Maio Cultural-Letras Galegas 2026

O 17 de maio celebramos o Día das Letras Galegas, dedicado este ano á figura da xornalista e escritora Begoña Caamaño. Por iso que maio convértese no mes das nosas Letras, un momento no que o Concello de Brión presenta unha programación especial de actividades culturais e de lecer para conmemorar a gran festa das nosas lingua e literatura.

Baixo a denominación de "Maio Cultural-Letras Galegas 2026”, entre o 4 de maio e o 5 de xuño, a cidadanía de Brión poderá gozar dun amplo programa de actividades no que se inclúen, entre outros eventos, dúas entregas de premios, teatro, narración oral, un obradoiro de regueifa e unha exposición de fotografía.

Podes consultar a programación ao completo no portal web municipal.

Feliz maio cultural, mes das nosas Letras, mes de Begoña Caamaño.

Seguir lendo

Maio Cultural 2023: Letras Galegas Paco del Riego

Maio é o mes no que florecen as nosas letras cunha destacada celebración do día 17. Unha importante efeméride que este ano rende homenaxe a Francisco Fernández del Riego, un recoñecido escritor, intelectual e activista político galego que dende a década de 1930 traballou a reo a prol da lingua e cultura galegas. Con motivo desta conmemoración, Brión dedicará a programación do Maio Cultural-Letras Galegas 2023 ao recoñecemento da súa vida e obra.

Dende o 2 ao 25 de maio, están previstas unha serie de actividades, algunhas en colaboración cos centros de ensino do municipio, para celebrar un ano máis o Día das Letras Galegas. Moitas delas están especialmente dirixidas ao alumnado dos diferentes centros educativos, outras están abertas a toda a cidadanía.

Programa Maio Cultural-Letras Galegas
Francisco Fernández del Riego

|DÍA 2 DE MAIO| Vicus Teatro: “Crónicas clásicas”
Destinada ao alumnado IES de Brión.

Unha viaxe escénica ao mundo grego para afondar nos alicerces do teatro e da vida.

|DÍA 9 DE MAIO| Elefante Elegante: “O cubo”
Para alumnado Ed. infantil CEIP Pedrouzos e as Escolas de Os Ánxeles e Bastavales.

Unha obra de teatro xestual que transcorre nun cubo de dous metros de lado. Nel habitan os dous personaxes desta historia. Ela, curiosa e decida. El, tenro e pándego. Un día, a curiosidade invade o cubo e deciden que queren ir máis alá, descubrir o mundo enteiro.

|DÍA 10 DE MAIO| Xarope Tulú: “A teteira de Kabul”
Alumnado de 3º e 4º de Ed. Primaria.

A teteira de Kabul conta a historia de Mina, unha nena que debe abandonar o seu fogar por mor do estoupido da guerra no seu país, Afganistán. A protagonista comeza unha longa viaxe coa súa familia e a pesar das duras condicións, coa axuda das historias que lle conta súa nai, vai descubrindo a beleza neste periplo.

|DÍA 13 DE MAIO| Teatro Redrum: “Un home con lentes de pasta”
Ás 20:00 h. Centro Social. Entrada libre ata completar a capacidade do local.
Comedia. Adultos. 75 min.

Sheyla acaba de ser abandonada pola súa parella. Laura e Fer quérena animar para que aproveite a oportunidade e faga realidade os desexos que aparcara: escribir. Traerán a cear a Guillerme. El é o poeta capaz de namorar a calquera cuns breves versos. Pero a Guillerme non lle van satisfacer as conversas banais nin os frívolos momentos de distensión. Guillerme desexa algo máis. Sheyla, Laura e Fer son máis fráxiles do que cren, as súas vidas penden dun fío, afóganse na dúbida, algo que Guillerme non vai desaproveitar.

Esta comedia estreada en Barcelona no 2010 recibiu o premio da crítica Serra D’or ao mellor texto teatral, o de mellor espectáculo nos premios Time Out no 2011, o premio Mi Butaquita de mellor obra no 2014 e estivo nomeada ao mellor texto catalán nos Premios Max do 2011

|DÍA 15 DE MAIO| Diáspora Teatro: “O peirao”
Dirixida a alumnado de 1º e 2º de Ed. Primaria.

A través da narración oral o clown e o teatro de obxectos nace esta fermosa historia. Dous pescadores de contos, como mensaxes en garrafas que chegan a beira. Algunhas veñen de preto outras de lonxe e outras non teñen procedencia. Contos para mirar o redor, a natureza a nós mesmos, para coidala, para coidarnos. O peirao é un espectáculo sobre o valor da natureza e a relación que temos as persoas con ela. Para querela un pouco máis, para mirala desde un lugar diferente.

|DÍA 16 DE MAIO| Cerimonia de Entrega V Premio Laudamuco ao escritor Vicente Piñeiro
Ás 20:30 h. Sala Municipal de Exposicións. Acceso libre ata completar a capacidade do local.

