Días 1 e 2 de agosto:
De 08:30 a 14:30 h.
Días 5 a 14 de agosto:
Luns a venres: de 09:00 a 14:00 h.
Do 15 de agosto ao 2 de setembro: Pechada

Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

mércores, 24 de xullo de 2019

Horario de verán da biblioteca: mes de agosto

No mes de agosto a biblioteca municipal de Brión adapta as horas de apertura á temporada estival.
Dende o xoves 1 e ata o mércores 14 de agosto, a biblioteca prestará os seus servizos no seguinte horario:
Días 1-4 de agosto: 
Luns a venres: 
Mañás: de 08:30 a 14:30 horas.

Do 5 ao 14 de agosto:
Luns a venres:
Mañás: de 09:00 a 14:00 horas.

Os sábados de agosto, a biblioteca permanecerá pechada.

Dende o día 15 de agosto e ata o 2 de setembro, o centro permanecerá pechado.

mércores, 17 de xullo de 2019

Un comezo de curso moi musical con "Radio Bulebule" e "Cantamos?"

 En setembro, a BPM de Brión convida ás/aos súas/seus usuarios/as máis pequenas/os a participar nun par de espectáculos de animación onde a protagonista volve a ser a música acompañada pola narración oral.

Co gallo da volta á escola, e para facela un pouco máis lene a todas as nenas e todos os nenos de Brión, os artistas Paco Nogueiras e Luís Vallecillo presentaran os seus espectáculos “Radio Bulebule” e “Cantamos?”, inspirados nos respectivos libros-disco do mesmo título.

O día 13 de setembro, ás 18:00 h., a Sala Municipal de Exposicións acollerá o serán de animación “Radio Bulebule” con Paco Nogueiras, inspirado no libro-disco publicado pola editorial Kalandraka e ilustrado por David Pintor. A sesión, dirixida a crianzas de 5 a 11 anos de idade, presenta unha emisora de radio moi especial. Dentro dela todo o universo é música, humor, baile e cancións.

Pero non rematará aquí a cousa, o día 20 de setembro, tamén as 18:00 h., Luís Vallecillo achegarase ata a mesma sala para sorprender ao público infantil coas divertidas cancións-conto do seu espectáculo “Cantamos?”. Se tes entre 5 e 9 anos de idade, non debes faltar a este serán cheo de divertidos números musicais de aire rock e blues en lingua galega para cantar, bailar, brincar e soñar.

Ámbolos espectáculos serán de entrada libre ata completar aforo e están patrocinados polo programa “Ler conta moito” da Rede de Bibliotecas Públicas de Galicia.

xoves, 11 de xullo de 2019

Música miuda en Brión para celebrar o verán

O día 11 de xullo, ás 12:00 h., a BPM de Brión organizou, co patrocinio do programa Ler conta moito da Rede de Bibliotecas de Galicia, a actividade “Música miúda” a cargo do artista Miguel Alonso. Un serán matinal de animación aberto a todas as nenas e a todos os nenos maiores de 3 anos de idade para celebrar a chegada do verán e das tan esperadas vacacións estivais.

Na actividade participaron arredor de 51 crianzas, moitas delas inscritas nos obradoiros Brión Verán, organizados polo Departamento de Cultura municipal. Durante aproximadamente 50 minutos gozaron dun proxecto didáctico que combinou contacontos e música.

A través das Historias de Bemol Pequeno, o espectáculo presenta conceptos básicos da música como o volume, o ton, as familias de instrumentos, as notas musicais... Cada unha delas inclúe un conto e unha canción, que se executan en directo pensado para que o público infantil participe e aprenda nun entorno lúdico.
 

venres, 5 de xullo de 2019

#hoxeleoen: buscando escenarios de lectura, concurso organizado pola Biblioteca provincial e a Sección de Turismo da Deputación da Coruña

