Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

sábado, 17 de decembro de 2016

Horario de apertura da biblioteca durante o Nadal

A biblioteca pública municipal de Brión vai modificar o seu horario de apertura nestas datas tan sinaladas. Ademais da festividade do día 6 de xaneiro, o centro permanecerá pechado os sábados 24 e 31 de decembro e 7 de xaneiro.
 
Entre os días 22 de decembro e ata o 5 de xaneiro, o horario de apertura será como segue:

     - Mañás, de 10:00 a 13:30 h.
     - Tardes, de 16:00 a 20:00 h.
 
 Moitas grazas e desculpen as molestias.

FELICES FESTAS E VENTUROSO 2017!!

xoves, 15 de decembro de 2016

"Esplendor de Portugal" de António Lobo Antunes, vindeira lectura do club

Dende México damos un salto á outra veira do océano para acadar os cais lisboetas, onde desembarcamos na cidade de Pessoa na procura doutra destacada figura das letras portuguesas contemporáneas, o escritor António Lobo Antunes.
Xunto a José Saramago, Lobo Antunes é o outro gran autor portugués do S. XX, eterno candidato ao Nobel, que algún día, de seguro, acadará. En “Esplendor de Portugal”, a vindeira novela que imos ler no club, presenta a unha familia portuguesa composta por Isilda, a nai, que resiste illada na Angola post-descolonización; e os tres irmáns, Ruy, Clarisse e Carlos, que regresaron a unha metrópole á que non pertencen e que alimentan os seus odios e resentimentos mutuos.

Ficha do libro:


Título:  Esplendor de Portugal
Autor: António Lobo Antunes
Editorial: Madrid : Siruela, 2002
Descrición física: 393 p. ; 22 cm.

Materias:
Novela da vida cotiá, novela social e política


 

O escritor Eduardo Rojas participa na xuntanza do Club de lectura

Se na anterior reunión do club de lectura contamos coa presenza de Manuel Iglesias Turnes para comentar a súa última novela, nesta ocasión visitou a biblioteca municipal de Brión o autor mexicano afincado en Galicia Eduardo Rojas Rebolledo, que nos acompañou o pasado mércores, 14 de decembro, para charlar sobre a súa obra “La mujer ladrillo”.
Editada polo Fondo de Cultura Económica, a novela narra a historia de Milagro, unha muller que naceu cunha discapacidade severa nunha vila da rexión de Baja California. Segundo nos presenta a propia editorial, a trama, en harmonía co personaxe, posúe unha estrutura circular, o lector inicia e termina o seu percorrido co recordo da protagonista asasinada polo asfalto baixo a follaxe; é, sobre todo, nas páxinas intermedias onde o lector descubrirá poderosas estampas que descobren os momentos máis esenciais da narración. Instantes que, polas súas imaxes, provocan no que cruza as súas páxinas incomodidade, proído.
Eduardo tivo a xentileza de asistir á xuntanza e comentar connosco a lectura en común que fixemos os integrantes do club. Unha oportunidade única e irrepetible para coñecer de primeira man o proceso creativo dunha novela moi recomendable, chea de lirismo e imaxes poéticas que espertan as emocións do lector.
Dixo o escritor Alfredo Conde que “Eduardo Rojas Rebolledo escribe límpido e pulido, diáfano como o aire da Baixa California, o que te leva dende o mar por unha estrada á que os cactos lle cobren a carreira”. Unha prosa que convida a ler de vagar, gozando das evocadoras imaxes que nos trasladan aos territorios da memoria do propio autor.

Eduardo Rojas naceu na cidade de México en 1970. Estudou a licenciatura en Historia na Facultad de Filosofía y Letras, da Universidad Nacional Autónoma de México. É fundador de revista “Epitafios”, da cal foi coordinador editorial ata 1994. En 1996 foi nomeado codirector do suplemento "Revista Mexicana de Cultura", do xornal El Nacional; colaborou en “Excélsior”, El Nacional e nas revistas “Tierra Adentro” e “Etcétera”. En 1991 obtivo mención honorífica no Concurso “Punto de Partida”, polo fragmento da súa novela inédita “A doble llave”. De 1994 a 1995 foi bolseiro do “Instituto Nacional de Bellas Artes” no xénero de novela e, en 1995, obtivo a bolsa do “Fondo Nacional para la Cultura y las Artes para Jóvenes Creadores”. Actualmente está afincado na Galicia, onde cursou estudos de posgrao na Universidade de Santiago de Compostela.
Fonte: Ed. FCE

Eduardo na BPM de Brión con varias das integrantes do Club de lectura.

