Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

xoves, 14 de febreiro de 2019

"Conduce rápido" de Diego Ameixeiras, vindeira lectura do club

Deixamos atrás a verde campiña inglesa, onde John Mortimer ambientara a súa novela, e situámonos agora nas familiares rúas de Compostela, cidade onde Diego Ameixeiras sitúa a trama e os personaxes de “Conduce rápido” (Xerais, 2014).
Na liña de anteriores obras, o autor profunda no seu particular estilo, baseado na brevidade, a dosificación informativa, as tramas cruzadas e a economía expresiva. Todo para crear un xeito persoal e innovador dentro do xénero de intriga que se escribe no noso país.
Con precisión, Diego Ameixeiras ofrece un relato de vidas precarias que se moven por un familiar decorado urbano na procura dunha oportunidade que mellore a súa existencia. 
Despois de ler a novela, reunirémonos para comentala o mércores 13 de marzo. Como de costume, na biblioteca municipal a partir das 20:00 h.

xoves, 7 de febreiro de 2019

Boletín de novidades dixitais de xaneiro da plataforma de préstamo EbiblioDaCoruna

Dende a BPM de Brión queremos difundir entre os nosos usuarios e as nosas usuarias o novo boletín de novidades da plataforma dixital EBIBLIODACORUNA, un documento que atoparedes a pé de páxina e que recolle todos os materiais que recentemente se incorporaron na plataforma de préstamo dixital.

EbiblioDaCoruna é a plataforma gratuíta de préstamo dixital de libros, películas, audio-libros e outros contidos dixitais das máis variadas temáticas, que a Deputación da Coruña pon en servizo para todas as persoas usuarias de calquera biblioteca pública da provincia da Coruña. Se queredes saber máis sobre o seu funcionamento, só tedes que pinchar nesta ligazón.



Boletín xaneiro de 2019
 

luns, 4 de febreiro de 2019

EbibioDaCoruna presenta o seu Club Lector

Dende a BPM de Brión queremos divulgar entre os nosos usuarios e as nosas usuarias un novo e interesante servizo que pon á disposición dos lectores e lectoras das biblioteca públicas da provincia a Depuración da Coruña. Falamos da plataforma de préstamo de libro dixital EbiblioDaCoruna (máis información aquí) que a partires do día 12 de febreiro estrea o seu Club lector.

Que é?

EbibioDaCoruna Club Lector é un espazo en liña para ler, comentar e compartir lecturas, tanto en castelán como de autores galegos, tendo en conta a actualidade, intereses e gustos dos participantes. En definitiva, un club de lectura virtual aberto as 24 horas no que pode participar calquera persoa usuaria do servizo de préstamo dixital EbiblioDaCoruna.

Como funciona?

O club de lectura divídese en dúas salas, “Arredor dos libros” dedicado a escritores galegos, e “Compartiendo lecturas”, no que se percorren libros de variada temática e de actualidade en castelán.

Está moderado por unha persoa cualificada con moitos anos de experiencia moderando clubs de lectura e impartindo clases de español e galego. Os clubs de lectura tamén teñen o soporte do persoal técnico da Biblioteca da Deputación.

A programación das lecturas no club para os vindeiros meses é a seguinte:

Arredor dos libros:

· “Vivir sen permiso e outras historias de Oeste”, de Manuel Rivas. Comeza o 12 de febreiro.

· “A memoria da choiva”, de Pedro Feijoo. Comeza o 16 de abril.

· “Insolación”, de Emilia Pardo Bazán. Comeza o 11 de xuño.



Compartiendo lecturas:

· “Los pacientes del doctor García”, de Almudena Grandes. Comeza 28 de febreiro.

· “Poesía reunida”, de Ida Vitale. Comeza 4 de abril.

· “La uruguaya”, de Pedro Mairal. Comeza 28 de maio.

Quen pode participar no club?

Calquera persoa usuaria da EbiblioDaCoruna (o servizo de préstamo dixital da Biblioteca da Deputación). Para acceder só é preciso cumprir os seguintes requirimentos:

- Estar de alta na plataforma de préstamo dixital EbiblioDaCoruna. Date de alta aquí de balde: http://deputaciondacoruna.tubiblioweb.com/alta-no-prestamo-electronico/

- Ter un dispositivo para ler con acceso á Internet: móbil, ordenador, tableta…

Para acceder ao club lector premer nesta ligazón: https://ebibliodacorunaclub.odilotk.es

E identificarse no apartado “Iniciar sesión” coas claves da EbiblioDaCoruna.


Como unirse a un club e participar?

Unha vez que a persoa interesada se identifica no apartado “Iniciar sesión”, xa pode comezar a seguir calquera dos dous clubs, premendo en “Seguir”.

Na pestana Información aparece a programación do club para os vindeiros meses e unhas breves indicacións de uso.

Na pestana Lecturas pódese tomar en préstamo o libro, que estará dispoñible a partir do mesmo día en que comeza o club.

Nas pestanas Foro, Chat e Citas pódese contestar ás conversas que abre a persoa moderadora, chatear co resto de participantes no club, e compartir as nosas frases favoritas do libro.

Onde atopar información?

Toda a información necesaria para participar no club pode atoparse na páxina web da Biblioteca www.dacoruna.gal/biblioteca no apartado EbiblioDaCoruna Club Lector.

Pode demandarse atención personalizada de información no enderezo de correo biblioteca.info@dacoruna.gal e no teléfono 981 080 176. Tamén de xeito presencial na sala de Préstamo e Información no primeiro andar da Biblioteca en Riego de Agua 37, A Coruña.