O obxecto do concurso #hoxeleoen: buscando escenarios de lectura é a dinamización e animación á lectura e a difusión do patrimonio paisaxístico e cultural dos concellos da provincia da Coruña. Para isto a Biblioteca Provincial xunto coa Sección de Turismo da Deputación da Coruña convocan un concurso de fotografías que amosen os lugares da provincia da Coruña onde os lectores gozan dos libros e a lectura durante o verán.
Cada participante pode presentar un máximo de dúas fotografías diferentes, con lecturas tamén diferentes, a través das redes sociais Twitter, Facebook ou Instagram, ou ben a través do correo electrónico biblioteca.info@dacoruna.gal. O prazo de presentación é do 8 de xullo ó 31 de agosto.
A continuación expoñemos as condicións máis polo miúdo, e xuntamos a este correo as bases completas, o cartel e un tríptico.

Participantes

Poderán participar todas as persoas físicas, maiores de idade, usuarios ou non da Biblioteca Provincial da Deputación da Coruña. Quedan excluídas todas as persoas con calquera tipo de relación laboral coa Biblioteca Provincial e coa Sección de Turismo da Deputación da Coruña.

Formato

As fotografías deberán ser tomadas dende un lugar da provincia da Coruña, e debe aparecer nelas o libro que se está lendo. As fotografías deben ser compartidas nas redes sociais, mencionando o título do libro, o lugar onde foi tomada a fotografía e a etiqueta do concurso #hoxeleoen.
A participación poderá ser a través de Twitter, Instagram, Facebook ou correo electrónico.
Quen participe a través dunha das redes sociais, ademais deberá remitir un correo electrónico a biblioteca.info@dacoruna.gal coa fotografía participante, o título do libro, o seu nome e apelidos, teléfono, correo electrónico, enderezo postal, lugar e concello da provincia desde o cal participa e nome de usuario da rede social. As persoas que non dispoñan de redes sociais poderán participar remitindo unicamente o mencionado correo electrónico.
O formato da lectura da que están gozando os participantes pode ser calquera: en papel, en lector de libros electrónicos, tableta, ordenador, teléfono… A lectura pode ser un libro, banda deseñada, revista, audiolibro, libro electrónico…
Cada participante pode compartir un máximo de dúas fotografías, cada unha nun lugar diferente e cunha lectura distinta.

Forma de presentación

A presentación das fotografías será a través das seguintes canles:

Twitter: compartir a foto nun perfil público, indicar o lugar desde o que se toma a foto e o nome do concello, o título e autor do libro, mencionar a @bibliodacoruna e @DACTurismo e seguilos, engadir a etiqueta #hoxeleoen; e remitir o correo electrónico mencionado na base terceira a biblioteca.info@dacoruna.gal

Instagram: compartir a foto nun perfil público, indicar o lugar desde o que se toma a foto e o nome do concello, o título e autor do libro, mencionar a @bibliodicoruna e @DACTurismo e seguilos, engadir a etiqueta #hoxeleoen; e remitir o correo electrónico mencionado na base terceira a biblioteca.info@dacoruna.gal

Facebook: facer un comentario na entrada do concurso da páxina da Biblioteca ou na da Sección de Turismo da Deputación da Coruña, indicando o lugar desde o que se toma a foto e o nome do concello, o título e autor do libro, xuntando a foto; e remitir o correo electrónico mencionado na base terceira a biblioteca.info@dacoruna.gal

– Correo electrónico: enviar a foto a biblioteca.info@dacoruna.gal indicando o lugar desde o que se toma a foto e o nome do concello, o título do libro e autor do libro, e poñendo no asunto a etiqueta #hoxeleoen, ademais dos datos mencionados na base terceira.

Prazo de presentación

O prazo de presentación das fotografías é do 8 de xullo ao 31 de agosto de 2019, ambos os dous incluídos. Non entrarán no sorteo fotografías presentadas fóra deste prazo.

