Horarios de Nadal da biblioteca municipal

Como é costume no Nadal, a biblioteca pública municipal de Brión modifica o seu horario de apertura nestas datas tan sinaladas.

Do 26 ao 28 de decembro, o horario de apertura de luns a venres vai ser o habitual:
- Mañás, de 10:30 a 13:30 h.  - Tardes, de 16:30 a 21:00 h.

Do 2 ao 4 de xaneiro, o horario de apertura de luns a venres será o seguinte:
- Mañás, de 9:30 a 13:30 h. - Tardes, de 16:30 a 19:30 h.

Ademais dos días festivos, 25 de decembro, 1 e 6 de xaneiro, o centro permanecerá pechado o día 29 de decembro e o 5 de xaneiro.

Moitas grazas pola comprensión e desculpas polas molestias.
Felices festas e venturoso 2024!

Seguir lendo

"A fiestra valdeira" de Rafael Dieste, vindeira lectura o club

Despois de ler a Isabel Allende, recuperamos a un dos grande autores da nosa literatura, Rafael Dieste. O escritor de Rianxo publicou en 1929 unha das súas obras máis recoñecidas, “A fiestra valdeira”, unha comedia de ambiente mariñeiro e fonda reflexión social.

A obra, partillada en tres actos, reflicte a defensa do espírito e a cultura do país cun matiz cómico, pero que non renuncia á crítica social. Unha peza que encaixa no estilo innovador e experimental que achegou o autor á dramaturxia galega.

Don Miguel, un mariñeiro retirado, volta adiñeirado da emigración no Brasil. Encárgalle a un pintor que lle faga un retrato, no que aparece unha fiestra. No cadro vese o ambiente mariñeiro da vila, mais a súa muller prefire que apareza de fondo unha paisaxe máis señorial, coma a dos xardíns dun pazo. Ela quere renegar do pasado mariñeiro da home para aparentar riqueza a facilitar as relacións sociais da súa filla, mais don Miguel síntese orgulloso das súas orixes.

Tras esta lectura, a primeira de xénero teatral que facemos no club, realizaremos unha posta en común o vindeiro día 8 de xaneiro ás 20:30 h. Como sempre, na biblioteca municipal.

Seguir lendo

A biblioteca municipal recupera o seu funcionamento habitual

Tras a interrupción durante varias semanas dos servizos de estudo e lectura en sala por mor das obras de reforma, a biblioteca municipal recupera o funcionamento habitual. Dende hoxe, as persoas usuarias poderán facer uso das salas infantil e xeral do centro, así coma dunha das salas de estudo (a outra permanecerá temporalmente fóra de servizo)

A intervención solucionou varios problemas na cuberta do edificio e permítenos gozar dun novo baño adaptado situado no primeiro andar do edificio, entre as salas de estudo da biblioteca.

Cun investimento total de preto de 50.000 €, a obra recibiu unha subvención para o equipamento e a mellora das instalacións culturais municipais da Consellería de Cultura, Educación, Formación Profesional e Universidades dotada cun importe de 27.000€.

Lembrar tamén que, dende agora, o horario de apertura do centro vai ser, polas mañás, de 10:30 a 13:30 h. e, polas tardes, de 16:30 a 21:00 h. De luns a venres.

Seguir lendo

Continúan as obras de reforma da biblioteca municipal

Continúan as obras de reforma na biblioteca municipal, que se prolongarán durante máis tempo do previsto. A execución das tarefas vaise estender máis alá do día 9 de novembro, data de remate comunicada nun principio pola empresa que está a executar a intervención.

Polo tanto, continuaremos temporalmente sen os habituais servizos en sala (estudo, lectura, etc.). Mantense a atención presencial para devolución de materiais e préstamos baixo demanda (excepto materiais da sala infantil). Se precisas algún título, non dubides en chamar ao número de tfno. 981 50 99 69 (10:30-13:30 h. e 16:30-21:00 h., de luns a venres) ou enviarnos unha mensaxe aos correos electrónicos da biblioteca. Despois, poderás pasar a recollelo.