O escritor lucense Vicente Piñeiro, gañador da quinta edición do Premio Laudamuco para textos teatrais coa obra "Devólvenos a Xermánico”, recibirá o galardón nunha cerimonia aberta a toda a veciñanza.

|DÍA 20 DE MAIO|

 

8ª Andaina Terras de Altamira-Brión
Celebración dunha nova edición deste popular evento organizado pola asociación O Esquío no Piñeiro en colaboración co Concello de Brión. Inicio ás 9:00 h. na Carballeira de Santa Minia.

“Concerto das Letras” da Banda de Música Municipal de Brión
Ás 19:00 h. Centro Social. Entrada libre ata completar a capacidade do local.

|DÍA 22 DE MAIO| Teatro Ghazafelhos: “Travesía unicornio”
Destinado ao alumnado de 5º e 6º de Ed. Primaria.

Teatro Ghazafelhos é unha compañía nada en Narón no ano 2006 especializada en teatro de actor e clown. Trátase dunha das compañías galegas de referencia para público familiar.

|22/26 DE MAIO| Festa das Letras na Carballeira: Francisco Fernández del Riego
Alumnado CEIP Pedrouzos e Escolas de Os Ánxeles e Bastavales

Regresa á carballeira a Festa das Letras, con actividades protagonizadas polo alumnado dos centros de ensino do Concello.

|DÍA 24 DE MAIO| Serafín Marcos: “Un optimista radical”
Unha obra didáctica sobre Francisco Fernández del Riego destinada ao alumnado do IES de Brión.

|DÍA 25 DE MAIO| Trémola Teatro: “Leo e as cores”
Dirixida a alumnado da Escola Infantil Municipal.

Leo é o león máis curioso de toda a selva. Un día, unha choiva de pompas quítalle ao elefante Ante e á tartaruga Uga as súas cores. Será capaz Leo, coa vosa axuda, de devolverlle as cores aos seus amiguiños? A través de diferentes elementos sensoriais, Leo axudaranos a coñecer e gozar das cores.

 

 

Seguir lendo

Úrsula Heinze presenta en Brión "Flashes"

A Sala Municipal de Exposicións (Casa da Cultura) acolleu a presentación en Brión da última publicación da recoñecida escritora Úrsula Heinze, “Flashes”. Unha obra en dous volumes que recompila un conxunto de relatos a xeito de instantáneas, onde a autora plasma momentos da súa vida (dispoñible na biblioteca municipal).

O encontro literario celebrouse o venres 13 de maio ás 20:30 h. e forma parte da máis ampla programación de actividades que a Casa da Cultura e a biblioteca municipal de Brión organizan no mes de maio para conmemorar a celebración do Día das Letras Galegas.

Xunto a escritora de orixe alemá, afincada en Compostela dende 1968, participaron na presentación Luís Alonso Girgado, recoñecido editor, escritor, tradutor e investigador; Víctor F. Freixanes, escritor, xornalista, editor e profesor universitario, presidente da Real Academia Galega dende 2014. Tamén Dolores Vilavedra, profesora na USC, integrante do consello de redacción da revista Grial, escritora, tradutora e crítica literaria.

Ursula Heinze de Lorenzo é unha destacada escritora, con numerosas novelas, ensaios e relatos dirixidos tanto a público infantil, xuvenil como adulto. Tamén destaca polas súas composicións poéticas, escritas indistintamente en galego e alemán. Tampouco debemos esquecer o seu labor como tradutora de autores alemáns ao galego e castelán. 

 

 

Seguir lendo

Maio Cultural - Letras Galegas 2022: Florencio Delgado

O Día das Letras Galegas deste ano homenaxeará a Florencio Delgado Gurriarán. Escritor e militante galeguista que trala fin da Guerra Civil tivo que exiliarse a México, país onde se establecería definitivamente.

Con motivo desta celebración, Brión dedicará o seu Maio Cultural-Letras Galegas 2022 a este autor. Dende o 7 ao 31 de maio, están previstas unha sería de actividades, algunhas en colaboración cos centros de ensino do municipio, para celebrar o mes no que florecen as Nosas Letras.

 

Actividades programadas:

Día 7 maio. Fegateatro. Centro Social Polivalente, 20:00 h.

O grupo Teatro Escoitade de Vigo presenta "Dominó Celeste ou Que vai ser de ti, Ernesto!" 

Traxicomedia. Maiores de 14 anos.

Sinopse: Que acontece cando es levado a un lugar para curarte? Por que non o entendes? Que atopas cando nada hai ao teu arredor? Por que o cerebro te leva por carreiros tan retortos? Quen provoca estes desvaríos?... Observa, entón, toda unha vida perfilada con lembranzas cando se rachan as ligazóns neuronais.

 

Día 13 maio.- Espectáculo musical con Xoán Curiel. Sala Municipal de Exposicións. 18:00 h.

Crianzas de entre 6 e 12 anos de idade.

Xoán Curiel presenta “Cantando as nosas letras”. Xoán canta a Xela Arias, Antonio Fraguas, Carvalho Calero, Florencio Delgado Gurriarán e algúnhs outros/as autores das nosas letras. Un percorrido musical para falar das súas obras e das súas experiencias vitais, co obxectivo de achegar estas figuras ao público asistente. 

Entrada de balde ata completar aforo. Reserva en: bibliotecadebrion@briondixital.org. (Envía unha mensaxe co nome dun adulto, un tfno. de contacto e o número de cadeiras que desexas reservas.)