Xunto a este correo e no apartado mencionado da web pode atoparse unha guía breve de uso do EbiblioDaCoruna Club Lector.

luns, 21 de xaneiro de 2019

Lembranza importante [actualización]: modificación do horario de apertura da biblioteca o venres 25 de xaneiro

Tras o aviso de modificación do horario de apertura matinal da biblioteca municipal  entre os días 23 e 30 de xaneiro, comunicamos aos usuarios e usuarios que o centro recupera o seu horario habitual. Polo que, anulamos a anterior comunicación.
Unicamente se producira unha modificación das horas de apertura o venres 25 de xaneiro, atendendo ao seguinte esquema: 
      Mañás: 10:00 a 13:00 h.
      Tardes: 16:00 a 20:00 h.
O servizo de préstamo a domicilio funcionará  como de costume a excepción do sábado 26 de xaneiro, data na que non se prestarán materiais, ainda que se poderán devolver os emprestados.
Desculpas polas molestias ocasionadas. Grazas.

xoves, 17 de xaneiro de 2019

A biblioteca de préstamo dixital da Deputación da Coruña renova a súa plataforma

A Biblioteca Provincial da Deputación de Coruña ven de renovar a súa plataforma de préstamo dixital accesible para todas as usuarias e todos os usuarios de calquera biblioteca pública da provincia da Coruña. Un servizo que xa viña funcionando dende tempo atrás e que agora ofrece máis posibilidades. Na EbibliodaCoruna os lectores dispoñen das últimas novidades literarias e libros de coñecemento; pero ademais, poden acceder a outro tipo de materiais, como xornais, revistas, películas, audio-libros, cursos, etc.

Que é EbiblioDaCoruna

 É a plataforma gratuíta de préstamo dixital de libros, películas, audio-libros e outros contidos dixitais das máis variadas temáticas, que a Deputación da Coruña pon en servizo para todas as persoas usuarias de calquera biblioteca pública da provincia da Coruña.

Funcionamento do préstamo

Para acceder ao servizo tes que introducir o usuario e o contrasinal facilitados tras o proceso de alta. O catálogo permite a busca por título, autoría, ISBN ou ben mediante filtros de temáticas especiais. Unha vez localizado o exemplar desexado podes obter unha vista previa das primeiras páxinas ou tomalo en préstamo.
Unha vez rematado o prazo de préstamo, as obras desaparecerán automaticamente da túa conta.
Se a obra que buscas está prestada podes reservala. Cando estea dispoñible recibirás unha mensaxe de correo electrónico e terás un prazo máximo de 48 horas para tomala en préstamo.

Modos de lectura

  •  En streaming, visualización dos contidos en tempo real, sen necesidade de descarga, a través de calquera navegador conectado a internet e en calquera dispositivo.
  • Lectura mediante descarga, neste caso precisas, configurar unha conta Adobe ID e instalar no teu ordenador a aplicación Adobe Digital Editions.
  • A través da APP de lectura para tabletas e teléfonos intelixentes dispoñible para IOS e Android.
Tanto Adobe Digital Editions coma a aplicación de lectura permiten a sincronización e poder gozar da mesma obra en diferentes dispositivos.

Requirimentos para a alta no servizo

  • Ter máis de 15 anos
  • Ser usuaria/o de calquera biblioteca pública da provincia da Coruña
  • Dispor dun enderezo electrónico
  • Ter un ou máis dispositivos para ler (ordenador persoal, teléfono móbil, tableta ou lector de libro electrónico)
Solicita a inscrición na túa biblioteca ou na nosa web:
Contacta con nós a través do noso enderezo electrónico:
biblioteca.info@dacoruna.gal ou no teléfono 981 080 176

Podes acceder a plataforma premendo na seguinte ligazón.

"Un paraíso inalcanzable" de John Mortimer, vindeira lectura do club

Dende o Nápoles de “La amiga estupenda” damos un salto espacial para situarnos en Rapstone Fanner, unha pequena vila inglesa onde se ambienta a narración de “Un paraíso inalcanzable” (1985) a novela de John Mortimer escollida como vindeira lectura do club.
“Un paraíso inalcanzable” é un delicioso retrato da vida de provincias inglesa e tamén unha feroz sátira do thatcherismo e dos cambios que se produciron no país durante a segunda metade do século XX. A narración percorre corenta anos da historia de Rapstone Fanner e as súas xentes −os que van desde a segunda guerra mundial ata o goberno de Margaret Thatcher−, durante os cales a sociedade e costumes inglesas sufriron cambios radicais.
O autor, John Mortimer, foi avogado, dramaturgo e novelista. Como avogado, adquiriu gran notoriedade nos anos setenta como defensor da liberdade de expresión nas numerosas causas abertas contra libros, revistas e discos. En 1998 foi nomeado Sir pola súa contribución ao mundo das artes.
Para comentar a lectura, reunirémonos o mércores 6 de febreiro ás 20:00 h. Como sempre, na biblioteca municipal.

venres, 4 de xaneiro de 2019

Modificación do horario de apertura matinal da biblioteca entre o 7 e o 11 de xaneiro

Dende o luns, 7 de xaneiro, a biblioteca municipal recupera o seu horario habitual, aínda que cunha modificación puntual nas horas de apertura matinais. Na semana do 7 ao 11 de xaneiro a biblioteca abrirá polas mañás de 10:00 a 13:00 h.

Horario da biblioteca do 7 ao 12 de xaneiro:
Mañás: 10:00 a 13:00 h.
Tardes: 16:00 a 22:00 h.
Sábado: 9:00 a 14:00 h.

A partir do luns, 14 de xaneiro, a biblioteca recuperará o horario de apertura habitual.

Desculpas polas molestias ocasionadas. Grazas.