Tan pronto remate a reforma e acondicionamento do centro, comunicarémolo a través dos medios habituais. Unha vez máis, desculpas polas molestias e moitas grazas pola comprensión.

Seguir lendo

"Violeta" de Isabel Allende, primeira lectura da temporada do club

Iniciamos unha nova xeira do Club de lectura da biblioteca municipal. E para comezar esta nova etapa, a obra escollida para ler e por en común é “Violeta” da escritora chilena Isabel Allende.

Unha recoñecida autora que en 2022 publicou esta novela que narra a historia épica e emocionante dunha muller dende 1920, coa “gripe española” ata a pandemia de 2020. Unha vida que será moito máis que a historia dun século.

Para comentar a experiencia lectora, reunirémonos na biblioteca municipal o vindeiro 27 de novembro ás 20: 00 h.

Seguir lendo

A biblioteca municipal conmemora por adiantado o Día das Bibliotecas cos Contos de Pablísimo

O 24 de outubro celebramos o Día das Bibliotecas, unha conmemoración que baixo o lema “Tecendo comunidades”, pretende destacar o papel fundamental que desempeñan as bibliotecas na construción de ligazóns fortes dentro das nosas comunidades. Porque as bibliotecas queremos ser centros de conexión e aprendizaxe, onde as historias, as experiencias e os coñecementos son os fíos que unen aos cidadáns.

De xeito anticipado, a biblioteca municipal quixo convidar a toda a cidadanía a participar nun espectáculo de narración oral dirixido especialmente ás crianzas. Os Contos de Pablísimo achegouse a Brión para presentar “O Paroleiro”, un serán de divertidas historias a cargo de Pablo Sánchez que, como todos os seus espectáculos, tomou como base a literatura infantil a través de contos clásicos, contemporáneos, e contos de creación propia.

O contacontos comezou ás 18:00 h. e reuniu na Sala Municipal de Exposicións a 18 persoas, entre crianzas, nais e pais. Un serán de lecer no que o público se amosou moi participativo e entregado cos contos e posta en escena de Pablo.

Este espectáculo, organizado pola biblioteca municipal, contou co patrocinio do programa Ler conta moito da Rede de Bibliotecas de Galicia.

Seguir lendo

Comeza unha nova temporada do club de lectura

Trala pausa estival, regresa á biblioteca municipal o Club de lectura (adultos). Unha actividade de dinamización dirixida a maiores de 16 anos con gañas de ler e compartir experiencias lectoras con outras persoas. 

Funcionamento da actividade

Tras a lectura dunha obra literaria en lingua galega ou castelá (de xeito alternativo), realizaremos unha xuntanza na biblioteca para unha posta en común das nosas experiencias lectoras. Unhas reunións nas que, máis alá da obra literaria, os libros e a lectura serven de fío condutor para a análise e a reflexións sobre diversos temas de actualidade.

Para inscribirte no club de lectoras/es da biblioteca só é necesario que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos. Diríxete á biblioteca a través do seus correos electrónicos ou chama ao tfno. 981 50 99 69 para participar nesta actividade.

Cartel Club de lectura 23-24

 

 

 

Seguir lendo

A biblioteca municipal pecha temporalmente por obras de mellora nas instalacións

Dende o 25 de outubro e ata o 9 de novembro, está previsto que a biblioteca pública municipal permaneza pechada ao público por mor da execución dunha obra de mellora das súas instalacións. Unha intervención que realizará un melloramento da cuberta do edificio, facilitará a accesibilidade ao mesmo e dotará á biblioteca dun baño adaptado que ficará no primeiro andar.

