Lembranza importante: peche temporal da biblioteca municipal

Informamos ás nosas usuarias e usuarios que, debido a unha inundación na planta baixa do edificio, vémonos na obriga pechar a biblioteca municipal temporalmente por necesidades do servizo ata solucionar os problemas ocasionados por este fatídico incidente. Tan axiña como sexa posible, retomaremos o funcionamento habitual do centro.

Cando isto suceda, informaremos á veciñanza a través deste mesmo medio. Mentres tanto, as persoas que desexen devolver préstamos domiciliarios poderán facelo na caixa habilitada para tal fin no recibidor da biblioteca. A porta permanecerá aberta no horario habitual da biblioteca, que ata o día 7 de xaneiro é de 10:00 a 13:00 h. e de 16:00 a 20:00 h. (luns a venres).

Grazas pola comprensión e desculpas polas molestias ocasionadas.

Seguir lendo

Horario de Nadal da biblioteca

Como é costume no Nadal, a biblioteca pública municipal de Brión vai modificar o seu horario de apertura nestas datas tan sinaladas. A entrada en vigor dos cambios horarios está prevista para o día 21 de decembro e estenderase ata o 7 de xaneiro:

Do 21 ao 26 de decembro, o horario de apertura de luns a venres vai ser:

- Mañás, de 9:00 a 14:00 h.
- Tardes, pechada

 Do 27 de decembro ao 6 de xaneiro, o horario de apertura de luns a venres será o seguinte:

- Mañás, de 10:00 a 13:00 h.
- Tardes, de 16:00 a 20:00 h.

Ademais dos días festivos, 25 de decembro, 1 e 6 de xaneiro, o centro permanecerá pechado os días 24 e 31 de decembro e 5 de xaneiro.

Moitas grazas e desculpen as molestias.
FELICES FESTAS E VENTUROSO 20212!

Seguir lendo

Brión acolleu a presentación do libro “Rosas y espinas” de María Antonia Cao López

A brionesa de Os Ánxeles residente en Barcelona, María Antonia Cao, presentou o xoves 16 de decembro en Brión “Rosas y espinas”, a súa primeira novela publicada pola editorial Letrame. María estivo arroupada por familiares, amigos e unha numerosa veciñanza que acudiu ao evento para coñecer a obra coa que debuta como escritora.

O acto contou coa presenza do alcalde de Brión, Pablo Lago Sanmartín, e da concelleira María Rosa Romero. O rexedor foi o encargado de iniciar o serán literario e, no seu discurso de presentación, destacou as ligazóns que unen a María Antonia con Brión, transmitíndolle á escritora o apoio incondicional de todos os presentes e desexándolle unha longa traxectoria na súa nova faceta como escritora. 

Acompañada na mesa polo seu esposo, José Eduardo Limiñana, e a súa amiga, Vanesa Castro, a autora lembrou emocionada a forte ligazón emocional que a une con Brión, un vínculo inquebrantable a pesares da distancia que separa a Cidade Condal, onde reside na actualidade, da súa parroquia natal de Os Ánxeles, lugar onde transcorreron os seus primeiros anos de vida.

Ao remate do acto, moitas das persoas asistentes achegáronse ata a escritora cun exemplar do seu libro na man, aproveitando a ocasión para saúdala, felicitala e solicitar unha dedicatoria. Un libro que xa forma parte do catálogo da biblioteca municipal e se atopa a disposición de todas as lectoras e todos os lectores por cortesía de María Antonia.

Seguir lendo

Club de lectura: "As ramonas" de Ana Cabaleiro

Despois da paréntese na actividade por mor da pandemia, regresa o club de lectura á biblioteca municipal. A lectura escollida para iniciar esta temporada  é “As ramonas”, una novela de Ana Cabaleiro publicada pola editorial Galaxia.

Nela a autora presenta a Mona Otero, unha muller loitadora e soñadora que persegue con ansia, e mesmo con desesperación, a súa meta de triunfar no mundo da arte. A protagonista, sancionada coa perda do carné de conducir, non pode dispoñer de coche propio, polo que depende doutras persoas para desprazarse. Toda a historia que se narra en “As ramonas” emana do interior de sucesivos vehículos desde os que a protagonista nos vai amosando un rosario de factores que delimitan a súa existencia: a competitividade, a autoestima, os odios, a pobreza, a familia, o abandono, as aparencias, a falsidade do éxito, a dignidade.

A autora:

Ana Cabaleiro é unha xornalista e escritora galega nada en Silleda. Colabora en "Sermos Galiza" e no "Boletín Galego de Literatura". É membro do grupo de escritura "Versos soltos". Traballou no campo da discapacidade intelectual e no da cooperación ao desenvolvemento. Tamén traballou no gabinete de comunicación da Deputación de Pontevedra. En febreiro de 2017 publicou o seu primeiro libro de relatos, "Sapos e sereas", co que quixo chamar a atención sobre o absurdo dos estereotipos de xénero a través de relatos postos en feminino e dirixidos a unha hipotética lectora, nos que pon en cuestión o modo en que se contou a historia da muller. En 2018 gañou o "Premio García Barros" coa novela que estamos a ler.

Fonte biografía: Wikipedia
Imaxe autora: De Ogalego.gal - Obra propia

Seguir lendo