xoves, 1 de decembro de 2016

Unha xuntanza do Club de lectura moi especial

O mércores 30 de novembro celebramos unha xuntanza moi especial do club de lectura. Despois de ler a novela “Que non tea aten”, publicada este ano en Edicións Xerais de Galicia, tivemos o gran privilexio de contar coa presenza do seu autor, Manuel Iglesias Turnes na reunión de posta en común desta experiencia lectora compartida.
Manuel acudiu amablemente ata a biblioteca pública de Brión para participar xunto cos integrantes do Club de lectura nun serán moi ameno e enriquecedor. Nel falounos da súa última creación literaria, unha obra que xa vai pola segunda edición. Ao longo da sesión tocáronse diferentes asuntos relacionados coa temática da obra, os personaxes e as súas relacións, o entorno social e laboral no que viven, etc.
Que non te aten” narra a historia de Marcos, un mozo que vive no rural galego e traballa na explotación leiteira familiar de cincocentas cabezas situada en Cabanas, unha parroquia aparentemente deserta de xente que non queda moi lonxe de Santiago (e de Brión). As relacións familiares e de parella, as rivalidades cunha granxa veciña, a situación social e económica do agro son temas que trata a novela e que resultan de vixente actualidade.
Unha lectura moi recomendable, diáfana e directa, escrita con devoción por alguén que coñece moi de preto a realidade que narra páxina tras páxina, que non é outra que a dun rural galego que loita por non desaparecer sendo fiel a si mesmo, axudado de modernos métodos empresariais que nada teñen que envexar aos nosos veciños europeos máis avanzados.
O amor, a familia, o traballo, a papel da muller, a violencia de xénero, etc... están presentes nunha novela que esperamos presentar aos veciños de Brión en poucos meses. Mentres, só queda agradecer a Manuel Iglesias Turnes a súa accesibilidade e amabilidade connosco; tamén o seu valioso tempo, que non dubidou en dedicarnos na reunión do club deste mércores. 

Manuel Iglesias Turnes (Cabanas, A Baña, 1950) desenvolveu a súa actividade profesional vinculada ao mundo da gandería, concretamente relacionada coa mellora xenética da raza Frisona, na variedade Holstein. Primeiro presidente da Fundación Afonso Eáns do Val do Barcala. Como narrador publicou as novelas "As rapazas de Xan" (Xerais, 2012) e "Que non te aten" (Xerais, 2016).   -Fonte: Ed. Xerais-

mércores, 30 de novembro de 2016

III edición dun premio literario para novos escritores de Galicia e do Norte de Portugal

Froito da favorable acollida de anos anteriores, vense de convocar a terceira edición do premio literario Nortear - Novos Escritores Norte de Portugal – Galicia, que é unha iniciativa conxunta da Direção Regional de Cultura do Norte (Portugal), da Consellería de Cultura, Educación e Ordenación Universitaria – Xunta de Galicia (España) e da Agrupación Europea de Cooperación Territorial Galicia - Norte de Portugal.

Dende este centro, coa finalidade de procurar a maior divulgación posible ao evento, achegamos as bases que regulan a convocatoria de dito premio para o ano 2017, e que poderán consultarse premendo na ligazón á pé de páxina.

Adiantamos que no certame poderán participar as persoas nacidas na Rexión Norte de Portugal ou Galicia, con idades comprendidas entre os 16 e os 36 anos. Serán admitidas a concurso todas as obras que teñan data de entrada no seguinte enderezo ata o 30 de abril de 2017:

Agrupación Europea de cooperación Territorial Galicia-Norte de Portugal
Edificio CETMAR, Rúa Eduardo Cabello, s/n
36208 Bouzas-Vigo

xoves, 10 de novembro de 2016

O club de lectura inicia temporada con "Que non te aten" de Manuel Iglesias Turnes

Iniciamos unha temporada máis do club de lectura da biblioteca pública municipal, con novas lecturas compartidas e xuntanzas para por en común as nosas experiencias lectoras. Nesta ocasión, o libro escollido para comezar é “Que non te aten”, segunda novela do escritor Manuel Iglesias Turnes.
Tras ler a súa anterior obra, “As rapazas de Xan”, na que recuperaba de forma conmovedora a memoria dunha aldea galega dos anos cincuenta do século XX, propoñémonos agora coñecer a historia de Marcos, un mozo que traballa nunha pequena explotación leiteira de cincocentas cabezas que a súa familia rexenta en Cabanas, unha parroquia do Concello da Baña.
Unha historia arredor da vida cotiá dunha familia galega que vive e traballa no noso agro; un espazo próximo e recoñecible, cada vez máis ameazado por un xeito de vida máis urbano e globalizado. Para comentar esta lectura, xuntarémonos o mércores 30 de novembro. Como de costume ás 20:30 h. na biblioteca municipal.

luns, 24 de outubro de 2016

Celebramos o Día da Biblioteca con Caxoto e os seus "Contos de medo que deixan durmir"

Caxoto Contacontos visitou esta tarde a biblioteca municipal de Brión cos seus “Contos de medo que deixan durmir” na equipaxe. Un espectáculo de animación dirixido a nenos e nenas de entre 4 e 8 anos de idade que durante 60 min. divertiu por igual a pequenos e grandes.
O serán conta contos celebrouse ás 18:00 h. na sala infantil da biblioteca, un espazo que se fixo pequeno ante unha afluencia de nenos e pais como hai tempo non se vía. Máis de 50 nenos e nenas participaron na sesión de animación, sen contar aos adultos, que na súa maioría tiveron que esperar na sala principal ao completarse o aforo da sección infantil.
Co tema do medo como protagonista, Caxoto combinou no espectáculo narración, música e xogo, interactuando en todo momento co público para converter os temores dos pequenos en algo do que rirse e co que divertirse. Todo grazas a fantasía dos contos e a imaxinación dos espectadores.
Unha actividade coa que a BPM de Brión se une á celebración do Día da Biblioteca, unha efeméride que quere trasladar á opinión pública a importancia das bibliotecas como punto de encontro de lectores de todas as idades coa cultura, e coma un instrumento de mellora da formación e convivencia. A sesión conta contos contou co apoio do programa “Ler conta moito” da Rede de Bibliotecas Públicas de Galicia. 


