Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

xoves, 4 de marzo de 2021

8 de marzo, Día Internacional da muller

Dende a biblioteca municipal, do mesmo xeito que o resto de departamentos e servizos do Concello de Brión, sumámonos un ano máis á defensa dos valores que conmemoramos o 8 de marzo, Día Internacional da Muller. Unha data para reivindicar uns principios que desexamos permanezan vixentes o resto ano. 
Baixo o lema: “Mulleres líderes. Por un futuro igualitario no mundo da Covid-19”, este ano queremos dar especial visibilidade ás mulleres están na primeira liña da loita contra a Covid-19. Falamos das traballadoras do ámbito sanitario, dos servizos esenciais, da ciencia, da investigación... tamén as que lideran países como Nova Zelandia, Alemaña, Dinamarca, Finlandia, Islandia, Etiopía ou Eslovaquia. Xefas de Goberno que acadaron un gran recoñecemento internacional pola eficacia da súa resposta fronte a pandemia que estamos a sufrir.
Con ela tamén xurdiron novos obstáculos que frean unha participación en plena igualdade das mulleres nos diferentes ámbitos da sociedade. Fronte a estes atrancos, o Concello de Brión quere manifestar o seu compromiso coa defensa e o fomento da igualdade entre homes e mulleres. Unha implicación que se plasma na aprobación do IV Plan para a Igualdade entre Mulleres e Homes 2021-2024, que quere aproveitar a experiencia adquirida nos últimos anos e afondar na loita contra as desigualdades que aínda seguen pouco visibles na nosa sociedade. Por iso, este 8 de marzo, o Concello de Brión quere compartir coa veciñanza un dos froitos do terceiro Plan: a guía de linguaxe inclusiva, distribuída o ano pasado entre o persoal municipal e que este ano estará a disposición de toda a veciñanza a través da web municipal. Preme nesta ligazón para accede directamente.
Tamén se vai organizar un serán de autocinema no campo de fútbol de Bastavales no que se proxectará o filme “María Solinha”, unha película que fala sobre a intolerancia e a violencia do mundo patriarcal, da represión da carne e da mente. Cartel.
 
Pola súa parte, este centro vai dar visibilidade nun dos seus expositores, e durante toda a vindeira semana, a unha selección de novidades bibliográficas que forman parte do punto de interese sobre igualdade que ten a biblioteca. Asemade, a través das redes sociais e baixo o lema de “Mulleres de Brión... onte, hoxe, sempre”, partillaremos novas, curiosidades, recomendacións de lectura e imaxes do noso arquivo arredor do 8M Día Internacional da Muller.
Porque dende o Concello de Brión desexamos reivindicar a necesidade de ligar forzas entre todas e todos para que calquera persoa poida ocupar na sociedade o lugar que lle corresponde por dereito propio, que non é outro que aquel que desexen, independentemente do xénero.

mércores, 17 de febreiro de 2021

Imaxes para mil versos: celebramos o 24 de febreiro, Día de Rosalía

A obra literaria de Rosalía de Castro está constituída por milleiros de palabras que evocan sentimentos fondos, lugares próximos, sons familiares. Palabras que tamén denunciaron inxustizas sociais, reclamaron a igualdade e reivindicaron o valor universal da nosa lingua. Temas aínda hoxe moi vixentes.

A prosa e os versos de Rosalía consérvanse en centos de publicacións. Asemade, a súa imaxe quedou plasmada en icónicas fotografías, debuxos e óleos que a representaron en distintos momentos da súa vida. Combinando palabras e imaxes, queremos homenaxear a Rosalía de Castro no seu día, o 24 de febreiro. Unha data na que lembramos o seu nacemento para conmemorar a vida e obra dunha figura sobranceira e clave das nosas letras.

A nosa achega, versos e imaxes na semana do 22 ao 28 de febreiro

Ao longo da última semana de febreiro, e a través das redes sociais da biblioteca pública municipal e do Concello de Brión, iremos compartindo diariamente imaxes e textos da autora. Tamén partillaremos vídeos de curta duración nos que Rosalía e a súa obra se converterán en imaxes en movemento.

Únete a nós nesta homenaxe a Rosalía

Anímate a participar nesta campaña e comparte connosco, a través das redes sociais, algunha imaxe da autora, texto ou vídeo breve (gravado co móbil) no que recites algunha estrofa ou fagas calquera reflexión sobre Rosalía de Castro. Coa etiqueta #diaderosaliaenbrion, comparte a túa achega a través do Facebook, citando @bibliotecadebrion, ou no Twitter, citando @bibliobrion. Calquera contido que subas, compartirémolo nas nosas redes para celebrar o Día de Rosalía 2021. 


 

martes, 16 de febreiro de 2021

Lembranza importante: A biblioteca municipal reanuda os seus servizos habituais

A B.P.M. de Brión reabre as súas portas dende o mércores 17 de febreiro ás 16:00 h. Asemade, reinicia os seus servizos habituais (estudo e lectura en sala, acceso a internet, acceso libre ás coleccións, préstamo a domicilio, devolución de materiais, etc.)