Estas obras, que estaban pendentes da autorización de patrimonio, realizaranse coa maior dilixencia posible, evitando causar o menor prexuízo as persoas usuarias do centro. Por iso, aínda que se interromperán os servizos de sala (lectura, estudo e consulta), tentarase manter o servizo de préstamo e devolución de materiais na medida do posible. Ás persoas  que desexen retirar libros en préstamo, recomendámoslle que previamente contacten coa biblioteca (por teléfono – 981 50 99 69- ou correo electrónico) para reservar os materiais e acordar cita para a súa retirada. O horario de atención ao público será de 10:30 a 13.30 e de 16:30 a 21:00 h. (de luns a venres).

Agradecemos a comprensión da cidadanía e pedimos desculpas a todas as persoas usuarias do servizo polas molestias que poidamos ocasionar. Trátase dunha intervención que non puido programarse antes e que supón unha notable mellora nas instalacións do edificio. Calquera cambio ou novidade en relación a este tema, será informada á veciñanza a través dos medios de comunicación habituais: blog e redes sociais da biblioteca municipal.

Moitas grazas.

Seguir lendo

Celebramos o Día da Biblioteca con Os Contos de Pablísimo e "O Paroleiro"

Cada 24 de outubro celebraremos o Día das Bibliotecas. Unha data conmemorativa para trasladar á opinión pública a importancia da biblioteca como lugar de encontro dos lectores de todas as idades coa cultura, e como un instrumento de mellora da formación e a convivencia humana.

Para celebralo, uns días antes, a biblioteca municipal de Brión convídanos a participar nun serán de narración oral dirixido especialmente a crianzas con idades comprendidas entre 4 e 10 anos. Será o venres 20 de outubro cando a Sala Municipal de Exposicións (Casa da Cultura) acolla Os Contos de Pablísimo que presentará en Brión espectáculo “O Paroleiro”, un personaxe moi amigo de parolar... que gusta de laretar, enredar, falar e de contar historias e contos que leva na memoria, nas maletas, nos petos e nos zapatos.

Un contacontos a cargo de Pablo Sánchez que, como todos os seus espectáculos, toma como base a literatura infantil a través de contos clásicos, contemporáneos, e contos de creación propia. Un serán para non perdelo, que comezará puntual ás 18:00 h. Non te esquezas. O acceso e libre ata completar a capacidade da sala. Podes reservar a túa butaca neste formulario.

Este espectáculo conta co patrocinio do programa “Ler conta moito” da Rede de Bibliotecas de Galicia. 

 

 

Seguir lendo

María Antonia Cao presentou en Brión a súa última novela, Vivencias en el puente

O venres 29 de setembro, María Antonia Cao López presentou en Brión o seu último libro, “Vivencias en el puente”, unha novela con elementos autobiográficos recentemente publicada pola editorial Letrame.

Aínda que na actualidade reside en Barcelona , María Antonia naceu e pasou os seus primeiros anos na parroquia de Os Ánxeles, lugar que visita con frecuencia e onde conserva familia e numerosas amizades. Por iso, as súas ligazón afectivas con Brión son estreitas, algo que a motivou para realizar a primeira presentación da súa segunda novela en Brión.

Despois de acadar recoñecemento con “Rosas y espinas”, María Antonia regresa ás librarías con “Vivencias en el puente”, un libro onde as experiencias vitais da autora son inspiradoras dunha obra que continúa a senda iniciada coa súa anterior publicación.

Enmarcado dentro dos Encontros Literarios que organizada regularmente a biblioteca municipal, o acto do venres celebrouse na Sala Municipal de Exposicións. Nel participaron a autora, que estivo acompañada na mesa polo seu marido, José Eduardo Limiñana, e a súa amiga, Vanesa Castro, que exerceu como presentadora. María Antonia tamén contou coa colaboración de Loli Lema Carballo e Isaura Iglesias Ares. O serán literario, enormemente concorrido, tamén contou coa presenza do alcalde de Brión, Pablo Lago Sanmartín, e da concelleira María Rosa Romero.