mércores, 19 de outubro de 2016

O "Observatorio de la Lectura y el Libro" lanza una campaña para homenaxear as bibliotecas

O luns 24 de outubro celebramos o Día da Biblioteca. Con tal motivo, dende o “Observatorio de la Lectura y el Libro”, pertencente á “Subdirección General de Promoción del Libro, la Lectura y las Letras Españolas del Ministerio de Educación, Cultura y Deporte” propóñenche participar na campaña “Bibliotízate” que podes seguir no witter co hashtag #bibliotízate dende o 19 de outubro ata o vindeiro día 24. 
A proposta é ben sinxela: convidar aos usuarios do Twitter a que conten que biblioteca os ten “hipnotizados” e por que. Se desexas participar, só deberás enviar un chío á conta do “Observatorio de la Lectura y el Libro” (@observalibro) coa etiqueta #bibliotízate incluíndo o nome da biblioteca e a localidade onde se atopa, así como a razón pola que exerce unha forza tan especial sobre ti. Dende esta institución recompilarán todas as mensaxes para coñecer cal é a biblioteca que máis seduce aos participantes na campaña e entre os usuarios que a mencionaran, o observatorio realizará un sorteo do que sairá un gañador que levará un lote de libros.
Os detalles da campaña e as bases podes consultalas na seguinte ligazón.

sábado, 15 de outubro de 2016

O sábado 22 de outubro, comeza o Club Camaleón

O Camaleón da biblioteca pública de Brión regresa á sala infantil para reunirse unha vez ao mes cos seus amigos. Durante a súa ausencia, Paco Papán viaxou por todo o mundo e leu centos de libros na procura de milleiros de historias que contar a todos os nenos e a todas as nenas de 3 a 8 anos de idade que queiran formar parte do club.
Historias que Paco desexa compartir cos seus amigos e amigas nunha actividade de animación á lectura consistente en conta contos, xogos, concursos... e algunha que outra sorpresa. Para facelo, o club Camaleón reunirase un sábado ao mes a partires da 12:00 h., durante aproximadamente 60 min.
A actividade constará de dous grupos: un conformado por nenos/as de 3 e 4 anos de idade que se reunirán o segundo sábado do mes e outro integrado por nenos/as de 5 a 8 anos que será convocado o último sábado. Para formar parte do club, os únicos requisitos son a idade, participar na actividade acompañados dun adulto e inscribirse na biblioteca sen custo algún, pois a actividade é de balde.
O sábado 22 de outubro arrinca a nova temporada do camaleón, cunha primeira xuntanza na que serán convocados os participantes con idades comprendidas entre os 5 e os 8 anos. O sábado 12 de novembro realizarase a segunda reunión, dirixida aos nenos e nenas de 3 e 4 anos. A partir de entón, continuarán as sesións coa regularidade comentada (segundo e último sábado do mes, dependendo do grupo). Por suposto, os integrantes de cada grupo serán informados previamente ás xuntanzas cunha comunicación a través do correo electrónico dos pais.

venres, 23 de setembro de 2016

A biblioteca municipal pecha por Santa Minia

Con motivo da celebración da popular Romaría de Santa Minia, a biblioteca pública municipal pechará os días 26 e 27 de setembro.
Pedimos desculpas polas molestias ocasionadas e convidamos a todos os usuarios a visitar a Carballeira e participar das numerosas actividades que están programadas ao longo das tres xornadas de celebración.

xoves, 22 de setembro de 2016

Celebra connosco o 24 de outubro, Día das Bibliotecas

O día 24 de outubro celebramos o Día das Bibliotecas, unha conmemoración impulsada dende 1997 pola “Asociación Española de Amigos del Libro Infantil y Juvenil”, e que no noso país se dedica especialmente ao público infantil e mozo. Unha iniciativa na procura de trasladar á opinión pública a importancia das bibliotecas como punto de encontro de lectores de todas as idades coa cultura, e coma un instrumento de mellora da formación e convivencia.
Nesta data tan especial, a B.P.M. de Brión quere convidarte a un entretido serán con Caxoto Contacontos que presentará na sala infantil da biblioteca “Contos de medo que deixan durmir”, un espectáculo dirixido a nenos e nenas de entre 4 e 8 anos de idade. A hora de comezo da sesión será ás seis da tarde.
O conta contos é de balde e non fai falla inscrición previa. Aínda que, si es usuario habitual da biblioteca, podes comunicar a túa asistencia de cara a prever un número aproximado de participantes. A actividade está organizada pola Biblioteca Pública Municipal de Brión co patrocinio do programa “Ler conta moito” da Rede de Bibliotecas Públicas de Galicia. 


mércores, 21 de setembro de 2016

Inscríbete xa no Club Camaleón!

