Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

luns, 16 de maio de 2022

Historias fabulosas: maxia e sombras chinesas con Ian & Elisa en Brión

O venres 3 de xuño os ilusionistas Ian & Elisa visitarán Brión para cativar coa súa maxia e simpatía a crianzas e público adulto. Ás 18:00 h, na Sala Municipal de Exposicións (Casa da Cultura) presentarán o seu espectáculo “Historias fabulosas: dous magos e outras cousas maxia”, un entretido serán que reúne maxia e sombras chinesas usando contos e fábulas como fío condutor facendo que grandes e pequenos gocen dun fermoso e entretido espectáculo onde se fomenta o hábito da lectura como método para facer voar a imaxinación.

O espectáculo, dunha duración aproximada de 50 min., está especialmente dirixido a público de entre 4 e 12 anos de idade, aínda que os adultos que asistan divertíranse coma crianzas. O acceso será libre ata completar o aforo. Reserva de butacas para o espectáculo a través deste formulario.

O espectáculo conta co patrocinio do programa Ler conta moito da Rede de Bibliotecas de Galicia.

 


 

sábado, 14 de maio de 2022

Úrsula Heinze presenta en Brión "Flashes"

A Sala Municipal de Exposicións (Casa da Cultura) acolleu a presentación en Brión da última publicación da recoñecida escritora Úrsula Heinze, “Flashes”. Unha obra en dous volumes que recompila un conxunto de relatos a xeito de instantáneas, onde a autora plasma momentos da súa vida (dispoñible na biblioteca municipal).
O encontro literario celebrouse o venres 13 de maio ás 20:30 h. e forma parte da máis ampla programación de actividades que a Casa da Cultura e a biblioteca municipal de Brión organizan no mes de maio para conmemorar a celebración do Día das Letras Galegas.
Xunto a escritora de orixe alemá, afincada en Compostela dende 1968, participaron na presentación Luís Alonso Girgado, recoñecido editor, escritor, tradutor e investigador; Víctor F. Freixanes, escritor, xornalista, editor e profesor universitario, presidente da Real Academia Galega dende 2014. Tamén Dolores Vilavedra, profesora na USC, integrante do consello de redacción da revista Grial, escritora, tradutora e crítica literaria.
Ursula Heinze de Lorenzo é unha destacada escritora, con numerosas novelas, ensaios e relatos dirixidos tanto a público infantil, xuvenil como adulto. Tamén destaca polas súas composicións poéticas, escritas indistintamente en galego e alemán. Tampouco debemos esquecer o seu labor como tradutora de autores alemáns ao galego e castelán. 
 



 

martes, 3 de maio de 2022

Maio Cultural - Letras Galegas 2022: Florencio Delgado

O Día das Letras Galegas deste ano homenaxeará a Florencio Delgado Gurriarán. Escritor e militante galeguista que trala fin da Guerra Civil tivo que exiliarse a México, país onde se establecería definitivamente.

Con motivo desta celebración, Brión dedicará o seu Maio Cultural-Letras Galegas 2022 a este autor. Dende o 7 ao 31 de maio, están previstas unha sería de actividades, algunhas en colaboración cos centros de ensino do municipio, para celebrar o mes no que florecen as Nosas Letras.

 

Actividades programadas:

Día 7 maio. Fegateatro. Centro Social Polivalente, 20:00 h.
O grupo Teatro Escoitade de Vigo presenta "Dominó Celeste ou Que vai ser de ti, Ernesto!" 
Traxicomedia. Maiores de 14 anos.
Sinopse: Que acontece cando es levado a un lugar para curarte? Por que non o entendes? Que atopas cando nada hai ao teu arredor? Por que o cerebro te leva por carreiros tan retortos? Quen provoca estes desvaríos?... Observa, entón, toda unha vida perfilada con lembranzas cando se rachan as ligazóns neuronais.
 
Día 13 maio.- Espectáculo musical con Xoán Curiel. Sala Municipal de Exposicións. 18:00 h.
Crianzas de entre 6 e 12 anos de idade.
Xoán Curiel presenta “Cantando as nosas letras”. Xoán canta a Xela Arias, Antonio Fraguas, Carvalho Calero, Florencio Delgado Gurriarán e algúnhs outros/as autores das nosas letras. Un percorrido musical para falar das súas obras e das súas experiencias vitais, co obxectivo de achegar estas figuras ao público asistente. 
Entrada de balde ata completar aforo. Reserva en: bibliotecadebrion@briondixital.org. (Envía unha mensaxe co nome dun adulto, un tfno. de contacto e o número de cadeiras que desexas reservas.)
 
