Días 1 e 2 de agosto:
De 08:30 a 14:30 h.
Días 5 a 14 de agosto:
Luns a venres: de 09:00 a 14:00 h.
Do 15 de agosto ao 2 de setembro: Pechada

Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

mércores, 26 de xuño de 2019

Horario de verán da biblioteca: Mes de xullo

No mes de xullo a biblioteca municipal de Brión adapta as horas de apertura á temporada estival.
Dende o martes 2 e ata o mércores 31 de xullo, a biblioteca prestará os seus servizos no seguinte horario:

Luns a venres:
Mañás: de 08:30 a 14:30 horas.
Os sábados, a biblioteca permanecerá pechada (dende o día 29 de xuño)

O luns, 1 de xullo, o centro permanecerá aberto de 09:00 a 14:00 h.

venres, 14 de xuño de 2019

Brión celebra unha nova edición dos Encontros coa Arte, dedicados a Antón Fraguas

Comeza unha nova edición dos Encontros coa Arte de Brión, este ano dedicados ao profesor Antón Fraguas, personaxe homenaxeada no Día das Letras Galegas. Vinte e catro artistas procedentes de diferentes lugares de Galicia e o Estado español participan nestas xornadas de convivencia e difusión das artes plástica, que levan catorce anos achegando á cidadanía de Brión á pintura, ao debuxo, á fotografía e á literatura.

O programa de actividades comeza o venres 14 de xuño pola mañá coa visita aos centros escolares do concello dos artistas José A. Regidor, Frutos Casado de Lucas e José Galarzo que van impartir uns obradoiros simultáneos de acuarela, dirixidos ao alumnado do CEIP de Pedrouzos e do IES de Brión.

Pola tarde, e despois do acto oficial de benvida, os artistas afrontarán a primeira xornada de pintura do natural na contorna da Igrexa dos Ánxeles ou nos xardíns do Hotel Casa Rosalía. Unha oportunidade única para observar o traballo dos pintores e das pintoras participantes neste evento, nun auténtico obradoiro de pintura ao aire libre na fermosa contorna arquitectónica e paisaxística da parroquia de Os Ánxeles.

O mesmo venres, ás 21:00 horas, a Sala Municipal de Exposición acollerá a inauguración da mostra das obras doadas polos artistas participantes no XIII Encontro coa Arte “Lembrando a Mª Victoria Moreno, celebrado en xuño de 2018. Unha exposición que poderá visitarse durante as vindeiras semanas no mencionado espazo, situado na planta baixa da Casa da Cultura de Brión.

O sábado os artistas desprazaranse ata a Carballeira de Santa Minia, lugar onde pintarán durante toda a mañá. Asemade, neste mesmo espazo e a partir das 10:00 horas, dará comezo o III Concurso de Debuxo e Pintura rápida dirixido a rapazas e rapaces de 4 a 17 anos. Consultar as bases nesta ligazón.

Ese mesmo día, a partir das 21:00 horas e no Centro Social Polivalente, Teatro do Atlántico presenta “De abrentes e ocasos”, un recital poético-musical de poesía galega contemporánea. Participarán como intérpretes: María Barcala, Aleixandre Lago, Xulio Lago. A música correrá a cargo de Nani García. A entrada será libre ata completar aforo.

Na mañá do domingo, os Encontros rematarán por este ano cunha nova sesión de pintura do natural. Nesta ocasión, o lugar elixido para que as/os artistas trasladen as súas ferramentas de pintura e debuxo non é outro que a contorna das Torres de Altamira. Un lugar referencial da historia de Brión que os artistas inmortalizarán nos seus lenzos e coas súas cámaras.

Unha última cousa que, de seguro, interesará a todas as afeccionadas e todos os afeccionados á arte, durante as tres xornadas deste evento, a sala de exposicións municipal acollerá un Mercado da Arte. Un lugar onde as pintoras e os pintores participantes no Encontro expoñerán para venta unha selección das súas obras en diferentes formatos. O horario de apertura será:

- Venres, de 16:30 a 20:30 h.
- Sábado, de 9:30 a 14:00 h. e de 17:00 a 21:00 h.
- Domingo, de 9:30 a 14:00 h.

luns, 10 de xuño de 2019

Pakolas e as súas parábolas musicais triunfan en Brión

O pasado 31 de maio, Pakolas presentou en Brión o seu espectáculo musical “As parábolas de Pakolas”, un entretido serán de animación organizado pola biblioteca municipal e incluído dentro da programación do Maio Cultura – Letras Galegas 2019.

Paco Cerdeira interpretou en directo, na Carballeira de Santa Minia, unha escolma dos seus temas musicais para público infantil máis populares. Un recital que combinou cancións coa narración dalgunhas historias e contos que se recollen nelas; e todo cunha mensaxe final que forma no conxunto unha fermosa “parábola” musical da que aprender e na que pensar.

O concerto, que estaba previsto que se celebrara na Sala Municipal de Exposicións, executouse finalmente ao aire libre, na Carballeira de Santa Minia, diante do quiosco que fica preto da biblioteca municipal. Un cambio motivado pola excelente climatoloxía que convidou a trasladar o espectáculo ao exterior.

Arredor de 28 crianzas e 24 adultos asistiron a esta actividade que, a golpe de bises, se prolongou durante máis dunha hora. Unha clara mostra da satisfacción de pequenos e grandes con este recital pensado para toda a familia. Grazas Pakolas!

Ligazón coa galería de imaxes do espectáculo.

venres, 7 de xuño de 2019

"Un destripador de antaño y otros cuentos" de Emilia Pardo Bazán, vindeira lectura do club.

Despois de ler a obra gañadora do I Premio Laudamuco para textos teatrais, achegamos agora á narrativa dunha das grandes autoras galegas de todos os tempos. Falamos de Emilia Pardo Bazán e os seus relatos e contos literarios recompilados na obra “Un destripador de antaño y otros cuentos”, publicado por Alianza Editorial.
Unha linguaxe audaz, unhas situacións de enorme crueza que foron criticadas na época pero que co paso do tempo son percibidas, con unanimidade, como de gran expresividade lírica e valor narrativo. Uns relatos de temática variada que presentan a sordidez e o primitivismo do mundo rural, a instrumentalización das relacións familiares, a barbarie dos celos, a fugacidade dos sentimentos, etc.
Unha lectura que nos aproxima á obra de Emilia Pardo Bazán, escritora coruñesa en lingua castelá, intelectual, xornalista, crítica literaria, narradora e rexionalista galega que triunfou na literatura española como escritora e como figura pública.
Para comentala, reunirémonos o vindeiro 26 de xuño na biblioteca municipal ás 20:00 h.