Ao remate, moitas das persoas asistentes achegáronse ata a escritora cun exemplar do seu libro na man, aproveitando a ocasión para saúdala, felicitala e solicitar unha dedicatoria. Un libro que xa forma parte do catálogo da biblioteca municipal e se atopa a disposición de todas as lectoras e todos os lectores por cortesía de María Antonia.

 

 

Seguir lendo

A biblioteca municipal pecha con motivo da celebración da Romaría de Santa Minia

Con motivo da celebración da popular Romaría de Santa Minia, a biblioteca pública municipal pechará entre os días 25, 26 e 27 de setembro. Datas nas que a contorna do centro acollerá as diferentes actividades festivas que conforman unha das celebracións máis senlleiras da nosa bisbarra.

Pedimos desculpas polas molestias ocasionadas e convidamos a todos os usuarios a visitar a Carballeira e participar nos numerosos eventos que están programados ao longo das cinco xornadas de celebración.

 

Programación de actividades Romaría de Sta. Minia 2023

 

Seguir lendo

Aviso importante: corte eléctrico na biblioteca

O luns, 𝟏8 𝐝𝐞 𝐬𝐞𝐭𝐞𝐦𝐛𝐫𝐨, continuarán as tarefas de mantemento na instalación eléctrica do edificio da biblioteca. Por tal motivo, ao longo da mañá, 𝐬𝐮𝐟𝐫𝐢𝐫𝐞𝐦𝐨𝐬 𝐮𝐧 𝐜𝐨𝐫𝐭𝐞 𝐧𝐨 𝐬𝐮𝐛𝐦𝐢𝐧𝐢𝐬𝐭𝐫𝐨 𝐪𝐮𝐞 𝐧𝐨𝐬 𝐢𝐦𝐩𝐞𝐝𝐢𝐫𝐚́ 𝐮𝐭𝐢𝐥𝐢𝐳𝐚𝐫 𝐨𝐬 𝐞𝐪𝐮𝐢𝐩𝐚𝐦𝐞𝐧𝐭𝐨𝐬 (iluminación, wifi, computadoras...) 𝐪𝐮𝐞 𝐝𝐞𝐩𝐞𝐧𝐝𝐞𝐧 𝐝𝐚 𝐫𝐞𝐝𝐞 𝐝𝐞 𝐞𝐥𝐞𝐜𝐭𝐫𝐢𝐜𝐢𝐝𝐚𝐝𝐞 𝐩𝐚𝐫𝐚 𝐟𝐮𝐧𝐜𝐢𝐨𝐧𝐚𝐫.

Isto non impedirá que o centro manteña os seus servizos na medida do posible. As persoas que desexen facer uso das salas de estudo e lectura deberán facelo con luz natural (xanelas e lucernarios). Asemade, os servizos de consulta bibliográfica (a través do posto de servizo), préstamo e devolución de materiais permanecerán operativos.

Por todo isto, pedimos comprensión e desculpas a todas as persoas usuarias do servizo polas molestias ocasionados.

Seguir lendo

Dende o luns, a biblioteca municipal recupera o horario habitual

Dende o luns 18 de setembro, a biblioteca municipal recupera o horario de apertura de inverno. Despois da modificación do horario durante a temporada estival, o centro retomará o horario habitual:

Luns a venres:
Mañás: 09:00 a 13.30 h.
Tardes: 16:30 a 21:00 h.

Asemade, aproveitamos para lembrar que os días 25, 26 e 27 de setembro a biblioteca pechará as súas portas co gallo da celebración en Brión da Romaría de Santa Minia.

Seguir lendo

María Antonia Cao López presenta novo libro en Brión

O venres 29 de setembro retomamos os encontros literarios da biblioteca cun novo serán no que o libro e a lectura volven ser protagonistas. Nesta ocasión, a veciña de Brión María Antonia Cao López regresa a súa querida terra para presentar o seu novo libro.