Día 13 maio.- Encontro Literario con Úrsula Heinz. Sala Municipal de Exposicións. 20:30 h.
Esta recoñecida autora presenta o libro “Flashes”. Estará acompañada por Luís Alonso Girgado, Víctor F. Freixanes e Dolores Vilavedra.
 
Día 14 maio.- Fegateatro. Centro Social Polivalente, 20:00 h.
Farándula Velutina de Corcubión presenta “A derradeira bala”
Comedia. Maiores de 7 anos
Sinopse: Luciana Cardone decide abandonar as trincheiras para ir na busca doutro mundo, cheo de poesía, teatro, música…pero descuberta e xulgada polos seus superiores, é condenada a morte. Á mañá seguinte, será fusilada coa derradeira bala que garda o pelotón. Mais o amor pola música de Luciana e as súas ansias de liberdade farán que a cousa se complique un chisco polo camiño.

Día 16 maio.- Cerimonia de entrega do IV Premio Laudamuco para textos teatrais a Paula Carballeira.
Sala Municipal de Exposición. 20:30 h.

Día 19 maio.- Presentación en Brión do libro “Rastros” de Roberto Vidal Bolaño.
Sala Municipal de Exposicións. 20:30 h.
A cargo de Paco Macías de Edicións Positivas e Lois Blanco Araúxo (director teatral).

Día 21 maio.- A Compañía Coproducións Condetrespés presenta “Rastros"
20:00 h. Centro Social Polivalente.
Sinopse: Santiago de Compostela. Finais do século XX. Esther agoniza no hospital. Tres homes, seguramente os máis importantes da súa vida, relembran momentos que compartiron con ela, apunto de cumprir os 30 anos. Iago, Moncho e Xan están no mesmo espazo, están na cabeza dela a punto de marchar. A viaxe dos recordos é un punto de encontro duns amigos que compartiron case todo, agás evolucionar

Día 28 maio.- VII Andaina Terras de Altamira

Día 28 maio.- Fegateatro. Centro Social Polivalente. 20:00 h.
Disfunción Continua Teatro de A Estrada presenta “Departamento de selección”
Drama. Maiores de 16 anos

Sinopse: Este espectáculo, dirixido a un público maior de 16 anos, presenta varias personaxes que aceptan participar nun xogo cruel e perverso, onde manifestan o seu cinismo, egoísmo, intolerancia e falta de empatía. O público, xunto coas personaxes, debe decidir ata onde chega a verdade e onde comeza o truco. O espectador poderá reflexionar sobre o comportamento humano e os valores da sociedade de mercado en que vivimos. A obra, que alterna momentos máis divertidos con outros máis dramáticos, é unha crítica á deshumanización do mundo capitalista, que nos converte en inimigos e competidores, dispostos á loita máis salvaxe na que todo vale.

En todos os espectáculos teatrais a entrada será de balde ata completar aforo. Reserva de localidades en billeteira.concellodebrion.gal

Tamén se van organizar diferentes espectáculos ao longo do mes de maio dirixidos exclusivamente ao alumnado dos diferentes centros educativos de Brión.

Cartel Maio Cultura - Letras Galegas 2022

venres, 29 de abril de 2022

Maio Cultural-Letras Galegas: encontro literario con Úrsula Heinze

O venres 13 de maio a recoñecida escritora Úrsula Heinze de Lorenzo achegarase á Sala Municipal de Exposicións (Casa da Cultura) para presentar en Brión o libro “Flashes”. No encontro literario, que comezará ás 20:30 h., participarán o escritor, editor e investigador Luís Alonso Girgado; Víctor F. Freixanes, presidente da RAG e a profesora Dolores Vilavedra.
“Flashes” é un conxunto de relatos a xeito de instantáneas, onde a autora plasma momentos da súa vida, con interesantes anécdotas que incluso implican a persoeiros moi coñecidos. Unha traxectoria vital que comezou na Alemaña para logo trasladarse a Galicia en 1968, cando a autora fixa a súa residencia na cidade de Compostela.
Ursula Heinze é unha destacada escritora, con numerosas novelas, ensaios e relatos dirixidos tanto a público infantil, xuvenil como adulto. Tamén destaca polas súas composicións poéticas, escritas indistintamente en galego e alemán. Tampouco debemos esquecer o seu labor como tradutora de autores alemáns ao galego e castelán. 