 

Día 13 maio.- Encontro Literario con Úrsula Heinz. Sala Municipal de Exposicións. 20:30 h.

Esta recoñecida autora presenta o libro “Flashes”. Estará acompañada por Luís Alonso Girgado, Víctor F. Freixanes e Dolores Vilavedra.

 

Día 14 maio.- Fegateatro. Centro Social Polivalente, 20:00 h.

Farándula Velutina de Corcubión presenta “A derradeira bala”

Comedia. Maiores de 7 anos

Sinopse: Luciana Cardone decide abandonar as trincheiras para ir na busca doutro mundo, cheo de poesía, teatro, música…pero descuberta e xulgada polos seus superiores, é condenada a morte. Á mañá seguinte, será fusilada coa derradeira bala que garda o pelotón. Mais o amor pola música de Luciana e as súas ansias de liberdade farán que a cousa se complique un chisco polo camiño.

Día 16 maio.- Cerimonia de entrega do IV Premio Laudamuco para textos teatrais a Paula Carballeira.
Sala Municipal de Exposición. 20:30 h.

Día 19 maio.- Presentación en Brión do libro “Rastros” de Roberto Vidal Bolaño.
Sala Municipal de Exposicións. 20:30 h.
A cargo de Paco Macías de Edicións Positivas e Lois Blanco Araúxo (director teatral).

Día 21 maio.- A Compañía Coproducións Condetrespés presenta “Rastros"
20:00 h. Centro Social Polivalente.
Sinopse: Santiago de Compostela. Finais do século XX. Esther agoniza no hospital. Tres homes, seguramente os máis importantes da súa vida, relembran momentos que compartiron con ela, apunto de cumprir os 30 anos. Iago, Moncho e Xan están no mesmo espazo, están na cabeza dela a punto de marchar. A viaxe dos recordos é un punto de encontro duns amigos que compartiron case todo, agás evolucionar

Día 28 maio.- VII Andaina Terras de Altamira

Día 28 maio.- Fegateatro. Centro Social Polivalente. 20:00 h.
Disfunción Continua Teatro de A Estrada presenta “Departamento de selección”
Drama. Maiores de 16 anos
Sinopse: Este espectáculo, dirixido a un público maior de 16 anos, presenta varias personaxes que aceptan participar nun xogo cruel e perverso, onde manifestan o seu cinismo, egoísmo, intolerancia e falta de empatía. O público, xunto coas personaxes, debe decidir ata onde chega a verdade e onde comeza o truco. O espectador poderá reflexionar sobre o comportamento humano e os valores da sociedade de mercado en que vivimos. A obra, que alterna momentos máis divertidos con outros máis dramáticos, é unha crítica á deshumanización do mundo capitalista, que nos converte en inimigos e competidores, dispostos á loita máis salvaxe na que todo vale.

En todos os espectáculos teatrais a entrada será de balde ata completar aforo. Reserva de localidades en billeteira.concellodebrion.gal

Tamén se van organizar diferentes espectáculos ao longo do mes de maio dirixidos exclusivamente ao alumnado dos diferentes centros educativos de Brión.

Cartel Maio Cultura - Letras Galegas 2022

Seguir lendo

Maio Cultural-Letras Galegas nas Redes 2020: Programación especial

Do 15 ao 22 de maio, Brión celebra o Maio Cultural-Letras Galegas 2020 co gallo da conmemoración do Día das Letras Galegas. Unha programación que, por mor da crise sanitaria provocada pola COVID-19, se converte en virtual. A través deste portal web e das redes sociais da biblioteca compartimos coa cidadanía diferentes recursos e actividades culturais relacionadas coas nosas Lingua e Literatura. De seguido, recompilamos as achegas e colaboracións específicas realizadas por veciños e amigos, relacionados co mundo da cultura, para celebrar a festa das nosas letras e conmemorar a figura do autor homenaxeado este ano, Ricardo Carvalho Calero.

Venres 15 de maio:

Luís Vallecillo

Iniciamos o Maio Cultura-Letras Galegas nas Redes co noso amigo e veciño Luís Vallecillo que comparte connosco unha canción. Un un tema inédito que compuxo hai uns anos: "Buscando a Rosalía". Unha canción dedicada a Rosalía de Castro, primeira persoa homenaxeada no Día das Letras Galegas no ano 1963.

O tema forma parte do espectáculo "Cantares das Letras", un proxecto creado para festexar xunto coas familias o "Día das Letras Galegas". Moitas grazas Luís, e esperamos que axiña nos volvamos ver en vivo na biblioteca.

  As Letras na Carballeira co CEIP de Pedrouzos

Cada maio, con motivo da celebración do Día das Letras Galegas, todo o alumnado e profesorado do CEIP de Pedrouzos sube ata a Carballeira de Santa Minia para participar no festival "As Letras na Carballeira". Un evento no que colabora o Departamento de Cultura do Concello de Brión.