Despois de acadar recoñecemento con “Rosas y espinas”, María Antonia regresa ás librarías e bibliotecas con “Vivencias en el puente”, unha novela que ven de publicar a editorial Letrame. Un libro onde as experiencias vitais da autora son inspiradoras dunha obra que continúa a senda iniciada coa súa anterior publicación.

A presentación literaria celebrarase o vindeiro 29 de setembro ás 20:30 h. na Sala Municipal de Exposicións de Brión (Casa da Cultura). Un acto ao que estamos todas e todos convidados. Nel participará a escritora, acompañada por Vanesa Castro Ramallal, que exercerá como presentadora, Loli Lema Carballo e Isaura Iglesias Ares.

 

Seguir lendo

Horario de Verán: mes de setembro

No mes de setembro a biblioteca municipal de Brión adapta as horas de apertura á tempada estival.
Dende o día 4 e ata o 15 de setembro, a biblioteca prestará os seus servizos no seguinte horario:

Luns a venres
Mañás: de 10:00 a 13:00 horas.
Tardes: de 16:00 a 19:00 horas.

O luns 18 de setembro recuperaremos o horario habitual de inverno.

Seguir lendo

Boletíns de novidades de verán da biblioteca municipal

A biblioteca municipal publica este verán novos boletíns de novidades que iremos actualizando ao longo de setembro con máis títulos. Unhas publicacións que podes consultar en liña se desexas manterte informada/o sobre as últimas incorporacións e novidades bibliográficas que atoparás na nosa colección.

Están dispoñibles dous boletíns, un coas novidades para público infantil e xuvenil e outro coas destinadas a público adulto, partillados en distintas seccións segundo presentemos obras de ficción, informativas ou banda deseñada.

Bótalle unha ollada, de seguro atoparás algún libro para ler nestas vacacións. E en setembro, máis novidades na túa biblioteca. Que pases un feliz verán cheo de boas lecturas!

Boletín adultos	Boletín infantil-xuvenil

Seguir lendo

En agosto, a biblioteca municipal pecha

Este ano, en agosto, a biblioteca municipal permanecerá pechada todo o mes. Dende o 31 de xullo e ata o 4 de setembro interromperanse os servizos bibliotecarios.

Aquelas persoas usuarias que teñen libros en préstamo, poderán devolvelos o día 4 de setembro, data na que se retomará o funcionamento habitual.

Aínda que os servizos presenciais estarán interrompidos neste período, as persoas que procuren lecturas en agosto poderán recorrer á plataforma de préstamo dixital de GaliciaLe, onde accederán a libros (e outros contidos) en formato dixital para ler nos seus dispositivos móbiles (e-readers, tabletas, teléfonos intelixentes, computadoras). Todas as persoas con carné de Rede teñen este servizo activado por defecto.

Os usuarios con carné de Rede da provincia de A Coruña, tamén poderán recorrer ao servizo de préstamo dixital de eBibliodacoruna, que ofrece a biblioteca da Deputación ás persoas usuarias da provincia. Trátase dunha plataforma gratuíta con múltiples recursos dixitais para lectura. Se aínda non a activaches, podes darte de alta aquí.

O día 4 de setembro volvemos; ata entón, un feliz verán e boas vacacións! (cheas de boas lecturas).

Seguir lendo

#HoxeEscriboEn 2023: Relatos para viaxar polos concellos da provincia da Coruña

 A Biblioteca Provincial e Turismo da Deputación da Coruña lanzan unha nova edición do concurso #HoxeEscriboEn. Porque, 93 concellos da provincia dan para moito escribir. Trátase dunha iniciativa que busca sacar á luz o noso talento creativo, ao mesmo tempo que fomentar o patrimonio dos concellos nos que vivimos.

Para participar, redacta un relato ambientado ou referido ao concello no que vives; pode estar relacionado coa historia local, con unha lenda, con unha tradición do teu concello, con un persoeiro destacado, cos valores positivos do teu concello, a riqueza natural, cultural ou medioambiental... calquera aspecto que axude a destacar o lugar no que vives.