Maio Cultural-Letras galegas: Cantando as Nosas Letras con Xoán Curiel

O venres 13 de maio, ás 18:00 h., a Sala Municipal de Exposicións vai acoller o espectáculo de Xoán Curiel “Cantando as Nosas Letras”. Un divertido serán de música e narración oral, dirixido a crianzas de 6 a 12 anos de idade, para celebrar que maio é o mes das Nosas Letras.
Durante aproximadamente 55 minutos, Xoán Curiel vai cantar a Xela Arias, Antonio Fraguas, Carvalho Calero, Florencio Delgado Gurriarán e algunhas/uns outras/os autoras/es das Nosas Letras. Xoán fará un percorrido musical para falar das súas obras e das súas experiencias vitais, co obxectivo de achegar estas figuras ao público asistente.
Se desexas participar, xa podes reservar de balde as túas entradas enviando unha mensaxe de correo electrónico ao enderezo bibliotecadebrion@briondixital.org indicando: o nome dun adulto, un teléfono de contacto e o número de localidades que precises. Date presa, porque o aforo é limitado.
 
 

 

xoves, 28 de abril de 2022

"Los días luminosos" de Zsuzsa Bánk, nova lectura do club

Tras ler e comentar “A lúa da colleira”, unha novela da galega Anxos Sumai, trasladámonos agora ata unha localidade do sur de Alemaña onde tres raparigos gozan da amizade e dos días luminosos tentando deixar atrás a súa historia familiar, marcada pola dor e a perda. Vinte anos máis tarde, convertidos xa en estudantes universitarios, deciden viaxar xuntos a Roma, onde o seu vínculo vese sometido ás duras probas do amor, a traizón e a culpabilidade.

Este é o argumento que Zsuzsa Bánk presenta en “Los días luminosos”, unha novela publicada pola editorial Acantilado que versa sobre a amizade e a traizón, o amor e a mentira, os segredos do pasado e os decisivos instantes que poden cambiar as nosas vidas. Unha nova lectura para o club na que descubriremos o estilo desta escritora e xornalista alemá de orixe Húngaro. 

Para comentala, reunirémonos o vindeiro 23 de maio; como de costume, na biblioteca municipal.

martes, 5 de abril de 2022

Horario da biblioteca municipal en Semana Santa

Con motivo da celebración da Semana Santa, a biblioteca municipal modificará o seu horario de atención ao público nas seguintes datas:

Días 11 e 12 de abril, a biblioteca abrirá:

- Mañás: de 10:00 a 13:00 h.
- Tardes: de 16:00 a 20:00 h. 

Días 13, 14, 15 e 16 de abril:

A biblioteca permanecerá PECHADA.

Día 18 de abril:

- Mañá: de 09:00 a 14:00 h.

 

A partir do martes, 19 de abril, retomaremos o horario habitual.

Desculpen as molestias e moitas grazas.

sábado, 2 de abril de 2022

Abril, mes do libro e a lectura

O 23 de abril celebramos o "Día do libro e dos dereitos de autor", unha efeméride impulsada dende 1995 pola Unesco coa intención de homenaxear o libro e a lectura e fomentar o respecto pola importante achega social e cultural dos autores.

Coincidindo coa data do falecemento en 1616 de Cervantes, Shakespeare e coa festa de Sant Jordi en Cataluña, o 23 de abril é a gran celebración do libro, das librarías e bibliotecas, da promoción da lectura, da tradución e do respecto á propiedade intelectual.

A B.P.M. de Brión desexa conmemorar esta efeméride tan especial con toda a cidadanía a través dunha programación especial de actividades nas que destacan un espectáculo de narración oral, unha presentación bibliográfica, unha pequena homenaxe a Isaac Díaz Pardo a través dos libros, unha solta de libros, así coma varias propostas e contidos virtuais a través das redes sociais da biblioteca. Se queres coñecelas con máis detalles, continúa lendo.

“Aprendendo a querer” con Trinketrinke Teatro

Os ratos e ratiñas de Lonxedetodo saben da importancia de tratárense os uns aos outros con respecto,
coidado e cariño. Saben que isto é fundamental para teren unha boa saúde afectiva e para establecer cos demais relacións afectivas sas, arredándose de relacións de dominio, dependencia ou abuso. E hai contos que nos axudan a identificar unhas e outras.

