LEMBRANZA PECHE DA BIBLIOTECA
Con motivo da Romaría de Santa Minia 2019,
a biblioteca pechará os días 26, 27 e 28 de setembro.
Desculpen as molestias.

Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

mércores, 28 de novembro de 2018

A Deputación da Coruña convoca o V Concurso de guións contra a violencia de xénero

Encadradas dentro das actividades a prol da igualdade e contra a violencia de xénero, a Deputación da Coruña convocou o V Concurso de guións contra a violencia de xénero.
O obxecto deste certame consiste na elaboración dun guión dunha curtametraxe a través do cal se convide á reflexión, concienciación, sensibilización e prevención da violencia de xénero. Con esta actividade preténdese que a poboación adolescente xere debate, mobilización e fomente a súa creatividade ao tempo que reflexiona sobre a importancia de combater e denunciar a violencia de xénero.
Citando palabras dos organizadores , o principal obxecto do concurso é procurar a participación e fomentar o compromiso da comunidade educativa como piar necesario para guiar e orientar no proceso de creación. Paralelamente o concurso tamén promove o traballo en equipo, así como a aprendizaxe do medio audiovisual.

Quen pode participar?

Mozas e mozos con idades comprendidas entre os 12 e 18 anos que cursen Educación Secundaria Obrigatoria, Bacharelato, Formación Profesional ou outro tipo de estudos análogos, de calquera nacionalidade, que se presenten individualmente ou preferentemente en grupo (máximo 6 integrantes), supervisados e baixo a titoría de persoal docente do centro público de estudos ao que se adscribe, pertencentes á provincia da Coruña, e apoiados pola Dirección do centro.
Cada participante poderá presentar un único guión orixinal e inédito, non premiado con anterioridade. Non poderán participar as persoas gañadoras en edicións anteriores.
Premiarase ao mellor guión, no que se combinen aptitudes artísticas e creativas do alumnado na creación dun guión imaxinativo, con impacto social e potencialidade audiovisual, orixinal e non publicado que en tan só uns minutos pretenda concienciar a poboación, en xeral, dos motivos polos que debemos xuntar os nosos esforzos para combater a violencia de xénero e erradicar esta lacra social. Terase en conta a viabilidade da posterior produción audiovisual.

Premios

Outorgarase un único premio ao guión gañador que consistirá nun curso práctico de realización de curtametraxes, no que se producirá un audiovisual con base no guión gañador que se adaptará segundo as necesidades e onde as persoas participantes poderán ser partícipes e protagonistas en todo o proceso.
Así mesmo, outorgarase un premio en metálico de 4.000 euros ao centro educativo que supervise ao guión gañador.
Poden consultar as bases da convocatoria para o ano 2018 na seguinte ligazón:

Prazo de presentación de instancias ata: 26 decembro de 2018.

Os traballos entregaranse en formato dixital e papel seguindo as indicacións das bases do enlace:

xoves, 22 de novembro de 2018

"Tú no eres como otras madres" de Angelika Schrobsdorff , vindeira lectura do club

Despois de ler e comentar os relatos que conforman “Sapos e sereas”, o primeiro libro de Ana Cabaleiro publicado en 2017 pola editorial Galaxia, continuamos cunha nova lectura.
Nesta ocasión a autora escollida é a escritora alemá Angelika Schrobsdorff que en 1992 presentou a novela “Tú no eres como otras madres”. Unha intensa narración que reconstrúe a vida real e inconformista de súa nai, unha muller berlinesa nada no berce dunha familia burguesa de orixe xudía, liberada dos prexuízos da súa época e da súa clase social. A obra somérxenos por completo nunha vida extraordinaria que nos fai participes dunha época concreta e convulsa da historia recente de Europa.
Unha obra de grande éxito en Alemaña, traducida a varios idiomas, que propoñemos como próxima lectura do club. Para comentala reunirémonos na biblioteca o vindeiro mércores 12 de decembro.

mércores, 7 de novembro de 2018

Iniciamos nova temporada do Club de lectura

Iniciamos nova xeira no club de lectura da man da escritora galega Ana Cabaleiro, unha autora recentemente galardoada co Premio García Barros concedido polo Concello de A Estrada. A escritora publicou en 2017 “Sapos e sereas” (Galaxia) o libro escollido para iniciar as lecturas da nova temporada do club.
“Sapos e sereas” constitúe a estrea literaria de Ana Cabaleiro, xornalista de profesión e escritora novel. Neste libro de relatos, a autora dálle a volta a moitas historias que pensabamos que só podían ser narradas dun xeito, pero que grazas a súa ollada, debemos de cuestionar. A narradora tenta (xa veremos se o consigue) darlle a volta a moitos mitos e tópicos sobre as mulleres, recollidos na narrativa oral, popular e mitolóxica tradicionalmente patriarcal.
Tras a súa lectura realizaremos a posta en común da obra o vindeiro día 21 de novembro. Como de costume a xuntanza será na biblioteca pública municipal de Brión.