Este ano, estaba previsto homenaxear a figura de Ricardo Carvalho Calero con música, danza, poesía... e cunha actuación de Charo Pita e Xoán Curiel. Pero, debido á crise sanitaria provocada pola COVID-19 non vai poder ser. Por iso, el@s quixeron acompañarnos igualmente nun vídeo que o centro de Primaría brionés desexa compartir con todos/as. Grazas e feliz Día das Letras Galegas 2020.

 

Sábado 16 de maio:

Alberto Álvarez recita un poema de Carvalho Calero

O compañeiro Alberto Álvarez, técnico de Cultura do Concello de Brión, recita para o Maio Cultural-Letras Galegas 2020 nas Redes un poema de Ricardo Carvalho Calero: "Somos os pacifistas", publicado na obra "Reticências... (1986-1989)", en 1990 pola editorial Sotelo Blanco.

Domingo, 17 de maio:

David Orihuela recrea a Carvalho Calero

Para celebrar o Maio Cultural-Letras Galegas 2020, o amigo e colaborador David Orihuela,

integrante de Mancuco Animación, enviounos un vídeo onde nos presenta unha breve biografía de D. Ricardo Carvalho Calero mentres o debuxa.

Unha achega destinada ás crianzas coa que todas/os coñeceremos mellor a traxectoria vital do autor homenaxeado no Día Das Letras Galegas 2020

Lucho Penabade, de Os Quinquilláns, felicítanos as Letras Galegas

O noso amigo e veciño Lucho Penabade de Os Quinquilláns comparte connosco no Maio Cultural-Letras Galegas 2020 este vídeo para felicitar o Día das Letras Galegas e lembrar a figura de Ricardo Carvalho Calero.

Luns, 18 de maio:

Charo Pita agasállanos unha historia

A nosa amiga Charo Pita, escritora e narradora excepcional, felicítanos as Letras Galegas e comparte connosco un conto escollido especialmente para este Maio Cultural-Letras Galegas 2020 nas redes.

Martes, 19 de maio:

Minguante presentan "Estrelas"

Continuamos co Maio Cultural-Letras Galegas nas redes para celebrar o Día Das Letras Galegas e conmemorar a figura de Carvalho Calero. Miguel Alonso e Óscar Martínez comparten connosco no Maio Cultural- Letras Galegas de Brión 2020 unha versión acústica gravada na casa desta canción de Minguante. Con letra e música Óscar Martínez.

 

Mércores, 20 de maio:

"María siléncio", poema de Ricardo Carvalho Calero

María José Casal, Alessandra Cebro, Ana Fernández, Conchi Pereira e Leticia Miraz, integrantes do grupo de pandeireta perfeccionamento das Escolas Municipais de Música e Danza Tradicionais de Brión, recitan dende as súas casas o poema de Ricardo Carvalho Calero "María siléncio" para celebrar as Letras Galegas.

 

Xoves, 21 de maio:

Irene Quinteiro agasállanos dous poemas 

Unha nova achega ao Maio Cultural-Letras Galegas 2020 nas redes de Brión para conmemorar o Día das Letras Galegas e á figura de Carvalho Calero. A nosa amiga Irene Quinteiro Blanco recita dous poemas da súa autoría para felicitarnos as Letras Galegas. Presentamos "Carta aberta" e "Postdata".

Venres, 22 de maio:

Conto dramatizado: "As pitas baixo a choiva" de Ricardo Carvalho Calero

Como o prometido é débeda, aquí está a sorpresa da que falaramos para conmemorar a figura de Ricardo Carvalho Calero, autor homenaxeado no Día das Letras Galegas 2020.
Presentamos unha adaptación dramatizada do conto "As pitas baixo a choiva" de Ricardo Carvalho Calero, baseado no texto do álbum publicado por Edicións Embora en 2008. O relato veu a luz por vez primeira na revista Lar en 1952.
Adaptada por Sandy Cebral, que creou a escenografía e caracterizou aos personaxes. Narrada por Alberto Álvarez e montada/animada por Armando Patiño.

 Escolas Municipais de Música e Danza Tradicionais de Brión

As alumnas Iria Orosa Diz de Pandeireta e Baile Grupo 1B e Alba Lucía Santamaría González de Baile Grupo 3 e Pandeireta Grupo 2, integrantes das Escolas Municipais de Música e Danza Tradicionais de Brión, comparten este vídeo connosco para celebrar o Maio Cultural e as Letras Galegas.

O alumnado da EEI de Os Ánxeles celebra as Letras Galegas

A EEI de Os Ánxeles (Brión) comparte un vídeo realizado cos traballos que o alumnado desta escola realizou para conmemorar o Día das Letras Galegas 2020.

 

Seguir lendo

17 de maio, Día das Letras Galegas Ricardo Carvalho Calero

Bo Día das Letras Galegas a todas/os. Unha data que este ano celebramos dun xeito diferente, debido á crise sanitaria que por desgraza estamos a vivir. Pero un día que resplandece coma o sol de primavera do seu alborecer, sen diminuír un ápice da súa fortaleza e sentido festivo de celebración das nosas letras e a nosa lingua.

Como xa sabes, a través da Rede, estamos a converter o tradicional Maio Cultura-Letras Galegas de Brión nun evento totalmente virtual para conmemorar a festa das Nosas letras a través de diferentes actividades e achegas de veciños, amigos, colaboradores, etc. que fan posible que a cultura non pare durante o des-confinamento.

