultura e
coma instrumento de mellora da formación e convivencia. Pese ás limitacións impostas pola crise sanitaria, dende a
biblioteca municipal desexamos conmemorar este día tan especial cunha
serie de actividades de animación
O sábado 17, ás 12:00 h., Os Quinquilláns, con Lucho Penabade e Tero Rodríguez, presentarán “O tesouro da Avoa”, unha función para toda a familia que nos narra a historia de Jacinta, unha muller intelixente e feliz. Traballaba de mestra nunha escola na que se aprendía xogando e se xogaba aprendendo. Tiña canto quería; casa, familia, amigas, traballo… Pero veu a guerra e quitáronllo case todo. Tivo que fuxir para moi lonxe, mais conseguiu levar escondido un tesouro segredo que moitos anos despois entregou ás súas netas.
A función celebrarase na Sala Municipal de Exposición da Casa da Cultura (se as condicións meteorolóxicas o permiten, trasladaríase ao exterior, na Carballeira de Santa Minia) ás 12:00 h., con entrada de balde e aforo limitado, para garantir as medidas de seguridade e
hixiene necesarias para que gocemos da cultura con
seguridade: distancia física entre persoas, hixiene de mans, uso de
máscara facial, etc.
É necesaria inscrición previa que pode realizarse no tfno.: 981 50 99 69 ou a través do correo electrónico da biblioteca.
A actividade conta co patrocinio do programa Ler conta moito da Rede de Bibliotecas de Galicia.
venres, 9 de outubro de 2020
Os michos de Pedro Brandariz visitaron a biblioteca
Brandariz narrou, coa axuda de varios albumes ilustrados, as venturas e desventuras de varios gatos (de aí o título) que pouco a pouco (e de moi diferentes maneiras) van descubrindo as súas capacidades e limitacións, aprendendo a aceptarse a si mesmos tal e como son.
A actuación, enmarcada dentro da programación de "Outubro, mes da biblioteca”, comezou pasadas as 18:00 h. e reuniu na Carballeira de Santa Minia, espazo no que fica a biblioteca municipal, a un total de 22 persoas, entre pequenas/os e adultos.
Imaxes da actuación:
luns, 5 de outubro de 2020
Os monicreques de Kukas regresan a Brión con Xan Perillán [Actividade de balde con inscrición previa]
Unha montaxe de monifates e maxia a cargo de Marcelino de Santiago “Kukas”, dirixido por Isabel Rey Pousada e patrocinado polo programa de dinamización lingüística FalaRedes.
Para participar neste serán de teatro de monicreques, só será necesario inscribirse previamente no tfno: 981 50 99 69 ou a través do correo electrónico da biblioteca. A entrada é de balde e o aforo estará limitado. Para garantir a seguridade e hixiene necesarias para que gocemos da cultura de xeito seguro deberemos respectar a distancia física entre persoas, hixiene de mans, uso de máscara facial, etc.
'Contos de Michos' con Pedro Banzariz para celebrar o mes das bibliotecas [Actividade de balde con inscrición previa]
O sábado 24 de outubro celebramos o Día da biblioteca,
unha efeméride especialmente dirixida ao público infantil e novo. Unha
data na que queremos trasladar á cidadanía a importancia da biblioteca
como lugar de encontro de lectoras/es de todas as idades coa cultura e
coma instrumento de mellora da formación e convivencia. Pese ás limitacións impostas pola crise sanitaria, dende a
biblioteca municipal desexamos conmemorar este día tan especial cunha
serie de actividades de animación
A primeira delas terá lugar o venres 9 de outubro. O actor e animador Pedro Brandariz visitará Brión para presentar “Contos de Michos”, un espectáculo de narración oral, dirixida a crianzas de 4 a 12 anos, na
que Brandariz conta as venturas e desventuras de varios gatos que pouco a
pouco (e de moi diferentes maneiras) van descubrindo as súas
capacidades e limitacións, aprendendo a aceptarse a si mesmos tal e como
son.
O serán celebrarase na Sala Municipal de Exposición da Casa da Cultura (se fixera boa tarde, trasladaríase ao exterior da Carballeira de Santa Minia) ás 18:00 h., con entrada de balde e aforo limitado, para garantir as medidas de seguridade e
hixiene necesarias para que gocemos da cultura con
seguridade: distancia física entre persoas, hixiene de mans, uso de
máscara facial, etc. É necesaria inscrición previa que pode realizarse no tfno.: 981 50 99 69 ou a través do correo electrónico da biblioteca.
A actividade conta co patrocinio do programa Ler conta moito da Rede de Bibliotecas de Galicia.
