"El club de los mentirosos" de Mary Karr, vindeira lectura do club

Iniciamos unha nova lectura no club da man da escritora norteamericana Mary Karr, autora da novela “El club de los mentirosos” (1995), editada en España por Periférica & Errata Naturae en 2017.

Unha obra autobiográfica ambientada nunha localidade petroleira do leste de Texas, onde nos presenta uns personaxes tan singulares como divertidos: un pai bebedor, unha irmá que con doce anos plántalle cara a un shériff, unha nai cunha infinidade de matrimonios ás súas costas. Precisamente, será a nai, ese personaxe marabilloso, quen se converterá ao longo do libro na clave desta gran historia.

Éxito de vendas e crítica nos Estados Unidos, esta novela presenta un relato dunha infancia fóra do común, ambientado nos anos sesenta, tremendamente conmovedor pero desprovisto de sentimentalismos. Unha historia que imos descubrir para logo comentar na vindeira reunión do club.

Xuntarémonos para facelo o vindeiro 24 de abril ás 20:00 h. na biblioteca municipal.

Seguir lendo

Buscando a Rosalía en Brión con Raquel Queizás

Para conmemorar o Día de Rosalía e o 8M Día da Muller, a biblioteca municipal convidou ás súas usuarias e aos seus usuarios de tres anos en diante a participar no contacontos “Buscando a Rosalía”, un serán de animación a cargo de Raquel Queizás.
A detective Queliña atopa unha vella maleta, dentro hai follas escritas con versos, uns zapatos pequenos, un pano branco... Investigando e xogando descubre quen é a dona da maleta, Rosalía de Castro, a nosa gran poeta.
Na sesión de narración oral, que tivo lugar o luns 11 de marzo ás 18:00 h., participaron unhas 25 persoas, entre crianzas e acompañantes adultos. Un público que gozou do bo facer da animadora e desfrutou cunha historia que reivindica a figura dunha das autoras máis destacada das nosas letras, comprometida socialmente e muller adiantada ao seu tempo.

Seguir lendo

8M, Día da muller: unha data e uns valores para reivindicar todo o ano

Para conmemorar o 8 de marzo, data na que celebramos o Día Internacional da Muller, o Concello de Brión convida a toda a cidadanía a participar nunha concentración no exterior do Centro Social Polivalente, este venres ás 12 do mediodía.

Un acto para dar visibilidade e reivindicar os valores que soportan esta conmemoración que celebramos a nivel internacional. Un día para normalizar o resto do ano a participación social igualitaria da muller e o seu desenvolvemento integro como persoa.

O lugar escollido para facelo non é casual. Alí medra a figueira que en 2018 se converteu en símbolo das “mulleres medrando como árbores”; un slogan recuperado para esta ocasión que representa unha mensaxe de apoio as a todas as mulleres, para que se desenvolvan fortes, autónomas, ceibes e sen medo.

Asemade, dende a biblioteca municipal, convidamos a todas as usuarias e todos os usuarios do servizo a visitar o punto permanente de igualdade e deixar a súa mensaxe de apoio no muro da igualdade que o acompaña.

Seguir lendo