O camaleón que habita na biblioteca vive rodeado de centos de libros, cheos de milleiros de historias que quere compartir cos seus amigos e amigas. Se queres coñecer a Paco Papán, o camaleón da BPM de Brión, e formar parte da súa cuadrilla, a que esperas? Únete xa ao seu club!
 Unha actividade de animación á lectura da que podes formar parte se tés entre 3 e 8 anos de idade e vés acompañado dun adulto. O segundo sábado de cada mes, de 12:00 a 13:00 horas, os nenos e nenas inscritos participarán en diferentes e divertidas actividades como xogos, conta contos, obradoiros, etc. que se celebrarán na sala infantil da BPM de Brión. A actividade é totalmente de balde.
Se estás interesado/a en participar, chama ao número de teléfono 981509969 ou contacta co correo electrónico da biblioteca.  Pide máis información sobre a actividade ou solicita a alta no club. 


luns, 19 de setembro de 2016

Día Internacional da Bibliodiversidade

O “Observatorio de la Lectura y el Libro”, pertencente á “Subdirección General de Promoción del Libro, la Lectura y las Letras Españolas” do Ministerio de Educación, Cultura y Deporte, ven de lanzar unha campaña que se chama 'Úneche al reto B' e que pode seguirse en Twitter co hashtag #únetealretoB dende hoxe, 19 de setembro, ata o próximo 25 de setembro.
A intención desta iniciativa, que dende a biblioteca queremos difundir entre todos os nosos usuarios e todas as nosas usuarias, é unirnos á celebración, o vindeiro 21 de setembro, do Día B, do “Día Internacional da Bibliodiversidade” cunha iniciativa para facer da bibliodiversidade unha realidade cada vez máis visible.
Para iso, o “Observatorio de la Lectura y el Libro” elaborou unha pequena declaración a favor dun mundo máis bibliodiverso e o “Reto B” que consiste en lograr que o maior número de xente posible adhírase ela. Para participar só pedimos que a xente difunda dita declaración utilizando o hashtag #únetealretoB para que chegue a moitas, moitas persoas. Persoas que quizais, grazas a este pequeno xesto, descubran a importancia da diversidade no mundo da lectura, ou persoas que, como moitos de nós, no noso día a día facemos o posible por facer dela algo máis habitual.
Entre todos os chíos ou rechíos que inclúan a etiqueta #únetealretoB e a declaración, o Observatorio fará un sorteo do que sairá un gañador que recibirá un lote de libros caracterizados por ser “bibliodiversos”. Tedes toda a información sobre a campaña #únetealretoB na seguinte ligazón.

luns, 18 de xullo de 2016

Horario de verán da biblioteca: meses de agosto e setembro

Nos meses de agosto e setembro a biblioteca municipal de Brión adapta as horas de apertura á tempada estival.
Dende o luns día 1 e ata o venres 12 de agosto, a biblioteca prestará os seus servizos no seguinte horario:
Luns a venres:
Mañás: de 09:00 a 14:00 horas.
Tardes: Pechada
Sábados: Pechada.


Do 15 de agosto ao 4 de setembro a biblioteca permanecerá pechada.

Do luns 5 ao venres 9 de setembro, a biblioteca municipal abrirá no seguinte horario:

Luns a venres:
Mañás: de 09:00 a 14:00 horas.
Tardes: Pechada
Sábados: Pechada

Dende o luns 12 de setembro a biblioteca retomará o seu horario habitual:
Luns a venres: de 10:00 a 13:00 h. e de 16:00 a 22:00 h.
Sábados: de 09:00 a 14:00 h.

CALENDARIO:

mércores, 13 de xullo de 2016

A biblioteca da Deputación da Coruña proponche un concurso de fotografía para este verán

A biblioteca da Deputación da Coruña proponche para este verán un concurso de fotografía relacionado coa lectura:
#BDconMiLibroyMiSombrilla
"Buscando escenarios de lectura" (4ª Ed.)
,
que quere que compartas co resto de usuarios a través das redes sociais unha foto co teu lugar favorito da provincia de A Coruña para gozar dunha boa lectura. 

Como participar neste certame:

-No Instagram: subir a fotografía e no pé de foto, mencionar a conta da Biblioteca (@bibliodicoruna), o lugar e engadir a etiqueta do concurso que corresponda:
 #BDconMiLibroyMiSombrilla.
-No Twitter: mencionar a conta da Biblioteca (@Bibliodacoruna), indicar o lugar seleccionado, engadir a fotografía e a etiqueta do concurso: #BDconMiLibroyMiSombrilla.
-No Facebook: deixar un comentario coa etiqueta que corresponda #BDconMiLibroyMiSombrilla na entrada do concurso e engadira fotografía coa que ides a participar.
-Para os concursantes que non teñan ningunha das redes sociais anteriores, tamén se pode  achegar por correo electrónico ao enderezo: biblioteca.info@dacoruna.gal a fotografía co título correspondente, poñendo no asunto da mensaxe: #BDconMiLibroyMiSombrilla

O dia 31 de agosto finalizará o prazo e o día 2 de setembro os organizadores levarán a cabo un sorteo entre todos os participantes, escollendo dúas fotografías, ás que se lle fará entrega de cadanseu agasallo da Biblioteca que consistirán en:

1. Un lote de produtos promocionais da Biblioteca da Deputación da Coruña, no que se inclúe un lote de libros do premio "Luis Ksado" que edita a Deputación da Coruña.
2. Un gravado de edición limitada serigrafía de Asun Parrilla e Elena García Blázquez.
3.Un agasallo institucional da Deputación da Coruña, de pezas de Olería de Buño.