Por suposto, ceibaremos nas redes sociais máis cousas relacionadas co autor homenaxeado este ano, Ricardo Carvalho Calero. Pero no día propio da celebración, queremos compartir con todas e todas unhas breves palabras do presidente da Real Academia Galega (e veciño de Brión), Víctor F. Freixanes que felicita a todas e todos os galegos neste día de celebración da festa das Nosas Letras.

Seguir lendo

Maio Cultural-Letras Galegas 2020, este ano celebramolo nas Redes.

Maio é o mes no que as nosas Letras florecen en Brión. Nestes días de des-confinamento por mor das medidas de contención tomadas para previr a expansión do COVID-19, renunciar á cultura non é unha opción. Porén, o Departamento de Cultura e a Biblioteca Pública Municipal do Concello de Brión non imos desistir na celebración do Maio Cultural - Letras Galegas 2020. Ante estas circunstancias extraordinarias derivadas da crise sanitaria que nos impiden realizar actividades de xeito presencial, convertémolo nun evento totalmente virtual, adaptado para a súa difusión a través das redes sociais e o portal web da biblioteca entre os días 15 e 22 de maio.

Alcanzar este obxectivo en solitario non é doado. Por iso, precisamos da implicación de toda a veciñanza, especialmente daquelas persoas e colectivos vinculados coa arte, a literatura, a escena, a comunicación, a música... en definitiva, ligados e comprometidos coa cultura. Nos vindeiros días, iremos compartiremos con todos vós a súa achega a través das redes sociais da biblioteca, para celebrar a festa das nosas letras e conmemorar a figura do autor homenaxeado este ano, Ricardo Carvalho Calero.

Se o desexas, ti tamén podes participar neste proxecto dun xeito moi sinxelo. Comparte no Facebook ou Twitter, a través do cancelo #maioculturalbrión, unha recomendación literaria, cinematográfica, teatral ou musical relacionada coa nosa Lingua e Literatura. Podes, por exemplo, enviar a foto da  portada dun libro, película ou disco; compartir un videoclip dun grupo musical galego que che guste... Ou fai unha breve reflexión ou comentario no formato que desexes sobre o que para ti significa o Día das Letras Galegas e o personaxe homenaxeado na edición deste ano: Ricardo Carvalho Calero.

O Maio Cultural-Letras Galegas de Brión está aquí e este ano a festa vai ser nas Redes. Animádevos a participar.

Seguir lendo

Maio Cultural 2019: Os Quinquilláns inauguran a programación con "Language planning"

Os Quinquilláns inauguraron o día 8 de maio a programación do Maio Cultural brionés presentando no Centro Social Polivalente o espectáculo “Language Planning”, unha adaptación teatral dos relatos de “Made in Galiza” do escritor Sechu Sende.

Aproximadamente 65 rapazas e rapaces e 4º da ESO do IES de Brión asistiron a unha función que baixo un punto de vista cómico e retranqueiro presenta a situación que vive o galego na sociedade actual.

Este espectáculo teatral supuxo o arranque dunha ampla programación de actividades que se desenvolverá ao longo do mes de maio co gallo da celebración do Día das Letras Galegas, dedicado este ano ao profesor Antón Fraguas. O principal destinatario do programa é o alumnado dos diferentes centros de ensino do concello, aínda que tamén contempla actividades dirixidas aos usuarios da biblioteca municipal e á cidadanía en xeral.

Máis información na seguinte ligazón.

Seguir lendo

Maio cultural 2019, Letras Galegas Antón Fraguas

O Día das Letras Galegas está dedicado este ano a Antón Fraguas, historiador, etnógrafo, antropólogo e xeógrafo galeguista. Co gallo desta celebración, o Concello de Brión, a través da biblioteca municipal de da Casa da Cultura, organiza ao longo do mes de maio unha programación especial de actividades, especialmente destinadas ao público infantil e mozo que cursa estudos nos diferentes centros de ensino brioneses.

O principal obxectivo das actividades que a continuación presentamos non é outro que difundir durante todo o mes o valor da nosa lingua e cultura a través da súa manifestación literaria encarnada este ano na figura de Antón Fraguas.

Maio cultural, Letras Galegas Antón Fraguas

MÉRCORES, 08 DE MAIO:
OS QUINQUILLÁNS presentan "Language Planning". Para alumnado de 4º da ESO do IES de Brión.

VENRES, 10 DE MAIO:
CONTRAPRODUCIÓNS presentan "Fillos so sol". Para alumnado de 3º da ESO e 1º de Bacharelato do IES de Brión.

SÁBADO, 11 DE MAIO:
RUTA ROSALIANA Saída da Carballeira de Sta. Minia ás 9:15 h. Inscrición de balde ata o 30 de abril.

MARTES, 14 DE MAIO:
- MONTSE RIVERA presenta "Cóntocho un traxe". Para alumnado de 3º e 4º de Primaria do CEIP de Pedrouzos.
- TÍTERES ALAKRÁN presentan "Circo Galaico". Para alumnado de 1º e 2º de Primaria do CEIP de Pedrouzos.