Como novidade, e atendendo á correspondente orde da Consellería de Sanidade, o aforo do local quedará reducido ao 30% da súa capacidade (12 persoas máximo)

Por suposto, mantéñense as recomendacións habituais para un uso seguro e responsable do servizo, para garantir a saúde das/dos usuarias/os e previr a expansión da Covid-19:

- Uso obrigatorio de máscara facial en todo momento.

- Desinfección de mans con xel hidroalcóholico antes de entrar

- Distancia mínima se seguridade de cando menos 1,5 m. 

- Menores de 14 anos sempre acompañados por un adulto responsable. 

O mércores 17 de febreiro, e por necesidades do servizo, a biblioteca só abrira pola tarde, entre as 16:00 e as 21:30 h. Dende o xoves 18 de febreiro, recuperaremos o horario habitual do centro:

  De luns a venres:
  Mañás: 9:00 a 14:00 h.
  Tardes: 16:00 a 21:30 h. 

  Sábados: de 9:00 a 14:00 h.

venres, 29 de xaneiro de 2021

Día da Ilustración 2021: Lolita Díaz Baliño

Un ano máis celebramos o Día da Ilustración, unha efeméride que conmemora e reivindica o papel das/os profesionais da ilustración, sen dúbida fundamental na industria cultural, especialmente no sector editorial. Porque unha imaxe é complemento esencial da palabra escrita en moitas publicacións, sen esquecer o protagonismo que ten en xéneros como a BD, o mundo da creación publicitaria (carteis, folletos...), o cinema, etc.
 
O 30 de xaneiro, coincidindo co día de nacemento de Castelao, homenaxéase a unha/un ilustradora/or histórica/o galega/o. A protagonista deste ano é a coruñesa Lolita Díaz Baliño (1905-1963), pintora e mestra, primeira muller membro da Real Academia Galega de Belas Artes. Foi unha pioneira artista multidisciplinar que desafiou as convencións sociais da época. Criouse nunha familia de artistas (era tía de Isaac Díaz Pardo), e destacou desde moi nova na fotografía e na pintura.
 
 

 O Día da Ilustración é unha iniciativa da Consellería de Cultura e Turismo da Xunta de Galicia en colaboración coa Asociación Galega de Profesionais da Ilustración (AGPI). No portal web monográfico dedicado a autora homenaxeada poderemos atopar distintos recursos para comprender mellor esta celebración e coñecer un pouco máis a Lolita Díaz Baliño (preme nas ligazóns):

Biografía e bibliografía sobre a artista



Catro visións sobre Lolita Díaz Baliño, onde catro ilustradoras galegas (Lidia Cao, Nuria Figueiredo, Iria Ribadomar e Laura Romero) ofrecen a súa visión persoal de Lolita Díaz Baliño, mediante ilustracións realizadas especialmente para a ocasión.

Charlas en vídeo: coa ilustradora invitada Carla Berrocal e "Lolita Díaz Baliño: ilustradora de soños" con Rosa Sarmiento

Actividades: Obradoiros, exposicións e actividades nas bibliotecas públicas e nas escolas de arte de Galicia.


 

martes, 26 de xaneiro de 2021

Lembranza importante. A biblioteca municipal pecha as súas portas pero mentense aberta na Rede [Editado]

Por mor da crise sanitaria provocada pola COVID-19, e ao abeiro das directrices ditadas pola Xunta de Galicia, dende o mércores 27 de xaneiro e durante, como mínimo, tres semanas as biblioteca públicas da comunidade permaneceremos pechadas.
 
A biblioteca municipal de Brión non será unha excepción, aínda que manteremos todas as canles telemáticas de comunicación coas/cos nosas/os usuarias/os abertas. Mesmo coas portas pechadas, seguiremos traballando para resolver calquera cuestión que a cidadanía nos transmita. A través do teléfono 981 50 99 69 (tardes, de 15:30 a 21:30 h.) atenderemos calquera dúbida ou consulta. A través dos correos electrónicos e das redes sociais da bibliotecas manteremos canles de comunicación con que desexe contactar connosco.
 
Calquera veciña/o de Brión que desexe devolver materiais desta biblioteca durante este período, poderá facelo na caixa habilitada para tal fin no recibidor da biblioteca, en horario de 15:30 a 21:30 h. (luns a venres). Polas mañás, poderán entregarse na Casa da Cultura. Asemade, a devolución dos préstamos que venzan durante este período adiarase ata a apertura do centro. As/os usuarias/os doutros concellos non terán problema en pospoñer a entrega dos mesmos ata que se recupere a mobilidade entre municipios.
 
Naturalmente, que a biblioteca peche temporalmente non significa que debamos deixar de ler e gozar de contidos culturais. A través das plataformas de préstamo dixital GaliciaLe e eBibliodacoruna, as/os usuarias/os que dispoñan do carné de Rede poderán acceder a numerosos libros, audio libros, revistas, películas... que poderán gozar na súa computadora, e-readers compatibles e dispositivos móbiles (teléfonos intelixentes, tabletas).
 
Tamén nos manteremos activos nas redes sociais Facebook e Twitter achegando, na medida do posible, recomendacións de lectura, novas e outros contidos informativos, culturais e de lecer.
 
Mantédevos sas e sans, axiña volveremos a vernos na biblioteca. Non deixes de seguirnos na Rede. Grazas por estar aí.