O prazo de presentación dos textos é dende o 1 de xullo ata o 31 de agosto. Podes consultar as bases de participación premendo aquí.

Anímate a participar e presume do teu concello! 

Seguir lendo

Pakolas visita Brión coa Ramona pequena

Este mediodía, o noso amigo Pakolas encheu de música e cancións a Carballeira de Santa Minia cun esperado recital onde presentou en Brión “A Ramona pequena vai á Lúa”, un espectáculo musical baseado no seu último libro-disco publicado pola editorial Galaxia.

Pakolas, que se define a si mesmo como roqueiro e guitarrista, cativou coa súa música a un numeroso auditorio composto principalmente por público familiar. Foron os máis péquenos da casa os que gozaron en maior medida das historias da Ramona pequena, unha nena movida por constantes inquedanzas e cunha mente moi esperta; unha rapaza coa que moitas crianzas, de seguro, se identificaron.

Arredor de 115 persoas asistiron a este espectáculo musical de carácter lúdico e educativo, dirixido a crianzas de 4 a 9 anos de idade. Na actividade tamén participaron moitos dos nenos e nenas que asisten estes días ás actividades de conciliación do Concello.

Este evento, organizado pola biblioteca municipal, contou co apoio do programa Ler conta moito da Rede de Bibliotecas Públicas de Galicia.

 

Seguir lendo

Horario de verán da biblioteca: mes de xullo

No mes de xullo a biblioteca municipal de Brión adapta as horas de apertura á tempada estival.
Dende o día 3 e ata o 30, a biblioteca prestará os seus servizos no seguinte horario:

Luns a venres
Mañás: de 10:00 a 13:00 horas.
Tardes: de 16:00 a 19:00 horas.

Dende a biblioteca municipal desexámosche un verán cheo de boas lecturas.

Seguir lendo

Enquisa O valor social das bibliotecas

A Dirección Xeral de Cultura na Consellería de Cultura, Educación, Formación Profesional e Universidades, está a traballar na elaboración dun estudo titulado “O valor social das Bibliotecas”, que será un instrumento que facilitará a planificación da política bibliotecaria galega nos próximos anos.

Este estudo realízase entre a cidadanía para coñecer como se valora o servizo que ofrecen as bibliotecas públicas da Rede e como contribúen ao benestar e desenvolvemento da sociedade. Servirá para cuantificar, dar visibilidade e poñer en valor as achegas destas institucións para as persoas usuarias e para a sociedade no seu conxunto, en termos tanto económicos como de benestar colectivo.

Para materializado é necesaria a colaboración de todas as persoas usuarias das bibliotecas de Galicia. A metodoloxía para a obtención de datos será a través da realización de enquisas en liña, dirixidas tanto a persoas usuarias das bibliotecas como a persoas que habitualmente non usan este servizo. Ademais, existe a posibilidade de cubrir o cuestionario de xeito manual, nas propias bibliotecas.

Por iso, dende as bibliotecas, pedimos á cidadanía colaboración para realizar esta enquisa, á que podemos acceder a través da seguinte ligazón ou escaneando o código Qr que aparece ao pé deste artigo co teu dispositivo móbil. O prazo de recollida de datos rematará a o 31 de xullo de 2023.

 
Moitas grazas de antemán pola vosa colaboración.

 

 

Seguir lendo

A Ramona pequena vai á Lúa: Pakolas presenta en Brión o seu último espetáculo

No mes de xullo, o noso amigo Pakolas regresa a Brión para presentar un espectáculo musical baseado no seu último libro, “A Ramona pequena vai á Lúa”. Un serán onde Pakolas conta e canta a historia da Ramona pequena, unha nena movida por constantes inquedanzas cunha mente moi esperta. 