MÉRCORES, 15 DE MAIO:
Festa das LETRAS NA CARBALLEIRA "ANTÓN FRAGUAS". Para o alumnado do CEIP de Pedrouzos e Escolas de Os Ánxeles, Bastavales e Luaña. Poesía, música, baile e canto tradicionais, instalacións, etc. Coa a actuación de: "ÇE ORQUESTRA PANTASMA"

XOVES, 16 DE MAIO:
- ELEFANTE ELEGANTE presenta "Lobo bobo". Para o alumnado de Educación Infantil do CEIP de Pedrouzos.
- Acto de entrega do I PREMIO LAUDAMUCO DE TEXTOS TEATRAIS. Ás 12:00 h. diante do busto de Roberto Vidal Bolaño na Carballeira de Santa Minia.

VENRES, 17 DE MAIO:
GALA DA PATINAXE. No Pavillón Polideportivo Municipal.

SÁBADO, 18 DE MAIO:
SENDEIRISMO: Ruta de Aguiño. Saída ás 8:30 h. da Carballeira de Santa Minia. Inscrición no Tfno. 981 50 99 69.

LUNS, 20 DE MAIO:
- MONTSE RIVERA presenta "Cóntocho un traxe". Para alumnado de 5º e 6º de Primaria do CEIP de Pedrouzos.
- EXPOSICIÓN COLECTIVA DE PINTURA a cargo das alumnas e dos alumnos da ACADEMIA DAVINCI . Presentación ás 21:00 h. no Centro Social Polivalente. Do 20 de maio ata o 7 de xuño.

MÉRCORES, 22 DE MAIO:
ELEFANTE ELEGANTE presenta "Patapatúm". Para as crianzas das escolas de Os Ánxeles, Luaña e Bastavales.

VENRES, 24 DE MAIO:
Recital dramatizado con SERAFÍN MARCOS "Quen ten un mestre etnógrafo?, Homenaxe a Antón Fraguas" Para o alumnado de 1º e 2º da ESO do IES de Brión.

SÁBADO, 25 DE MAIO:
V ANDAINA TERRAS DE ALTAMIRA.

MÉRCORES, 29 DE MAIO:
TRÉMOLA TEATRO presenta "Que animaliño é?". Para as crianzas da Escola Infantil Municipal de Brión.

VENRES, 31 DE MAIO:
PAKOLAS presenta "As parábolas de Pakolas". Ás 18:00 h. na Sala Municipal de Exposicións.

Seguir lendo

A Noite en Branco da Magariños leva a música en vivo á biblioteca municipal

O venres 25 de maio a BPM de Brión acolleu nas súas instalacións o Concerto “Adagio” , un dos cinco recitais que integraron "A Noite en Branco", unha actividade organizada pola ESMU Magariños de Brión incluída na programación do Maio Cultural 2018 do Concello de Brión.

"A Noite en Branco" é unha orixinal proposta que leva a música en directo ata cinco espazos públicos municipais en horario nocturno. Ademais da biblioteca pública, os recitais celebráronse na propia escola de música, onde comezou a actividade arredor das 22:00 h., na sala de exposicións, no salón de plenos da Casa Consistorial e, xa para rematar, no auditorio do Centro Social Polivalente. Como novidade desta quinta edición da Noite en Branco, cabe destacar a “Alborada na Carballeira”, unha ruada con gaita e tamboril que conduciu ao público asistente dende o concerto celebrado na biblioteca ata o seguinte recital na sala de exposicións.

Cinco agrupacións, conformadas por alumnado da escola de música, executaron o seu repertorio na biblioteca, nun concorrido concerto que comezou ás 22:30 h. e prolongouse ata case as 23:00 h. Arredor de 200 asistentes conformaron un auditorio entregado que abarrotou a biblioteca. Un espazo acostumado ao silencio que coa Noite en Branco transformouse nun improvisado auditorio onde tivo cabida un ano máis a música en directo.

Os músicos, alumnos e alumnas da escola de distintas idades, interpretaron un fragmento da coñecida banda sonora da película “La Lista de Shindler”, despois de iniciar o recital cun intro de percusión. De seguido, continuaron coa peza tradicional inglesa “The water is wide”, e “Nimbus 2000” para rematar cun fragmento doutra banda sonora cinematográfica moi coñecida, “El padrino” de Nino Rota.

Seguir lendo

Maio Cultural 2018. Celebrando as Letras Galegas e a Mª Victoria Moreno

O Día das Letras Galegas está dedicado esta ano a María Victoria Moreno, pontevedresa de adopción que chegou a Galicia en 1963 e axiña asumiu a cidadanía en galego, a lingua que escolleu tanto para as súas obras narrativas infantís e xuvenís como para os seus estudos literarios, o ensaio, a poesía e a didáctica da lingua e da literatura galegas.

Para lembrar a esta figura das nosas Letras e recuperar a súa obra, o Concello de Brión, a través da Casa da Cultura e da biblioteca municipal, presenta unha ampla programación lúdico cultural que se desenvolverá ao longo do mes de maio.