Baixo esta premisa, a compañía TrinkeTrinke Teatro presentará en Brión un espectáculo de narración oral destinado a crianzas de entre 4 e 10 anos de idade. Un serán contacontos que se celebrará o venres 22 de abril ás 18:00 h. na Sala municipal de Exposicións (Casa da Cultura).

A entrada será de balde ata completar aforo. Se desexas reservar unha butaca, xa podes facelo enviando unha mensaxe de correo ao enderezo electrónico bibliotecadebrion@briondixital.org. Nela só deberás indicar o nome dun adulto, un número telefónico de contacto e a cantidade de localidades a reservar.

Presentación do libro "Sobrevivindo" de Arantza Portabales

En abril, retomamos as presentacións bibliográficas, unha actividade que botábamos en falla e que regresará a Brión no mes do libro e a lectura.
 
Nesta ocasión o encontro literario programado achegará ata Brión o último libro da recoñecida autora Arantza Portabales que presentará na Sala Municipal de Exposicións a nova versión ampliada de "Sobrevivindo", unha obra publicada pola Editorial Galaxia en 2022 que xa vai pola súa 2ª edición.

O serán literario celebrarase o venres 22 de abril ás 20:30 h. no mencionado espazo, localizado na planta baixa da Casa da Cultura de Brión. Ademais da autora, o acto contará coa presencia de Mercedes Corbillón da coñecida libraría "Cronopios". No evento colaboran  Galaxia e  libraría Mainomen

Homenaxe a Isaac Díaz Pardo a través da arte e a lectura

En colaboración co artista brionés Fran Lareo, a biblioteca municipal realizará unha pequena homenaxe a Isaac Díaz Pardo cunha exposición bibliográfica vertebrada arredor dunha peza artística de Fran Lareo inspirada na figura do intelectual galeguista, pintor, ceramista, deseñador, editor e empresario compostelán. A mostra exhibirase na biblioteca dende o día 20 de abril.

“Colle o teu libro e corre”: Solta de libros

Tralas experiencias moi positivas de “Libros para sermos libres” (en colaboración coa Deputación da Coruña) en 2018, “Libros libres” en 2019 e “Libros desconfinados” en 2021, iniciativas coas que se repartimos entre a cidadanía de xeito totalmente gratuíto varios centos de exemplares para fomentar a lectura, a biblioteca municipal retoma unha vez máis esta actividade. Baixo a denominación “Colle o teu libro e corre”, agasallaremos á cidadanía de Brión cun libro a escoller en calquera dos dous puntos de recollida que habilitaremos para a ocasión.

O día 22 de abril, a entrada da Sala Municipal de Exposicións (Casa da Cultura) acollerá un punto de recollida de 10:00 a 13:00 h. Pola tarde, de 16:00 a 22:00 h., as usuarias e os usuarios da biblioteca municipal poderán retirar exemplares nun punto que se atopará na entrada do centro. O sábado 23 de abril volveremos atopar o punto de recollida na biblioteca municipal en horario de 9:00 a 13:30 h.

Por mor da situación sanitaria, cando nos acheguemos aos puntos de solta de libros, deberemos respectar todas as medidas de prevención establecidas para evitar a transmisión da COVID-19: desinfección de mans con xel hidroalcólico nos expendedores habilitados, uso de máscara facial en interiores, distancia interpersoal e consulta dos fondos da exposición de xeito individual (salvo grupos de persoas que convivan).

Os libros da nosa vida | #librosdanosavida

Unha vez máis, lanzamos esta proposta a través do Facebook (@bibliotecadebrion) e do Twitter (@bibliobrion) para que todas e todos compartades coa etiqueta #librosdanosavida lecturas que vos marcaron nalgún momento e queirades recomendar ao resto de usuarias e usuarios da biblioteca.

Tan sinxelo como propoñer un título, o autor, unha edición concreta (se considerades que é significativo) e porque se converteu nunha lectura importante para vós nun momento determinado da vosa vida. Podedes facelo a través dun texto, con imaxes ou gravando un breve vídeo.

Libros con cara (-tula) | #librosconcaratula

Neste caso convidámosvos a partillar as cubertas dun libro (ou varios) que esteades a ler ou rematarades de facelo recentemente. Pode ser unha lectura en formato papel ou dixital, novo ou vello, novela ou conto, poesía ou teatro, biografía, álbum infantil, revista, etc. Tomade unha foto e compartídea connosco no Facebook ou no Twitter da biblioteca, coa etiqueta #librosconcaratula.