Nota 1: Non é preciso ser socio da Biblioteca para poder participar.
Nota 2: Aínda que non apareza na imaxe deberá indicarse o título da obra que se vaia ler
Nota 3: Debe indicarse tamén o lugar da provincia onde foi tomada a fotografía.
Nota 4: A participación neste concurso obriga ao autor a aceptar estas bases e a dar permiso á Biblioteca da Deputación para publicar as fotografías presentadas nos medios impresos ou electrónicos que considere oportunos, tanto para a súa promoción e exposición durante o transcurso do concurso, como á finalización deste.

martes, 12 de xullo de 2016

Pasamento do escritor Agustín Fernández Paz

O escritor Agustín Fernández Paz finou aos 69 anos de idade esta pasada madrugada. Mestre de profesión, exerceu o seu oficio durante máis de 30 anos en centros de educación primaria e secundaria. Paralelamente, converteuse nun prolífico e recoñecido autor especializado en literatura infantil e xuvenil, non só en Galicia, tamén a nivel nacional e internacional.
Con máis de cincuenta títulos nados da súa pluma, Agustín recibiu numerosos recoñecementos e galardóns. Foi premio Lazarillo, Edebé Xuvenil, Barco de Vapor, Merlín, protagonista Jove, Edebé Infantil, Rañolas, Raíña Lupa, Martiño Sarmiento, Xosé Neira Vilas ou o premio Trasalba.
Como mestre e pedagogo, Agustín redactou numerosos traballos sobre a normalización lingüística no ensino, a didáctica da lingua, a promoción da lectura, a literatura infantil ou a introdución dos medios de comunicación nas aulas.
Unha obra que permanece, un autor que perdurará na memoria de milleiros de lectores de todas as idades que nalgún momento se achegaron a algún dos numerosos e populares títulos que escribiu.
Dende a biblioteca municipal de Brión queremos lembrar máis que nunca o seu legado e a súa figura. Unha obra que enriqueceu como poucas as nosas letras; unha persoa honesta e un escritor xeneroso comprometido coa nosa lingua e a nosa cultura.

A nosa homenaxe a través dunha exposición - escolma bibliográfica de obras do autor.

 

sábado, 25 de xuño de 2016

Horarios de verán da biblioteca: mes de xullo

No mes de xullo a biblioteca municipal de Brión adapta as horas de apertura á tempada estival.
Dende o luns día 4 e ata o venres 29, a biblioteca prestará os seus servizos no seguinte horario:
Luns a venres:
Mañás: de 10:00 a 13:30 horas.
Tardes: de 16:00 a 20:00 horas.

Os sábados, a biblioteca permanecerá pechada. (Dende o sábado día 2 de xullo)

martes, 14 de xuño de 2016

"A vitoria do perdedor" de Carlos G. Reigosa, nova lectura do club

A Galicia da posguerra é o escenario no que se sitúa a nosa vindeira historia, unha lectura coa que pecharemos temporada antes do descanso estival. “A vitoria do perdedor” de Carlos G. Reigosa é unha novela que nos narra as vicisitudes de Arcadio Macías, perdedor dunha guerra que prepara a súa marcha fóra de España.
A represión non cesa, pero esta situación desatará a súa rebeldía e impediralle fuxir. Convértese nun combatente solitario e vingador que cambiará a realidade dunha bisbarra. Unha novela ambientada a finais da década de 1940, coas guerrillas anti-franquistas, a vinganza e a violencia que esta xera como protagonistas.
Un libro que comentaremos na vindeira xuntanza do club, o xoves 7 de xullo.

martes, 31 de maio de 2016

En xuño, nova xuntanza do Club Camaleón

O xoves 2 xuño, Paco Papán convoca outra xuntanza de todas as súas amigas e todos os seus amigos do Club Camaleón. A partires das 18:00 h., na sala infantil da biblioteca, estades todas/os invitados a participar nun novo serán lúdico dirixido a nenos de 3 a 8 anos de idade acompañados dun adulto.
Se estás interesada/o en participar, diríxete a biblioteca municipal ou chama ao teléfono 981 50 99 69 en horario de tarde (de 16 a 22 h.) para inscribirte e pasalo ben. Se xa o fixeches, revisa a caixa de entrada do teu correo electrónico.

sábado, 28 de maio de 2016

Titereficcións presentou na Feira do Libro de Brión "Chove!"

