Encontros literarios: presentación en Brión da novela “Vacaciones en Lisboa”, de María Cao López

O venres 11 de decembro a Sala Municipal de Exposicións de Brión acollerá a presentación do libro “Vacaciones en Lisboa”, escrito pola veciña de Brión María Cao López e publicado pola editorial Letrame.

“Vacaciones en Lisboa” é unha novela que narra a historia de Victoria, unha moza barcelonesa que viaxa a Lisboa en compañía da súa familia e unha amiga. Alí coñecerá e namorarase de João, aínda que axiña descubrirá o desamor ao verse interrompida a relación sentimental pola oposición ao romance dos pais do mozo. Unha nova viaxe a Edimburgo e unha carta fan que Victoria descubra sen querer a verdade.

María Cao López é unha autora consagrada, con varias publicacións editadas nos últimos anos. Veciña de Os Ánxeles, parroquia onde naceu e se criou, marchou de nova a Barcelona, cidade na que reside dende hai anos. Iso si, sen esquecer a súa terra nin perder as estreitas ligazóns que a unen a Brión. No seu concello xa presentara as obras “Rosas y espinas” e “Vivencias en el puente”, novelas publicadas pola editorial Letrame.

Dende a biblioteca municipal convidamos a toda a veciñanza a participar neste encontro literario que será de acceso libre ata completar a capacidade da sala.

 

Seguir lendo

Presentación en Brión de "Os paxaros que non puideron voar" de Alberto Pérez Riera

O ferrolán de nacemento e brionés de adopción, Alberto Pérez Riera, presentará o vindeiro 26 de novembro o seu último libro, Os paxaros que non puideron voar, un poemario publicado recentemente pola editorial Toxosoutos.

A obra parte dunha reflexión crítica sobre os tempos actuais, marcados polas consecuencias dun sistema capitalista centrado na produtividade e no lucro, contraposto coa necesidade de recuperar a humanidade, a natureza, a arte e o pensamento crítico. O autor propón unha viaxe cara á esperanza e á liberdade colectiva, onde as barreiras sociais e psicolóxicas queden atrás.

O encontro literario, organizado pola biblioteca municipal coa colaboración da Casa da Cultura, celebrarase na Sala Municipal de Exposicións de Brión o xoves 26 deste mes ás 20:00 h. , con acceso libre ata completar a capacidade da sala.

Seguir lendo

A biblioteca municipal modifica o seu horario

A partir de novembro, a biblioteca municipal de Brión vai modificar o seu horario de apertura ao público. Dende o luns, día 2, o horario de apertura será o seguinte:

Mañás: 9:30 – 13: 30 h.
Tardes: 16:00 – 21:00 h.
De luns a venres.

Asemade, os martes e os xoves, en horario de mañá, a biblioteca municipal funcionará exclusivamente como sala de estudo. Se ben se poderá efectuar a devolución de materiais prestados, non se realizará préstamo a domicilio nin outros servizos habituais do centro (renovación de préstamos, altas de usuarios na Rede, consultas bibliográficas, servizo de referencia, etc.).

Seguir lendo

Un serán contacontos para celebrar o Día das Bibliotecas con Frumario o bibliotecario

O 24 de outubro celebramos o Día das Bibliotecas, unha efeméride sempre reivindicativa que este ano, baixo o lema “Sen profesionais, non hai bibliotecas”, desexa dar visibilidade ao traballo de todas as persoas que fan posible que as bibliotecas sexan moito máis que un conxunto de recursos, andeis e espazos.

Para conmemorar esta data tan especial, a biblioteca municipal organizou un serán contacontos a cargo de Manuel Pombal que presentou en Brión o espectáculo “Frumario o bibliotecario”. Unha sesión de narración oral dirixido a público de seis a doce anos.

A través do personaxe de Frumario, un bibliotecario moi singular e especial, a obra convida ás crianzas a mergullarse e a brincar no máxico mundo dos libros a través das bibliotecas. Lugares cheos de misterios ocultos e milleiros de tesouros agochados nos andeis. So hai que saber atopalo. E os bibliotecarios, poden axudarche a encontralos.

O espectáculo comezou ás 18:00 h. e prolongouse preto de 45 min. Historias, libros e música en combinación, na procura de espertar na audiencia o interese e a curiosidade polas bibliotecas, os libros e a lectura.

A actividade, organizada pola biblioteca municipal, contou co patrocinio do programa Ler conta moito da Rede de Bibliotecas de Galicia.

Seguir lendo