Estamos na Carballeira de Sta Minia dende 1989.
Sala xeral. Estudo, lectura e acceso a Internet.
Sala infantil, cálida e luminosa.
Acceso á información a través dos novos soportes dixitais.
A biblioteca de todos e cada un.
A novela mergúllanos nunha montaña rusa emocional, onde o autor explora temas como o amor, a familia e os medos que nos definen. Palomas constrúe unha historia que impacta ao lector, facéndoo reflexionar sobre as relacións humanas e os sentimentos máis profundos. Ademais, a súa narrativa destaca pola capacidade de conectar co público, ofrecendo momentos de humor, dor e tenrura.
Para comentala reunirémonos o xoves 19 de xuño, coma sempre na biblioteca municipal.
A obra narra a historia de Paula, unha muller que, tras varios anos emigrada no Reino Unido e despois dun revés na súa vida, decide regresar á súa vila natal para comezar de novo. Abandona a súa carreira na docencia e investigación universitaria para dedicarse á artesanía de instrumentos musicais. Nesta etapa da súa vida, Paula cuestiona se realmente paga a pena perseguir aquelas cousas que se consideran "para toda a vida".
A novela aborda temas como a emigración, o retorno ás raíces e a busca de sentido na estabilidade. A través dunha narrativa concisa e unha representación auténtica da oralidade, Eva Moreda explora a complexidade das relacións humanas e a constante procura de identidade e propósito.
Para comentar a obra, reunirémonos o xoves 24 de abril a partir das 20:00 h. Coma sempre, na biblioteca municipal.
Nesta caso, da man dunha autora como é Hiromi Kawakami, coñecida polo seu estilo evocador e pola súa capacidade para capturar as emocións e relacións humanas de xeito sutil e introspectivo. A súa carreira literaria comezou nos anos 90, e rapidamente acadou recoñecemento pola súa prosa lírica e minimalista, a miúdo cargada de elementos fantásticos ou oníricos.
A obra escollida é “El cielo es azul, la tierra blanca”, onde a autora nos presenta a historia de Tsukiko, unha muller que ten 38 anos e unha vida solitaria. Un día, atopa nunha taberna ao seu vello mestre de xaponés e entre ámbolos establécese un pacto tácito para compartir a soidade.
Cunha prosa sensual e depurada, Kawakami cóntanos unha historia de amor moi especial: o achegamento sutil de dous amantes, con toda a súa íntima beleza, tenrura e profundidade. Todo un descubrimento literario que compartiremos no club de lectura e comentaremos na vindeira xuntanza.
A obra escollida nesta ocasión é “Faneca brava”, unha novela que afonda na vida de Carmucha, unha muller galega cunha vida marcada pola loita, os segredos e as complexidades emocionais. Ambientada nunha Galicia que se transforma co paso do tempo, “Faneca brava” convida ao lector a reflexionar sobre as raíces, as decisións vitais e a capacidade de reinventarse fronte ás adversidades. É unha obra que combina intensidade emocional e unha visión lúcida sobre a condición humana, cun estilo áxil e envolvente.
A través dunha narrativa próxima e profundamente humana, Portas retrata a evolución desta protagonista ao longo das décadas, explorando temas como a liberdade, o amor, a emigración e a resiliencia feminina. Co autor, esperamos compartir a experiencia lectora desta obra e debater estes e outros aspectos da novela nunha vindeira xuntanza do Club, que realizaremos no mes de febreiro, nunha data que anunciaremos en breve.
Falamos de “Hotel Silencio”, unha obra que Luís Alonso Girgado definía como “Novela moderna, esencialmente nórdica, que lemos cunha sensación de estrañeza [...] Inquietante, perturbadora, de implacable dureza”. Ou cualificada como "Emocionante, excéntrica e escuramente divertida" polo xornal Sunday Times.
Despois de enfrontarse a unha separación conxugal, á demencia de súa nai e a un descubrimento perturbador, Jonas decide agarrar a súa caixa de ferramentas e facer unha viaxe só de ida a un país estraño e devastado pola guerra para desaparecer e darlle un fin definitivo a esta triste existencia. Pero os danos no Hotel Silencio no que se aloxa comezan a requirir as súas atencións, e tamén fano os hospedes, e os habitantes da cidade, e o seu plan apraza unha e outra vez.
A autora, Ava Olafsdóttir, é unha recoñecida escritora nada en Reiquiavik, profesora de Historia da Arte e directora do Museo da Universidade de Islandia. Entre os premios acadados, destacan o Premio de Literatura de Islandia, o Premio de Literatura do Consello Nórdico (2018) ou o Premio Médicis Estranxeiro (2019).
Para por en común esta nova experiencia lectora do club, reunirémonos o xoves 9 de xaneiro ás 20:00. Como sempre, na biblioteca municipal.
Arrancamos a temporada de lecturas con Paul Auster e “Un home na escuridade”
Finado a finais de abril de 2024, Paul Auster é un dos escritores norteamericanos contemporáneos de maior recoñecemento internacional. Poeta, ensaísta, novelista, escritor de guións, as súas narrativas adoitan explorar temas como a identidade, a soidade e o azar, reflectindo unha visión profundamente reflexiva e escura sobre a vida urbana moderna.