A XXVI Feira do Libro-Maio Cultura de Brión chega ao seu fin. Tras case un mes de actividades para celebrar o Día das Letras Galegas, dedicado este ano ao escritor Manuel María, pecha esta programación cultural coa actuación de Titereficciós que presentaron diante dos nenos/as a Escola Infantil Municipal o espectáculo “Chove!”. 
A actividade celebrouse no Centro Social Polivalente ás 10:30 h., e consistiu nunha función teatral feita especialmente para a primeira infancia respectando os seus estímulos, tempos e xeitos de asimilación, duración e achegamento aos elementos empregados na representación.

xoves, 26 de maio de 2016

"Babacontos con Manuel María" na biblioteca da man de Larraitz Urruzola

O xoves 26 de maio, Larraitz Urruzola visitou a biblioteca municipal de Brión para presentar o espectáculo “Babacontos con Manuel María”. Unha actividade de animación especialmente dirixida a nenos e nenas de entre 4 e 12 anos de idade. O serán iniciouse pasadas ás 18:00 h. na sala infantil da biblioteca pública brionesa, cunha duración aproximada de 50 min.
Diante dun auditorio de aproximadamente 22 persoas, entre nenos e adultos acompañantes, Larraitz, empregando as ferramentas da narración oral tradicionais, presentou algunhas das poesías de “Os soños na gaiola” de Manuel María; e o conto “O bigote de Mimí” do mesmo autor.
Esta proposta lúdica, que conta co apoio do programa “Ler conta moito” da Rede de Bibliotecas de Galicia, formou parte da máis ampla programación da XXVI Feira do Libro-Maio Cultural, un conxunto de actividades organizadas dende a Casa da Cultura e a biblioteca pública do Concello de Brión que ao longo de maio celebra o mes das nosas Letras, lembrando ao escritor chairego Manuel María. 



luns, 23 de maio de 2016

O Coelliño Branco visita a Feira do Libro de Brión

Trinke Trinke teatro presentou no Centro Social Polivalente o espectáculo “O coelliño branco”, dirixido ao alumnado de Educación Infantil do CEIP de Pedrouzos e das Escolas de Luaña, Os Ánxeles e Bastavales.
As funcións celebráronse, unha ás 10:30 h. (CEIP de Pedrouzos) e outra ás 12:15 h. (Escolas unitarias), cunha mestura de cancións, números de maxia e o famoso conto dramatizado do simpático coelliño que contou coa colaboración de nenos e adultos presentes.
A actividade integrase na máis ampla programación da XXVI Feira do Libro-Maio Cultural de Brión, que celebra no mes das nosas Letras a figura e obra do escritor Manuel María. 


venres, 20 de maio de 2016

Gran festa das Letras na Carballeira en homenaxe a “Manuel María”

O venres, 20 de maio, a Carballeira de Santa Minia acolleu unha gran festa dedicada ao escritor chairego Manuel María, autor homenaxeado no Día das Letras Galegas deste ano. Un evento que reuniu no emblemático espazo brionés a case 700 alumnos e alumnas das escolas unitarias do Concello, do CEIP de Pedrouzos e do IES de Brión.
O serán cultural, organizado polo CEIP de Pedrouzos coa colaboración do Concello de Brión, comezou arredor das once da mañá, prolongándose aproximadamente unha hora e cuarto. Un tempo no que polo escenario deste macro festival escolar pasaron pequenos, mozos e adultos para recitar poesías e interpretar cancións inspiradas nos versos de Manuel María. Tampouco faltaron a música e a danza tradicional, a cargo das agrupacións das Escolas Municipais do Concello de Brión.
Ao remate da festa, o palco de música que serviu de espazo escénico, quedou adornado con case unha vintena de orixinais e coloristas gaiolas construídas polo alumnado participante no festival. Unha instalación que fai referencia alegórica a unha das máis coñecidas obras do poeta, dramaturgo e narrador nado en Outeiro de Rei e celebrado estes días en toda Galicia.

mércores, 18 de maio de 2016

Títeres Alakrán regresa con "Os soños na gaiola" á Feira do Libro de Brión-Maio Cultural

Despois do Día das letras Galegas, continúan as actividades dedicadas a Manuel María na Feira do Libro de Brión – Maio Cultura 2016. O mércores 18 de maio, Títeres Alakrán regresou ao Centro Social Polivalente para representar unha nova función de “Os soños na gaiola”.

Esta orixinal adaptación teatral, baseada nos versos do autor chairego, foi estrada neste mesmo espazo hai pouco máis dun mes. Agora regresa, especialmente dirixida ao alumnado de 3º Ciclo de Primaria do CEIP de Pedrouzos, dentro da programación dedicada as Letras Galegas.


Tal como presentan a obra na propia compañía, “Os soños na gaiola”, ”...constitúe, ademais dunha homenaxe a Manuel María, unha forma distinta de achegar a súa palabra poética, grazas aos recursos escénicos e dramáticos que proporciona o teatro de títeres. Na obra, o propio Manuel María transfórmase en monicreque para  interactuar cos nenos” 

Xunto cos monifates do monicrequeiro, actor e escultor Borja Ínsua, na obra cabe destacar destaca a dirección de escena do dramaturgo, poeta e crítico teatral Roi Vidal  Tamén a forte presenza da música, grazas a cal poemas como "O Soñador", "Galicia" ou "O Río" convértense en cancións.