O espectáculo, dirixido a crianzas de 3 a 9 anos de idade, celebrarase o mércores 5 de xullo na Carballeira de Sta. Minia se a climatoloxía o permite (se non, informaremos dunha alternativa), comezando ás 12:00 h. e prolongándose durante aproximadamente 50 min. O acceso será libre e de balde, aínda que podes reservar cadeira no seguinte formulario. 

Un espectáculo que che propón a biblioteca municipal para celebrar que chega ao verán e as tan esperadas vacacións estivais. Un recital organizado co patrocinio do programa Ler conta moito da Rede de Bibliotecas de Galicia.

 

Seguir lendo

Encontro literario coa escritora Gisela Mato

O xoves 15 de xuño a biblioteca municipal organizou un encontro literario coa escritora Gisela Mato. Un serán onde a autora, natural de Ourense e residente en Brión, presentou a súa última publicación: “fraxilidades”, editada por Espiral Maior na súa colección de Poesía. Esta obra acadou en 2022 o XXXV Premio Nacional de Poesía Xosemaría Pérez Parallé  do Círculo Mercantil  e Industrial-Unidad de Fene.

O serán literario celebrouse na Sala Municipal de Exposicións (Casa da Cultura de Brión), comezando ás 20 h., prolongándose aproximadamente durante 45 min. A autora estivo acompañada polo recoñecido escritor e editor Eduardo Estévez, quen foi o encargado de abrir o acto.

Ao remate, Gisela e Eduardo conversaron co público asistente e a autora asinou numerosos exemplares da súa ultima obra e do seu anterior libro de relatos “Cuerpos ajenos”, publicado pola editorial Tandaia en 2020.

Seguir lendo

Melloras para a Biblioteca Pública Municipal cun investimento de preto de 50.000 euros

A Xunta de Galicia, a través da Consellería de Cultura, Educación, Formación Profesional e Universidades, ven de conceder ao Concello de Brión unha subvención por un importe de 27.000 € para o equipamento e a mellora das instalacións da Biblioteca Municipal.

Unha axuda que, sumada á achega económica do Concello, permitirá construír un baño accesible no primeiro andar do edificio onde se atopan as salas principais da biblioteca. Un aseo que substituirá ás actuais instalacións situadas no soto do edificio, incómodas e que non garanten as condicións de accesibilidade requiridas.

A intervención non rematará aí. Tamén se realizará un arranxo en dous dos lucernarios do teito da edificación, para acabar con molestas filtracións de auga de choiva, e eliminarase un chanzo da entrada interior do local para facilitar a accesibilidade ao mesmo.

A execución das obras está previsto que remate antes de finais de outubro deste ano. Dende a biblioteca municipal, manteremos informada á veciñanza sobre a evolución desta intervención que provocará unha interrupción temporal nos servizos bibliotecarios presenciais.

Seguir lendo

Encontro literario en Brión con Gisela Mato

O xoves 15 de xuño celebraremos en Brión un encontro literario con Gisela Mato para coñecer a súa última publicación: “fraxilidades”. Un libro de poemas editado por Espiral Maior que en 2022 recibiu o XXXV Premio Nacional de Poesía  Xosemaría Pérez Parallé, convocado polo Círculo Mercantil e Industrial-Unidade de Fene co apoio do Concello fenés.

Gisela atesoura varios recoñecementos no seu currículo como escritora. En 1996 acadou o Premio de Poesía do Centenario do IES Otero Pedrayo. En 2015 tamén obtivo o VIII Premio de Relatos “Rosa de Cen Follas”. No ano 2020 publicou unha colección de relatos co título de “Cuerpos ajenos”, unha obra que poderás atopar na biblioteca municipal.

O evento literario comezará ás 20:00 h. e celebrarase na Sala Municipal de Exposicións (Casa da Cultura de Brión). O acceso será libre ata completar a capacidade de local. Na presentación Gisela estará acompañada por Eduardo Estévez.

 

 

Seguir lendo