Un libro que vos fai compañía no tempo de lecer, unha obra que vos axuda a aprender, a viaxe e coñecer mundo neste tempo de incerteza. Non hai limite...

Solta de libros virtuais e recomendacións de lectura

Ademais da solta de libros dos días 22 e 23, entre o 18 e o 30 de abril compartiremos recursos culturais e informativos para a lectura e o lecer. Recomendaremos libros e outros contidos dixitais accesibles en préstamo dende as plataformas GaliciaLe-eBiblio e ebibliodacoruna. Tamén libros dixitais (e-books) de libre distribución para incorporar á vosa biblioteca.

Animádevos a participar e feliz Día do Libro 2022!

venres, 18 de marzo de 2022

"A lúa da colleita" de Anxos Sumai, vindeira lectura do club

Despois de ler e comentar “El asedio de Troya” do autor sueco-grego Theodor Kallifatides, retornamos á literatura en lingua galega para achegarnos á obra de Anxos Sumai. Da autora nada en Catoira escollemos a novela “A lúa da colleita”, publicada en 2013 pola editorial Galaxia.
Unha obra galardoada co Premio García Barros no 2013, o Premio da Crítica Española en 2014 e co Premio da AELG á mellor obra narrativa nese mesmo ano. Nesta novela Anxos sitúanos en agosto de 1992, cando unha decisión precipitada, case inconsciente, leva á protagonista da novela a pasar as vacacións nun apartamento nunha praia da ría de Arousa. Necesita descansar pero, ademais do descanso buscado, atoparase con sombras e con estrañas revelacións que a farán dubidar de si mesma. A súa especial percepción do tempo e do espazo, a súa forma de sentir, que ás veces é unha auténtica tormenta de emocións, farán que cuestione se todo o que a rodea -e incluso ela mesma- é realidade ou é pura ficción.
Unha obra que comentaremos na vindeira reunión do club de lectura, o luns 20 de abril.

sábado, 5 de marzo de 2022

5 de marzo, celebramos o Día do Cómic

Dende hai moito tempo o sector da banda deseñada reivindica un maior recoñecemento e visibilidade por parte da sociedade e as institucións públicas, e unha medida esencial para lograr isto é a instauración oficial dun Día do Cómic.

Unha data para reivindicar este xénero que moitos consideran como a novena arte. Por iso que, hoxe celebramos por vez primeira o "Día do Cómic". Dende a biblioteca, aproveitamos para convidarte a descubrir a nosa sección especializada en BD, onde atoparás, entre outros moitos títulos, unha novela gráfica moi recomendable: "Los surcos del azar" de Paco Roca. Unha obra publicada orixinalmente en 2013 por Astiberri, recoñecida con numerosos premios, que reconstrúe a historia da "Nueve", a división do Exército da Francia Libre formada por republicanos españois durante a Segunda Guerra Mundial. Unha historia sobre a Guerra Civil española que nos fará reflexionar sobre a confrontación bélica e as súas terribles consecuencias.

Achégate á biblioteca e redescubre a nosa Comiteca. Nela atoparás unha colección de cómics e novela gráfica organizada por xéneros e temáticas, tanto para crianzas como para adultos. Infórmate no punto de servizo e comeza a ler BD.

venres, 4 de marzo de 2022

8M Día Internacional da Muller

A biblioteca municipal, xunto co resto de departamentos e servizos do Concello de Brión, súmase un ano máis ás celebracións do 8 de marzo, Día Internacional da Muller; unha data para dar visibilidade, reivindicar e defender uns principios e uns valores que desexamos permanezan vixentes durante todo o ano.

“Igualdade de xénero hoxe para un mañá sostible”, un lema para o 8M deste ano.

Citando as reflexións publicadas por Nacións Unidas, potenciar a igualdade de xénero no contexto da crise climática e reducir o risco de desastres é un dos maiores desafíos mundiais do século XXI. Cada vez é máis evidente que as mulleres son máis vulnerables ao impacto do cambio climático que os homes, xa que constitúen a maioría da poboación pobre do mundo e son máis dependentes dos recursos naturais afectados por esta ameaza ambiental.

Asemade, as mulleres e as nenas son líderes eficaces e poderosas que impulsan o cambio para lograr a mitigación e a adaptación climáticas. Implícanse en iniciativas sostibles en todo o mundo e a súa participación e liderado xeran unha acción polo clima máis eficaz.

