Brión celebra unha nova edición dos Encontros coa Arte, dedicados a Antón Fraguas

Comeza unha nova edición dos Encontros coa Arte de Brión, este ano dedicados ao profesor Antón Fraguas, personaxe homenaxeada no Día das Letras Galegas. Vinte e catro artistas procedentes de diferentes lugares de Galicia e o Estado español participan nestas xornadas de convivencia e difusión das artes plástica, que levan catorce anos achegando á cidadanía de Brión á pintura, ao debuxo, á fotografía e á literatura.

O programa de actividades comeza o venres 14 de xuño pola mañá coa visita aos centros escolares do concello dos artistas José A. Regidor, Frutos Casado de Lucas e José Galarzo que van impartir uns obradoiros simultáneos de acuarela, dirixidos ao alumnado do CEIP de Pedrouzos e do IES de Brión.

Pola tarde, e despois do acto oficial de benvida, os artistas afrontarán a primeira xornada de pintura do natural na contorna da Igrexa dos Ánxeles ou nos xardíns do Hotel Casa Rosalía. Unha oportunidade única para observar o traballo dos pintores e das pintoras participantes neste evento, nun auténtico obradoiro de pintura ao aire libre na fermosa contorna arquitectónica e paisaxística da parroquia de Os Ánxeles.

O mesmo venres, ás 21:00 horas, a Sala Municipal de Exposición acollerá a inauguración da mostra das obras doadas polos artistas participantes no XIII Encontro coa Arte “Lembrando a Mª Victoria Moreno, celebrado en xuño de 2018. Unha exposición que poderá visitarse durante as vindeiras semanas no mencionado espazo, situado na planta baixa da Casa da Cultura de Brión.

O sábado os artistas desprazaranse ata a Carballeira de Santa Minia, lugar onde pintarán durante toda a mañá. Asemade, neste mesmo espazo e a partir das 10:00 horas, dará comezo o III Concurso de Debuxo e Pintura rápida dirixido a rapazas e rapaces de 4 a 17 anos. Consultar as bases nesta ligazón.

Ese mesmo día, a partir das 21:00 horas e no Centro Social Polivalente, Teatro do Atlántico presenta “De abrentes e ocasos”, un recital poético-musical de poesía galega contemporánea. Participarán como intérpretes: María Barcala, Aleixandre Lago, Xulio Lago. A música correrá a cargo de Nani García. A entrada será libre ata completar aforo.

Na mañá do domingo, os Encontros rematarán por este ano cunha nova sesión de pintura do natural. Nesta ocasión, o lugar elixido para que as/os artistas trasladen as súas ferramentas de pintura e debuxo non é outro que a contorna das Torres de Altamira. Un lugar referencial da historia de Brión que os artistas inmortalizarán nos seus lenzos e coas súas cámaras.

Unha última cousa que, de seguro, interesará a todas as afeccionadas e todos os afeccionados á arte, durante as tres xornadas deste evento, a sala de exposicións municipal acollerá un Mercado da Arte. Un lugar onde as pintoras e os pintores participantes no Encontro expoñerán para venta unha selección das súas obras en diferentes formatos. O horario de apertura será:

- Venres, de 16:30 a 20:30 h.

- Sábado, de 9:30 a 14:00 h. e de 17:00 a 21:00 h.

- Domingo, de 9:30 a 14:00 h.

Seguir lendo

Exposición sobre Manuel María no Centro Social de Brión

Con motivo da celebración do X Encontro coa Arte, unas xornadas de convivencia artística e creativa que se celebraron en Brión os días 19, 20 e 21 de xuño, o escritor Manuel María foi a figura das nosas letras que inspirou aos artistas participantes nesta recoñecida actividade.

Poeta, dramaturgo, narrador, ensaísta e académico da Lingua galega, Manuel María finou en 2002 deixando tras de si unha longa xeira creativa, caracterizada polo seu compromiso político coa lingua, cultura e a sociedade galegas. Unha traxectoria que vai ser recoñecida en 2016 no Día das Letras Galegas, significativa data que se dedicará a homenaxear a súa figura.