  

 

Maio Cultural, programación Letras Galegas Mª Victoria Moreno

O programa de actividades comezou o 30 de abril coa obra de Limiar Teatro, “Anagnórise”, baseada na novela de María Victoria Moreno e dirixida ao alumnado de 4º da ESO e 1º de Bacharelato do IES de Brión. Precisamente, son os estudantes dos centros de ensino do municipio os principais destinatarios das actividades, cunha temática que xira arredor do personaxe homenaxeado no Día das Letras Galegas e constituídas fundamentalmente por sesións de teatro, contacontos, conferencias e recitais dramatizados. Sen esquecer, tampouco, outros eventos destacados como a Festa da Letras na Carballeira ou a Noite en Branco da ESMU Magariños.

Como novidade desta 28ª edición do Maio Cultural, debemos destacar a Ruta Rosaliana entre Santiago, Ames, Brión e Padrón e as visitas teatralizadas a cargo de Os Quinquilláns no adro da Igrexa de Bastavales, con Rosalía de Castro como protagonistas. Outro evento a lembrar é a exposición de pintura do artista José María Barreiro, que poderá visitarse na Sala de Exposicións Municipal do 4 de maio ao 8 de xuño.

Un conxunto de actividades que se poden consultar na súa totalidade premendo na seguinte ligazón , onde se atopa dispoñible toda a información sobre os/as destinatarios/as, datas, horarios e lugares de celebración.

Feliz maio cultura, felices Letras Galegas!

Seguir lendo

O espectáculo "Chíos" de Teatro da Semente pecha a Feira do Libro-Maio Cultural 2017

Despois de case un mes cheo de actividades, a Feira do Libro de Brión-Maio Cultural 2017 chega á súa fin. As encargadas de pór o punto final á programación deste ano foron as integrantes de Teatro da Semente Raquel Queizás e Chus Álvarez que presentaron en Brión “Chíos”, un espectáculo dirixido aos nenos e as nenas da Escola Infantil Municipal.

Foi o mércores, 31 de maio, cando o Centro Social de Brión acolleu no seu espazo multiusos esta entretida función á que asistiron aproximadamente 80 pequenos e pequenas acompañados de mestres e mestras. “Chíos” é un espectáculo de poesía sensorial para bebés de 0 a 3 anos consistente nunha montaxe músico-teatral con cantigas, bailes, música, poemas visuais, xogos e estimulación olfactiva e táctil para os máis pequechos. 

Con esta actividade péchase por este ano unha programación lúdico-cultural que comezou o día 8 de maio e serviu para conmemorar en Brión o mes das Nosas Letras, este ano dedicado ao escritor e editor Carlos Casares.

Seguir lendo

Xarope Tulú presenta "A miña primeira viaxe" na Feira do Libro-Maio Cultural 2017

O grupo Xarope Tulú presentou no espazo multiusos do Centro Social de Brión “A miña primeira viaxe”. A peza teatral, que estivo dirixida ao alumnado de Educación Infantil do CEIP de Pedrouzos (primeira función) e das escolas unitarias de Bastavales, Luaña e Os Ánxeles (segunda función), xorde da adaptación do libro-álbum do mesmo título escrito por Paloma Sánchez Ibarzábal e publicado por OQO editora en febreiro de 2012.

As representacións celebráronse o mércores 24 de maio, ás 10:30 e 12:20 h., e forman parte do amplo programa de actividades da XXVII Feira do Libro de Brión-Maio Cultural 2017, organizada pola Casa da Cultura e biblioteca municipal do Concello de Brión.

Seguir lendo

O mago Martín Camiña trae a maxia de Carlos Casares a Brión

O espazo polivalente do Centro Social de Brión acolleu o luns 22 de maio unha función de maxia a cargo do ilusionista Martín Camiña. Co título de "A maxia de Carlos Casares" o coñecido artista presentou un espectáculo máxico e literario, cargado de ilusións sustentadas na narrativa, ensaio e as sorpresas da vida e a obra de Carlos Casares.
Nesta ocasión, o auditorio estivo conformado por alumnado de 1º Ciclo de Primaria do CEIP de Pedrouzos. Máis de 150 nenos e nenas divertíronse durante 60 min. cos xogos e ilusións que Martín Camiña teceu mesturando a súa maxia co encantamento das palabras de Carlos Casares.

Seguir lendo

"A Noite en Branco" achega a música á biblioteca

Un ano máis “A Noite en Branco da Magariños” reivindica o talento dos intérpretes novos da Escola de Música de Brión cunha serie de recitais en diferentes espazos públicos municipais. Na edición de 2017, o amplo programa musical iniciouse nas instalacións da Escola de Música, continuou na Biblioteca Pública, Sala de Exposicións municipal e Salón de Plenos da Casa Consistorial. O serán musical rematou no espazo multiuso do Centro Social Polivalente, cun último concerto a cargo da Banda de Música Municipal de Brión. 

Na biblioteca pública celebrouse o concerto “Adagio”, que comezou ás 22:30 h. Nel alumnado da escola interpretou fragmentos de “Los chicos del coro”, “Stay with me” de S. Smith ou “Pasodobre dos cabezudos”, entre outros.
Unha noite para gozar da boa música interpretada polos novos valores dun centro de estudos musicais que, unha vez máis, colabora co programa cultural da “Feira do Libro-Maio Cultural 2017”.