Para lograr o desenvolvemento sostible e unha maior igualdade de xénero é esencial seguir explorando as oportunidades, así como as limitacións, para permitir que as mulleres e as nenas teñan voz e participen en igualdade na toma de decisións relacionadas co cambio climático. Sen igualdade de xénero hoxe, o futuro sostible e igualitario seguirá estando fóra do noso alcance.

Programación conmemorativa especial en Brión

Dende o Concello de Brión, presentamos unha programación especial co gallo desta data, con varias actividades e eventos que van celebrarse na semana do 8M: 

  • Martes 8 | Concentración e manifesto: Ás 12:00h. na Praza do Concello. De noite iluminación das fachadas da casa do Concello e de Cultura.
  • Xoves 10 | Talleres de autodefensa con Cristy Tojo : Ás 18:30h. no Centro Social Polivalente.
  • Venres 11 | Proxección "A Poeta Analfabeta" e recital de Luz Fandiño: Ás 20:30h. no Centro Social Polivalente

Para obter máis información ou inscribirse nestas actividades, podemos dirixirnos ao enderezo de correo electrónico, bea@briondixital.org ou contactar co teléfono, 981 50 99 10.

Un contacontos na biblioteca, exposición bibliográfica e “Mulleres de Brión” Vol. 2

Pola súa banda, a biblioteca municipal vai programar o espectáculo “A carteira de Aguasclaras” de Carmen Domech. Unha actividade, destinada a público infantil de 4 a 11 anos de idade que se celebrará o vindeiro 11 de marzo ás 17:30 h. na Sala Municipal de Exposicións (Casa da Cultura). A entrada será libre ata completar o aforo do local. Só será preciso reservar cadeira enviando unha mensaxe ao enderezo de correo bibliotecadebrion@briondixital.org. (Consignando o nome dun adulto, un número telefónico de contacto e o número de butacas que se precisen) .

O centro tamén vai dar visibilidade nun dos seus expositores, e durante toda a vindeira semana, a unha selección de novidades bibliográficas que forman parte do punto de interese sobre igualdade que ten a biblioteca. Asemade, a través das redes sociais e baixo o lema de “Mulleres de Brión... onte, hoxe, sempre”, partillaremos novas, curiosidades, recomendacións de lectura e imaxes do noso arquivo arredor do 8M Día Internacional da Muller.

Porque dende o Concello de Brión desexamos reivindicar a necesidade de ligar forzas entre todas e todos para que calquera persoa poida ocupar na sociedade o lugar que lle corresponde por dereito propio, que non é outro que aquel que desexen, independentemente do xénero.

martes, 1 de marzo de 2022

Un contacontos de Carmen Domech para celebrar o 8M

Co gallo da celebración do 8M, Día Internacional da Muller, a BPM de Brión convídanos a participar nun serán contacontos a cargo de Carmen Domech que presentará en Brión o seu espectáculo "A carteira de Augasclaras".

Dende a vila de Augasclaras, chega a carteira para repartir o correo ás crianzas de Brión. É unha correspondencia moi especial, que trata de concienciar a nenas e nenos contra a violencia de xénero. E faino con narración oral, monicreques e xogos de imaxes inspirados nos álbums ilustrados “Artur e Clementina” e “Rosa Caramelo” de Adela Turín e “Eu vou contigo” de Raquel Díaz.

 A actividade, destinada a público infantil de 4 a 11 anos de idade, celebrarase o vindeiro 11 de marzo ás 17:30 h. na Sala Municipal de Exposicións (Casa da Cultura). A entrada será libre ata completar o aforo do local. Só será preciso reservar cadeira enviando unha mensaxe ao enderezo de correo bibliotecadebrion@briondixital.org. (Consignando o nome dun adulto, un número telefónico de contacto e o número de butacas que se precisen) .


 

martes, 22 de febreiro de 2022

"El asedio de Troya" de Theodor Kallifatides, nova lectura do club

Despois de rematar co libro de Marilar Aleixandre, afrontamos unha nova lectura no club, agora da man do autor grego-sueco Theodor Kallifatides. Un escritor que nos resulta familiar por ter lido hai algún tempo “Otra vida por vivir”, unha novela que, precisamente, antecede na súa bibliografía a “El asedio de Troya”, o título que agora escollemos para ler e comentar.
“El asedio de Troya” é, por dicilo rápido, unha reformulación da “Ilíada”, na versión que unha profesora conta aos seus alumnos en 1945, para entretelos dos bombardeos ingleses sobre a súa pequena vila grega, invadida dende 1941 polos alemáns. É tamén a obra na que regresa á escrita en lingua sueca despois de empregar o grego na súa anterior obra, aínda que mantendo o vínculo co país heleno na temática.
Theodor Kallifatides é un autor sueco de orixe grega. Cando crianza, trasladouse cos seus pais a Atenas en 1956 e logo emigrou a Suecia en 1964 na procura de traballo. Alí adaptouse ao xeito de vida nórdico e axiña dominou o sueco, o que lle permitiu retomar os seus estudos e converterse nun afamado escritor na lingua escandinava traducido a máis de vinte idiomas.

