Cada ano, unha sección nacional do IBBY (International Board on Books for Young People) ten a oportunidade de patrocinar o Día do Libro Infantil e seleccionar un escritor representativo e un recoñecido ilustrador do seu país para que elaboren a mensaxe dirixida a todos os nenos do mundo e o cartel que se distribúe por todo o mundo, e promóvase a celebración nas bibliotecas, centros escolares, librerías, etc.
Este ano correspóndelle á sección de Estados Unidos (USBBY) difundir a mensaxe da escritora Margarit Engle (co título de "A música das palabras"), ilustrada por Roger Mello. Engle é unha poeta cubano americana que obtivo numerosos premios polas súas obras infantís. O ilustrador do cartel, Roger Mello, naceu en Brasília en 1965, traballou en máis de 100 títulos, 25 dos cales son da súa autoría, e tamén obtivo importantes galardóns, como o Premio Andersen en 2014.
De seguido, ofrecémosche a mensaxe publicada na web de IBBY. O texto en galego está traducido da versión en castelán publicada na Revistababar.com.
A música das palabras
Cando lemos, á nosa mente médranlle ás.
Cando escribimos, os nosos dedos cantan.
As palabras son tambores e frautas na páxina,
paxaros cantores que alzan o voo e elefantes
que tocan a trompeta,
ríos que flúen, fervenzas que caen,
bolboretas que revoan
no alto do ceo!
As palabras convídannos a bailar:
ritmos, rimas, latexos do corazón,
ruído de cascos e bater de ás,
fábulas antigas e novas,
ficticias e reais.
Non importa se estás comodamente en casa
ou cruzando a fronteira cara a un novo país
e un idioma descoñecido, os contos e poemas
son teus.
Cando compartimos as palabras, as nosas voces
transfórmanse na música do futuro,
en paz, alegría e amizade,
unha melodía de esperanza.
Se o desexas, visita o portal web do IBBY e accede á mensaxe orixinal en inglés. Tamén podes descargar o cartel en tamaño A3 e un folleto con información complementaria sobre o autor e o ilustrador.
Imaxe do cartel:
0 comentarios :
Publicar un comentario