Seguir lendo

"Contando a Carlos Casares" aos mozos de Brión

O alumnado de 2º Ciclo de Secundaria do IES de Brión asistiu á presentación en Brión do documental “Contando a Carlos Casares” do realizador Carlos Veloso. A actividade, que formou parte da programación da Feira do Libro-Maio Cultural 2017, celebrouse o venres 19 de maio no Centro Social ás 11:20 h.

O audiovisual introduce ao espectador na vida e na obra do autor homenaxeado no Día das Letras Galegas, a través de distintas entrevistas con diferentes persoas vinculadas persoal ou profesionalmente con Carlos Casares. O evento contou coa presenza do director do documental que presentou o proxecto e pechou o acto someténdose a unha rolda de preguntas dos asistentes.

Seguir lendo

Contos de primavera en Brión con Celtia Figueiras

A animadora Celtia Figueiras presentou na Sala Municipal de Exposicións “Contos de primavera”, outro divertido serán de “As estacións en contos”, unha serie de catro espectáculos con historias sobre cada unha das catro estacións que compoñen o ciclo do ano.

A actividade, incluída na programación da Feira do Libro-Maio Cultural 2017, estivo dirixido a público infantil de entre 3 e 9 anos de idade. A sesión comezou pasadas as 18 h., e estendeuse durante uns 40 min. A asistencia de público foi notable, contabilizándose a presenza de aproximadamente 32 nenos/as e 23 adultos.

A actividade estivo organizada pola biblioteca pública municipal co patrocinio do programa “Ler conta moito” da Rede de Bibliotecas Públicas de Galicia. 

Ligazón coa galería de imaxes da actividade.

Seguir lendo

Celtia Figueiras regresa con "Contos de primavera", segundo espectáculo de "As estacións en contos"

O venres 12 de maio a animadora Celtia Figueiras regresa a Brión para presentar “Contos de primavera” outro entretido serán de “As estacións en contos”, unha serie de catro espectáculos con historias sobre cada unha das catro estacións que compoñen o ciclo do ano.

Despois dos “Contos de inverno” a Sala de Exposición Municipal acollerá as novas e primaverais historias que Celtia ten preparadas para público infantil de entre 3 e 9 anos de idade. A sesión iniciarase ás 18:00 h. con entrada de balde ata completar o aforo.

A actividade, que forma parte da programación da Feira do Libro-Maio cultural 2017, está organizada pola biblioteca pública municipal co patrocinio do programa “Ler conta moito” da Rede de Bibliotecas Públicas de Galicia.

Seguir lendo

Arranca a XXVII Feira do Libro-Maio cultural cun recital dramatizado a cargo de Serafín Marcos

O luns 8 de maio iniciouse en Brión a programación especial que un ano máis conmemora o Día das Letras Galegas, unha destacada efeméride cultural que este ano se dedica ao escritor Carlos Casares. Baixo a denominación “Feira do Libro-Maio Cultural”, unha ampla selección de actividades achega á cidadanía de Brión, e en especial ao alumnado dos centros educativos do municipio, e pon en valor a figura e a obra do autor homenaxeado no mes das Nosa Letras. E todo isto a través de recitais, conta contos, música e teatro para todas as idades.

O encargado de inaugurar a “XXVII Feira do Libro-Maio Cultural 2017” foi Serafín Marcos que presentou no espazo escénico do Centro Social o recital dramatizado “Carlos Casares”, dirixido ao alumnado do 1º Ciclo de Secundaria do IES de Brión. Un total de 72 rapaces e rapazas participaron nun serán de animación que durante aproximadamente 60 min. presentou diversos aspectos da vida e obra do autor ourensá.

A Feira do Libro-Maio Cultural é unha actividade organizada pola Biblioteca e Casa da Cultura do Concello de Brión. 

Galería de imaxes da actividade

Seguir lendo

XXVII Feira do Libro de Brión-Maio Cultural

Un ano máis, a Feira do Libro de Brión-Maio cultural acode puntual a súa cita coa promoción do libro e a lectura no mes que celebramos a gran festa das nosas Letras. Como de costume, nesta 27ª edición, a Feira do Libro presenta unha programación cultural dirixida especialmente aos máis novos, ofrecendo unha variada oferta lúdica-educativa, con conta contos, recitais, música e teatro.

A ampla e variada programación, que se inicia o día 8 e remata o 31 de maio, está orientada a lembrar e conmemorar a figura de Carlos Casares, autor homenaxeado no Día das Letras Galegas que se celebra o 17 de maio.

Narrador, ensaísta, articulista de prensa, editor e dinamizador cultural, Carlos Casares (Ourense, 1941-Vigo, 2002) é unha das figuras máis senlleiras e renovadoras da literatura galega das últimas décadas do século XX. Un intelectual que máis alá do seu talento literario implicouse activamente na vida cultural, política, social e institucional de Galicia, amosando un compromiso inquebrantables coa nosa lingua.

O cartel da Feira do Libro-Maio cultural 2017, co programa completo de actividades, pode consultarse premendo na seguinte ligazón.

Seguir lendo