Galería de imaxes da representación

luns, 16 de maio de 2016

Luís Vallecillo e A Banda do Cuberto presentan en Brión "O bigote de Mimí"

Continúan as actividades conmemorativas do Día das Letras Galegas, que este ano se dedica a homenaxear a figura e obra do escritor chairego Manuel María. Dentro da máis ampla programación da XXVI Feira do Libro – Maio Cultural 2016, que organizan a Casa da Cultura e a biblioteca pública do Concello de Brión, na véspera do 17 de maio o artista Luís Vallecillo e a Banda do Cuberto presentaron en Brión “O Bigote de Mimí”, un espectáculo baseado na obra infantil de Manuel María.
A representación, que se celebrou no Centro Social Polivalente, estivo dirixida ao alumnado de 1º e 2º Ciclo de Educación Primaria do CEIP de Pedrouzos. Os pequenos/as estudantes do centro de Primaria asistiron a dúas funcións celebradas ás 10:30 e ás 12:15 h. O espectáculo mesturou música, monicreques e teatro para narrar a historia do gato Mimí: "quen padeceu as consecuencias dunha pésima decisión. Dende a perspectiva do gato, cando xa é vello, as cousas vense diferentes e involucrará a todo un grupo de música para que lle axude a contar polo mundo adiante as súas peripecias"


Ligazón coa galería de imaxes da función.

sábado, 14 de maio de 2016

Recital de "A Noite en Branco da Magariños" na biblioteca

A biblioteca pública municipal acolleu o venres, 13 de maio, un dos recitais de A Noite en Branco 2016, unha actividade organizada pola ESMU Magariños de Brión. Unha velada musical que busca a participación dos veciños e veciñas de Brión con concertos en distintos espazos culturais e sociais do Concello.
Un destes locais foi a biblioteca municipal, que por un momento se converteu en espazo escénico onde un grupo de novos pero talentosos intérpretes da escola executaron un concerto “Adagio”. O recital comezou ás 22:30 h. e prolongouse aproximadamente 15 min. Neste tempo, diante dun numeroso auditorio, o alumnado da escola de música interpretou cinco pezas musicais especialmente escollidas para o lugar e a ocasión. 


xoves, 12 de maio de 2016

Nova lectura para o club: "O gardián invisible" de Dolores Redondo

Despois da evocadora viaxe literaria pola Luisiana de finais do S. XIX da man de Kate Chopin, regresamos ao presente da man doutra muller, a escritora vasca de ascendencia galega Dolores Redondo. Unha autora que se deu a coñecer en 2009 coa novela que imos ler, unha obra que inicia a triloxía do Baztán.
Falamos de “El guardián invisible = O gardián invisible”, a súa segunda novela; un thriller orixinal que mestura a investigación policial co suspense e a mitoloxía das lendas navarras. Nela a inspectora Amaia Salazar, da Policía Foral navarra, investiga o asasinato dunha rapaza adolescente que aparece nunha mesta fraga. A investigación criminal conducirá a protagonista ata a súa vila natal, onde se verá obrigada a se enfrontar co seu pasado.

Conferencia de Darío Xohán Cabana no IES de Brión sobre Manuel María

O xoves 12 de maio, o escritor Darío Xohán Cabana visitou o IES de Brión, onde impartiu unha charla-coloquio sobre a figura e obra de Manuel María, autor homenaxeado no Día das Letras Galegas 2016.
A conferencia, dirixida a alumnado de bacharelato do Instituto brionés, estaba programada para o luns 9 de maio no Centro Social Polivalente; data que tivo que ser modificada a última hora. Finalmente celebrouse na aula de usos múltiples do centro de Secundaria, polo que os rapaces e rapazas non tiveron que desprazarse ata as mencionadas instalacións municipais.
Esta actividade forma parte dunha máis ampla programación dedicada as Letras Galegas 2016 organizada pola Casa da Cultura e a biblioteca pública do Concello de Brión.

mércores, 11 de maio de 2016

Serafín Marco con Manuel María na Feira do Libro-Maio Cultura de Brión

O mércores 11 de maio, o alumnado de primeiro ciclo de Secundaria do IES de Brión participou nun serán de animación a cargo de Serafín Marco. O artista recreou diante dun auditorio de case 140 persoas retallos da vida e obra de Manuel María, escritor homenaxeado este ano no Día das Letras Galegas.
Combinando narración, música e recitado de poemas cunha posta en escena orixinal e divertida, Serafín gañouse dende nada máis comezar o espectáculo aos rapaces e rapazas do Instituto brionés. O sentido do humor que caracteriza ao artista estivo presente en todo momento ao longo dos máis de 60 min. que durou a actividade.


O espectáculo, organizado pola Casa da Cultura e a biblioteca pública do Concello de Brión, forma parte dunha máis ampla programación da Feira do Libro-Maio Cultura, especialmente deseñada para conmemorar o Día das Letras Galegas 2016. 

luns, 9 de maio de 2016

Atraso da charla sobre Manuel María a cargo de Darío Xohán Cabana

A charla coloquio "Manuel María" que ía celebrarse hoxe no Centro Social Polivalente ás 11:20 h. non vai poder impartirse na data prevista. Trátase dun atraso, non dunha cancelación; Darío Xohán Cabana, que ía impartila diante dun auditorio formado por alumnado de Bacharelato do IES de Brión, non pode comparecer por un imprevisto de última hora.

A actividade trasladarase a unha nova data da que informaremos nos vindeiros días. Grazas e desculpen as molestias.

mércores, 4 de maio de 2016

Feira do Libro-Maio Cultural 2016

Tras celebrar vinte e cinco anos de vida, a Feira do Libro de Brión regresa puntual a súa cita coa promoción do libro e a lectura no mes que celebramos a gran festa das nosas Letras. Na súa 26ª edición, a Feira do Libro-Maio Cultural centra as actividades programadas na figura de Manuel María, autor homenaxeado no Día das Letras Galegas deste ano.