Un merecido recoñecemento ao que Brión se adiantou no Encontro coa Arte: Lembrando a Manuel María. Dentro das actividades programadas nas mencionadas xornadas destaca unha exposición dedicada ao autor que dende o 20 de xuño e ata o 26 de xullo de 2015 pode visitarse no Centro Social Polivalente. Trátase da exposición “Manuel María, palabra viva” amablemente cedida para esta ocasión pola “Fundación Manuel María de Estudos Galegos” 

Unha mostra que percorre a vida e obra de Manuel María en 25 paneis de 75x53 cm. Citando a presentación da propia institución: “Os paneis constan de imaxes, textos do propio autor e dunha breve introdución. Estrutúrase en tres grandes grupos temáticos: o que trata aspectos da súa biografía, o que informa sobre a súa obra e os temas da mesma e un último grupo, que dá conta das homenaxes e recoñecementos que recibiu Manuel María”. Unha oportunidade única para coñecer ao poeta da Terra Chá antes que ninguén, adiantándose ás celebracións e homenaxes que viviremos dentro dun ano.

Seguir lendo

O poeta Manuel María homenaxeado no Encontro coa Arte 2015

Os días 19, 20 e 21 de xuño regresan os Encontros coa Arte, unas xornadas de creación e convivencia artística que este ano celebran a súa décima edición. Coa inspiración das paisaxes brionesas e a lembranza dunha figura das nosas letras, os encontros reunirán en Brión durante a fin de semana a vinte e oito artistas plásticos procedentes de toda España.
Este ano, o escritor homenaxeado vai ser o escritor Manuel María, un autor comprometido política e socialmente coa cultura galega. O seu legado estará presente durante os encontros en diversas actividades, entra as que destaca a exposición “Manuel María, a palabra viva”. Unha mostra cedida pola “Fundación Manuel María de Estudos Galegos” que poderá visitarse no Centro Social dende o 20 de xuño ata o 26 de xullo .
Os pintores comezarán co seu primeiro obradoiro de pintura do natural o venres 19 de xuño ás 16:00 horas na entorna de Fonteparedes, na parroquia de Ons. Alí traballarán nos seus lenzos ata as 19:00 h., nunha oportunidade única, aberta a toda a cidadanía, para gozar en vivo do proceso creativo e artístico que conduce á realización dunha obra de arte.
Ese mesmo día, ás 20:30 h., comezará no espazo multiusos do Centro Social o concerto “A lúa prendeu a luz” a cargo do grupo “Puntadas sen fío”, formado pola vocalista Xiana Lastra, o encargado da percusión Juan Collazo e o saxofonista Roberto Rama. A entrada será libre ata completar aforo.
Inmediatamente despois, inaugurarase na Sala de Exposicións Municipal de Brión (Casa da Cultura) a exposición das obras doadas polos artistas participantes no VIII Encontro coa Arte, “Lembrando a Roberto Vidal Bolaño”, celebrado en xuño de 2013.
O sábado 20 e o domingo 21, os artistas retomarán os seráns de pintura ao aire libre abertos a todos os veciños. O primeiro día poderemos atopalos na entorna da Igrexa parroquial de Sta. María de Viceso de 10:00 a 13:30 h. O domingo, no mesmo horario, ficarán pintando no Paseo do Río Pego.
Paralelamente ás xornadas, a Sala de Exposicións Municipal da Casa da Cultura acollerá un “Mercado da Arte”, que estará aberto o sábado de 10:00 a 14:00 h. e 16:30 a 21:30 h. O domingo volverá abrir de 10:00 a 14:00 h.

Seguir lendo

ENCONTRO COA ARTE 2014-TROBADA D'ART. DE L'EMPORDÀ A GALICIA

Os días 27, 28 e 29 de xuño a arte e os artistas son os protagonistas dunha fin de semana onde os pinceis e os cabaletes dunha vintena de pintores trasladaranse ao aire libre para descubrir aos veciños e visitantes de Brión o proceso creativo polo que un lenzo en branco se transforma nunha obra de arte.

Porque regresa o Encontro coa Arte, unhas xornadas de convivencia e creación artística que nesta ocasión nos agasallan cunha edición moi especial. Un Encontro que se antolla diferente, no senso que se converte nun intercambio cultural e artístico entre Galicia e Cataluña, froito dun convenio de colaboración asinado o pasado ano entre o Concello de Brión e a localidade xerundense de Castell-Platja d’Aro.