Premio

Establécese un único premio que se concederá por sorteo entre todas as fotografías participantes. O premio consistirá nunha viaxe cultural a unha capital europea para dúas persoas.
Os días de aproveitamento da viaxe serán concretados coa persoa gañadora unha vez concedido o premio.
A persoa que resulte galardoada no sorteo recibirá a comunicación do premio o día 9 de setembro polo mesmo medio no que participou, e/ou polos datos de contacto remitidos obrigatoriamente por correo electrónico.
Así mesmo, publicarase o gañador nas tres redes sociais mencionadas (Twitter, Instagram e Facebook) e na páxina web da Biblioteca.
Ademais, todas as persoas participantes que cumpran as bases recibirán un agasallo por correo postal.

Entrega do premio

A data do acto de entrega do premio, que terá lugar na Biblioteca da Deputación da Coruña, será anunciada xunto co nome da persoa gañadora o día 9 de setembro.
É requisito imprescindible para a aceptación do premio a recollida presencial deste no acto público que se detallará o día do anuncio do nome da persoa gañadora.

Dereitos e deberes

A participación no concurso leva aparellada a autorización para publicar as fotografías e os seus datos nos diferentes medios impresos e dixitais que utiliza a Biblioteca, incluídas as redes sociais.
As fotografías presentadas ao concurso de xeito incompleto ou que non se axusten ou incumpran as bases, así como aquelas de contido inadecuado, serán excluídas.
A participación no concurso implica a aceptación total destas bases, e que os participantes se fan responsables da autoría e contido das fotografías, que non vulnerarán os dereitos de honra, intimidade persoal / familiar e á propia imaxe de terceiros.

Fonte: Biblioteca provincial da Deputación da Coruña

Música Miúda, un espectáculo para celebrar o verán e as vacacións estivais

Para celebrar a chegada do verán e das tan esperadas vacacións estivais, a BPM de Brión convidada a todas as crianzas maiores de 3 anos de idade a participar no espectáculo musical “Música Miúda” a cargo de Miguel Alonso.
O serán de animación terá lugar o vindeiro xoves 11 de xullo ás 12:00 h. na Carballeira de Santa Minia (ou na Sala de Exposicións Municipal, dependendo do tempo atmosférico), con entrada de balde para todas e todos as nenas e nenos que desexen achegarse ata este espazo.
“Música Miúda” é un proxecto didáctico que combina contacontos e música. A través das Historias de Bemol Pequeno, preséntanse conceptos básicos da música como o volume, o ton, as familias de instrumentos, as notas musicais... Cada unha delas inclúe un conto e unha canción, que se presentan nun espectáculo en directo pensado para que o público infantil participe e aprenda nun entorno lúdico.
Unha actividade que a BPM de Brión organiza co patrocinio do programa Ler Conta Moito da Rede de Bibliotecas de Galicia.

A brionesa Mariña Souto Pazó acada un accesit no certame “Coñece o teu concello” de La Voz de Galicia

A brionesa Mariña Souto Pazó, estudante no CEIP de Pedrouzos, ven de acadar na categoría de redacción un dos accésits do concurso “Coñece o teu concello”, una iniciativa promovida polo xornal La Voz de Galicia en colaboración co Concello de Santiago e a Deputación da Coruña.
Mariña, de dez anos de idade, escribiu en dous días unha fermosa historia sobre os cabalos da Fonte de Praterías e o seu afán por converterse en unicornios. Para conseguilo, deberán visitar o lugar de Cornanda no Concello de Brión, na procura dos desexados cornos cos que acadar a súa arela.
Comenta Mariña en “La Voz de Galicia” que ultimamente na escola escribe bastante, e mesmo que goza de facelo, “aínda me gusta máis a ciencia”. A rapaza brionesa foi unha das seis premiadas neste certame do xornal La Voz, onde participaron máis de mil crianzas dos vinte e cinco concellos da contorna de Santiago. Todas e todos mostraron a súa particular visión do mundo que os rodea, dun xeito “diferente e cristalino” como comenta o delegado do mencionado xornal en Compostela, Ignacio Carballo.
O rexedor compostelán, Sánchez Bugallo, foi o encargado de pechar a entrega de premios. Non só felicitou ás gañadoras e aos gañadores, tamén a todas e a todos os participantes, a nais e pai e a mestras e mestres, “que son os que canalizan esta participación”.