mércores, 16 de febreiro de 2022

A biblioteca municipal convídanos a dous contacontos para celebrar o Día de Rosalía

O 23 de febreiro celebramos o Día de Rosalía, unha data significativa na que conmemoramos a unha das figuras máis senlleiras das nosas Letras. Para festexalo, a biblioteca pública municipal desexa convidar a toda a cidadanía a asistir a dúas actividades de animación que se van a celebrar na semana en que se cumpre o 185 aniversario do nacemento da autora.

Trátase de dous espectáculos de narración oral que se celebrarán os días 21 e 23 de febreiro ás 18:00 h. na Sala Municipal de Exposicións (Casa da Cultura de Brión) con entrada de balde e reserva previa de localidades a través do enderezo de correo electrónico: bibliotecadebrion@briondixital.org. 

Luns 21, “A miña historia” de Trécola Teatro

A programación comeza o luns co espectáculo do grupo Trécola Teatro “A miña historia”, un contacontos destinado a público familiar de 6 anos en diante. Neste serán de animación coñeceremos mellor a vida e obra da autora a través de Andrea, unha xornalista saída do S. XIX que sabe todo de Rosalía de Castro. 

Mércores 23, “Os poderes de Rosalía" con Pedro Brandariz

O Día de Rosalía visitará Brión o actor Pedro Brandariz que presentará o espectáculo “Os poderes de Rosalía”. Un serán de narración oral destinado a público maior de 4 anos de idade que se celebrará no mencionado espazo ás 18:00 h.

A que esperas, xa podemos reservar gratuitamente as localidades para asistir a ámbolos dous espectáculos enviando unha mensaxe ao correo electrónico mencionado máis arriba indicando: o nome e apelidos dun adulto, un teléfono de contacto e o número de cadeiras que desexemos ocupar.

luns, 14 de febreiro de 2022

23 de febreiro, Día de Rosalía

O día 23 de Febreiro celebramos o Día de Rosalía, unha data moi especial na que conmemoramos a vida e obra dunha das figuras máis senlleiras das nosas Letras. Para festexalo, o Concello de Brión ten preparada unha programación con diferentes actividades que terán lugar ao longo da semana na que se cumpre 185 anos do nacemento da autora.

23 de febreiro, Día de Rosalía

Rosalía de Castro naceu o 23 de febreiro de 1837 en Santiago, e a súa vida sempre estivo intimamente ligada coa comarca compostelá, incluídas as Terras da Maía e Brión. O poema “Campanas de Bastavales” relembra sentimentos de saudade que trasladan a Rosalía ata parroquia brionesa. Por iso, o adro da igrexa de S. Xiao de Bastavales servirá de escenario para rendelle unha homenaxe moi especial que celebraremos o mércores 23 ás 12:00 h. consistente nun acto, alborada e ofrenda floral con lectura de versos da autora.
Ao longo da xornada, e en diferentes establecementos hostaleiros de Brión, a clientela poderá gozar do “Caldo de Gloria” e do “Café con verso”. A primeira é unha iniciativa que homenaxea a Rosalía ofrecendo coas consumicións, a xeito de petisco, un tradicional caldo galego. Asemade, os cafés da xornada irán acompañados dun poema da autora.
Pola tarde, a biblioteca municipal de Brión convidará a todas as familias a participar nun contacontos a cargo de Pedro Brandariz que presentará na Sala Municipal de Exposicións ás 18:00 h. “O poder de Rosalía”. Un espectáculo de narración oral especialmente dirixido ás crianzas a partires de 4 anos de idade.