Na primavera de 2013, e baixo a denominación de “Trobada d’ Art. De l'Empordà a Galicia”, unha decena de artistas galegos participan xunto con catorce creadores cataláns nunha exposición colectiva que permaneceu aberta ao público na citada vila xerundense ata o día 5 de maio de 2013.

Nos vindeiros días, será unha representación de artistas cataláns os que visita Brión para participar no “IX Encontro coa Arte. De l’Empordà a Galicia”. Unha xornadas nas que dez creadores procedentes de Girona convivirán con doce pintores galegos, ofrecéndonos a posibilidade de participar do seu talento nunha exposición artística e tamén nos obradoiros creativos ao aire libre onde os veremos traballar.

Programa:

O venres 27 de xuño, ás 13 h., terá lugar na casa do concello unha recepción institucional que abrirá o IX Encontro coa Arte. Pola tarde, os artistas trasladaranse ata a entorna natural de Ponte Maceira para realizar a primeira xornada de pintura do natural neste fermoso lugar. As 20:30 h., no Centro Social Polivalente, celebrarase o concerto “A miña primeira Rosalía”, un recital no que participan María Manuela, Xiana Lastra, Mini e Mero; un espectáculo de balde ao que está convidado todo o mundo ata completar aforo.

O sábado 28 pola mañá, os artistas trasladan os lenzos en branco ata a parroquia de Bastavales para enchelos coas cores do lugar que inspirou os famosos versos de Rosalía de Castro. Ao serán, ás 21:30 h., terá lugar a inauguración da exposición “Encontro de Arte "De L'Empordá a Galicia", una mostra colectiva de pintura a cargo dos artistas cataláns e galegos que participan no encontro. Poderase visitar de balde na Sala de Exposicións do Concello de Brión ata o vindeiro 18 de xullo.

O domingo 29, os obradoiros de pintura do natural trasládanse ata o Paseo do Río Pego, en Pedrouzos. Un lugar no que os pintores pasarán a mañá creando as obras que logo doarán a pinacoteca municipal para formar parte do patrimonio artístico do concello.

Seguir lendo

Encontro coa Arte: Lembrando a Roberto Vidal Bolaño

Os días 28, 29 e 30 de xuño celébrase o VIII Encontro coa Arte que este ano homenaxea a figura do ilustre dramaturgo Roberto Vidal Bolaño. Unhas xornadas que van reunir durante unha fin de semana preto dunha trintena de artistas que participarán en diferentes actividades e realizarán varios obradoiros de pintura do natural en varios lugares do concello.

O Encontro coa Arte deste ano iníciase o venres 28 de xuño a mediodía, coa recepción dos participantes nun acto, presidido polo alcalde José Luís García García, que vai celebrarse no Salón de Plenos Municipal. Dende as 16:15 horas os artistas pintarán na entorna natural da Igrexa parroquial de Sta. María de Luaña. Unha ocasión única para contemplar aos pintores e participar do proceso creativo que desemboca na creación dunha obra de arte.

Pero o principal acto do día vai ser por partida dobre: por un lado a homenaxe a Roberto Vidal Bolaño, protagonista indiscutible deste ano no que o Día das Letras Galegas nos achegou a vida e a obra deste xenial autor; por outro a inauguración da exposición das obras doadas no VII Encontro coa Arte “Lembrando a Castelao”. Ámbolos dous terán lugar na Sala de Exposicións da Casa da Cultura de Brión a partir das 21:00 h.

Por este motivo, a BPM de Brión pechará as súas portas ás 20:00 h. en lugar de as 22:00 h. Pedimos desculpas polas molestias ocasionadas e convidamos a todos os usuarios da biblioteca a acudir ao mencionado acto.

Seguir lendo

VII Encontro coa Arte: Lembrando a Castelao

Un ano máis o Concello de Brión presenta as xornadas Encontro coa Arte, que nesta sétima edición homenaxean a unha das grandes figuras das nosas letras e da nosa arte: Alfonso R. Castelao. Ademais das charlas, coloquios, exposicións, obradoiros de pintura do natural en diversos lugares do concello,  a gran novidade desta edición son os actos que terán lugar na vila natal de Castelao, grazas á colaboración co Concello de Rianxo (A Coruña). O encontro celebrarase os días 1, 2 e 3 de xuño.
Para máis información sonbre o VII Encontro coa Arte: Nova en Infobrion.com

Seguir lendo