A maioría están dirixidas aos máis novos, os nenos/as e rapaces/as que cursan estudos nos centros educativos de Brión, que ao longo do mes de maio van asistir a contacontos, recitais e teatro.



 PROGRAMACIÓN:

LUNS, 9 DE MAIO
Charla Coloquio "Manuel María" impartida por Darío Xohán Cabana. Dirixida ao alumnado de Bacharelato do IES de Brión. Centro Social Polivalente ás 11:20 h.

MÉRCORES, 11 DE MAIO
Recital Dramatizado sobre Manuel María con Serafín Marco. Para alumnado do 1º Ciclo de Secundaria do IES de Brión. Centro Social Polivalente ás 11:20 h.

VENRES, 13 DE MAIO
A Noite en Branco da ESMU Magariños de Brión. Recitais en varios locais municipais a cargo de alumnos e alumnas da Escola Municipal de Música.

LUNS, 16 DE MAIO
Luís Vallecillo e a Banda do Cuberto presentan "O Bigote de Mimí" de Manuel María. Dirixida ao alumnado de 1º e 2º Ciclo de Primaria do CEIP de Pedrouzos. Funcións ás 10:30 e 12:15 h. No Centro Social Polivalente.

MÉRCORES, 18 DE MAIO
Títeres Alakrán presenta "Os soños na gaiola" de Manuel María. Para alumnado de 3º Ciclo de Primaria do CEIP de Pedrouzos. Ás 12:30 h. no Centro Social Polivalente.

VENRES, 20 DE MAIO
Festa das Letras na Carballeira dedicada a Manuel María. Participará alumnado do CEIP de Pedrouzos, Escolas unitarias e IES de Brión; con poesía, música, baile e canto tradicional e instalacións arredor da obra do autor chairego.

LUNS, 23 DE MAIO
Trinketrinke Teatro presenta "O coelliño branco" Dirixida ao alumnado de Educación Infantil do CEIP de Pedrouzos (10:30 h.) e o das Escolas de Luaña, Os Ánxeles e Bastavales (12:15 h.)

MÉRCORES, 25 DE MAIO
Fantoches Baj presenta "O asombro con Manuel María". Para alumnado de 2º Ciclo Secundaria do IES de Brión. 11:20 h. No Centro Social Polivalente.

XOVES, 26 DE MAIO
Larraitz Urruzola presenta "Babacontos con Manuel María". Ás 18 :00 h. Na biblioteca pública municipal de Brión. (Actividade co apoio do programa ?Ler conta moito? da Rede de Bibliotecas de Galicia)

VENRES, 27 DE MAIO
Titereficciós presenta "Chove!" (obriña de teatro para bebés) dirixida aos nenos/as da Escola Infantil Municipal de Brión. Ás 10:30 h. no Centro Social Polivalente

Un ano máis, a Feira do Libro de Brión-Maio Cultural está organizada pola Casa da Cultura e a biblioteca pública do Concello de Brión, coa colaboración dos centros educativos do municipio e o apoio do programas "Ler conta moito" da Rede de Bibliotecas de Galicia.

venres, 22 de abril de 2016

Os Quinquilláns representan "Espantallo amigo" con motivo da celebración do Día do Libro no CEIP de Pedrouzos

O venres 22 de abril a compañía teatral “Os Quinquilláns” presentou no CEIP de Pedrouzos a adaptación teatral de “Espantallo amigo”, noveliña escrita polo recentemente finado Xosé Neira Vilas.
Un evento co que o centro de primaria brionés se suma ás actividades que estes días se están a organizar no concello con motivo da celebración do Día do Libro. Á representación teatral asistiu a totalidade do alumnado da escola, máis de 500 alumnos/as que gozaron de dúas funcións que remataron entre palmas e cunha sorpresa final.  O agasallo dun exemplar do libro “Espantallo amigo” que foi entregado a cada un dos rapaces e rapazas que asistiron como público.
Una iniciativa para conmemorar o día do libro e a lectura, lembrando asemade a un gran escritor como Xosé Neira Vilas. A homenaxe foi posible grazas a colaboración do Concello de Brión, a Editorial Galaxia, a ANPA Andaravía do CEIP de Pedrouzos e o propio centro.


xoves, 21 de abril de 2016

Carmen Domech presenta na biblioteca de Brión o seu "Contacontos de libros contentos"

Carmen Domech visitou a biblioteca municipal para presentarnos o seu “Contacontos de libros contentos”, un espectáculo de animación dirixido a nenos e nenas maiores de 4 anos. Carmen chegou coa súa maleta baixo o brazo. Nela, libros de todo tipo viaxan cargados de historias para contan a todos os nenos e nenas que atopan alí onde fan un alto no camiño.
O serán lúdico celebrouse o xoves 21 de abril, e comezou como estaba previsto, ás 18:00 h.,  prolongándose aproximadamente durante 50 min. Case 30 meniños e arredor de 15 adultos, asistiron ao espectáculo, que se celebrou na sala infantil da biblioteca municipal.

A actividade conmemora por adiantado a celebración do Día do Libro, o sábado 23 de abril, e foi programada pola biblioteca co patrocinio do programa “Ler conta moito” da Rede de Bibliotecas de Galicia.