Máis contacontos na biblioteca

Ademais do espectáculo de Pedro Brandariz, a biblioteca municipal organizará outro espectáculo de animación con Rosalía como protagonista. Será o luns 21 de febreiro ás 18:00 h. na mencionada Sala Municipal. Neste caso, será Trémola Teatro o grupo encargado de presentar o espectáculo “A miña historia”, un serán onde coñeceremos mellor a vida e obra da autora a través de Andrea, unha xornalista saída do S. XIX que sabe todo de Rosalía de Castro. Unha actividade de aproximadamente 45 min. de duración recomendada para persoas maiores de 6 anos.
Para asistir aos contacontos será preciso inscrición prevía de balde. As localidades poderán reservarse solicitándoo ao enderezo de correo electrónico bibliotecadebrion@briondixital.com, consignando o nome e apelidos, un teléfono de contacto e o número de persoas que desexen asistir. O aforo estará limitado, polo que se atenderán as solicitudes por estrita orde de inscrición.

Concerto “Amada Rosalía” de Xoán Eiriz

O xoves 24 de febreiro, o músico e cantante Xoán Eiriz presentará en Brión o seu novo disco e fará un pequeno percorrido por algunhas das cancións máis significativas dos seus traballos anteriores. O recital celebrarase no Centro Social Polivalente ás 20:30 h. A entrada será de balde con reserva previa a través da plataforma billeteira.concellodebrion.gal. As localidades poderán solicitarse a partir do martes 15 de febreiro. 
 
Cartel coa programación conmemorativa do Día de Rosalía en Brión.

 

xoves, 3 de febreiro de 2022

Club de lectura: As malas mulleres de Marilar Aleixandre

Despois de ler "Un caballero en Moscú", a cativadora  novela do autor estadounidense Amor Towles, abandonamos con pena o hotel Metropol de Moscú para regresar á terriña e achegarnos á obra máis recente dunha autora por todas/os coñecida, Marilar Aleixandre.

Para facelo escollemos "As malas mulleres" unha novela recoñecida en 2020 co Premio Blanco Amor. A través das súas páxinas, asistimos a unha dura e apaixonante viaxe polo tramo final do século XIX, nunha historia a varias voces, a de Sisca, de 15 anos, presa por non seren as mulleres donas do seu corpo; as de mulleres como Concepción Arenal, visitadora de prisións; e Juana de Vega, cruciais para entendermos a nosa historia e as do “mudo coro das malas mulleres”, que entoa prantos sobre encontros cos predadores sexuais.

A novela está escrita contra a desmemoria, para recuperar a memoria das excluídas, reclusas no cárcere da Galera, da Coruña, en 1863. Unha atención ás excluídas onde Arenal e Juana de Vega, traballando a prol da dignificación das persoas, foron pioneiras. Asemade é un canto ao papel dos libros e a lectura en mellorar a vida das persoas, en dar esperanza ás desesperadas.

A autora:

Nada en Madrid en 1947, é licenciada en Bioloxía e profesora de Didáctica das Ciencias na USC. Instalada en Galicia dende 1973, adoptou o galego como lingua literaria. As súas primeiras obras foron narracións dirixidas aos lectores máis novos e ao público adolescente. A novela que a deu a coñecer nun ámbito máis amplo foi "Tránsito dos gramáticos" (1993), unha orixinal intriga ambientada nunha Compostela futurista. En 1996 publicou a colección de relatos "Lobos nas illas". Con "A Compañía Clandestina de Contrapublicidade" gañou a IV edición do Premio Álvaro Cunqueiro de narrativa (1998).  Recibiu o Premio Xerais de Novela 2001 por "Teoría do Caos". Recibiu o galardón Letra E concedido pola AELG. Na Asemblea Xeral do Congreso Ibby de Literatura Infantil e Xuvenil, celebrado en setembro de 2010 en Santiago de Compostela, foi nomeada membro do Comité Executivo da organización. 

Fonte biografía: Ed. Galaxia
Imaxe autora: Wikipedia

venres, 7 de xaneiro de 2022

A biblioteca municipal reinicia os seus servizos

Despois de permanecer pechada ao público dende a tarde do 29 de decembro, a biblioteca municipal de Brión recupera os seus servizos e horarios habituais a partir do luns 10 de xaneiro.

Tras a interrupción sufrida, consecuencia dunha inundación que afectou ao depósito e baños do centro, a biblioteca abrirá de novo no seu horario habitual:

Mañás:
Luns a sábado: 9:00 – 14:00 h.

Tardes:
Luns a venres: 16:00 – 22:00 h.

Queremos pedir desculpas a todas as persoas usuarias polas molestias derivadas desta incidencia, ao tempo que agradecemos a comprensión mostrada.