A obra escollida nesta ocasión,“Un home na escuridade" (“Man in the Dark”, 2008) publicada pola editorial Galaxia con tradución ao galego de Eva Almazán, é unha novela na que Paul Auster explora a soidade, a perda e a complexidade da realidade a través dunha narrativa que mestura a introspección persoal co suspense e a fantasía.
A historia céntrase en August Brill, un crítico literario xubilado que, convalecente, pasa as noites sen durmir imaxinando mundos alternativos. Nun destes mundos, os Estados Unidos están inmersos nunha guerra civil, reflectindo temas de división e violencia que lembran as tensións políticas contemporáneas.
Unha temática moi de actualidade, e máis no vindeiro mes de novembro, cando se celebran eleccións presidenciais nos EE. UU. cunha polarización social crecente que, de seguro, nos dará moito que comentar na xuntanza para por en común esta lectura.
Tras a lectura dunha obra literaria en lingua galega ou castelá (de xeito alternativo), realizaremos unha xuntanza na biblioteca para unha posta en común das nosas experiencias lectoras. Unhas reunións nas que, máis alá da obra literaria, os libros e a lectura serven de fío condutor para a análise e a reflexións sobre diversos temas de actualidade.
Para inscribirte no club de lectoras/es da biblioteca só é necesario que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos. Se precisas máis información ou queres inscribirte na actividade, por favor, diríxete á biblioteca a través do correo electrónico ou chama ao tfno. 981 50 99 69.
"Una librería en Berlín" céntrase na vida de Frenkel, unha muller xudía polaca, e o seu soño realizado. O seu establecemento, “La Maison du Livre”, convértese rapidamente nun faro de cultura e coñecemento, atraendo a unha clientela diversa e apaixonada pola literatura. A través das súas páxinas, Frenkel introdúcenos na efervescencia intelectual da época, marcada polas visitas de escritores e artistas, e o intercambio constante de ideas.
Non obstante, o ascenso do nazismo transforma radicalmente a súa vida e a da súa libraría. A atmosfera vólvese opresiva e perigosa, levando a Frenkel a un camiño de fuxida e resistencia. A medida que os horrores da persecución nazi se intensifican, Frenkel narra con detalle desgarrador a súa escapada de Berlín, os seus refuxios temporais en Francia e Suíza, e as dificultades que enfronta como refuxiada.
Para por en común as nosas experiencias lectoras, reunirémonos o día 15 de xullo nunha xuntanza que, como xa é costume, será un pouco diferente.
A historia que imos afrontar céntrase en Amalia, unha nai viúva e loitadora que trata de manter unida á súa peculiar familia. Cun estilo narrativo sutil e conmovedor, Palomas condúcenos a través dos pensamentos e sentimentos dos personaxes, explorando temas como o amor, a perda, a lealdade e a aceptación. Á medida que a trama avanza, desvélanse segredos do pasado que impactan no presente da familia, desencadeando momentos de tensión e reflexión.
Para comentala reunirémonos o luns 29 de abril, como sempre, ás 20:00 h. na biblioteca municipal.
A historia que presenta é a de Frado, unha moza mestiza de nai branca e pai afroamericano, que é abandonada pola súa nai e convértese en criada no fogar dunha familia branca en Massachusetts durante o século XIX. A novela é unha mestura de ficción e realidade, e inspírase na novela sentimental, a narrativa de escravos e a narrativa de conversión relixiosa.
A autora, Harriet E. Wilson, que de solteira era Adams, naceu en Milford o 15 de marzo de 1825 e faleceu en Quincy o 28 de xuño de 1900. Tras quedar orfa a unha idade temperá, traballou como "serventa contratada" e máis tarde como empregada doméstica e costureira.
A novela "A nosa Negra" foi publicada de forma anónima e pasou moito tempo na escuridade ata que foi redescuberta en 1982 polo crítico literario e historiador Henry Louis Gates Jr.
Para comentala reunirémonos o vindeiro 18 de marzo. Como sempre, na biblioteca municipal.
Unha historia que se centra en Isabel Osmond, unha dama que foxe de Roma e un matrimonio devastador para repoñerse en Londres tras descubrir a traizón do seu esposo. A novela aborda temas como a deslealdade, a corrupción e a viaxe de Isabel para superar a revelación da traizón do seu marido.
John Banville, que tamén emprega o pseudónimo de Benjamin Black para as obras de xénero negro que publica, é un recoñecido escritor irlandés en lingua inglesa que en 2005 acadou o Premio Booker e en 2014 o Premio Princesa de Asturias de las Letras, entre outros. Tras de si ten unha longa traxectoria como novelista, dramaturgo, guionista critico literario e xornalista.
Para comentar a obra, reunirémonos na biblioteca o vindeiro día 19 de febreiro.
Imaxe: CC: Unai Arnaz Imaz
Iniciamos unha nova xeira do Club de lectura da biblioteca municipal. E para comezar esta nova etapa, a obra escollida para ler e por en común é “Violeta” da escritora chilena Isabel Allende.
Unha recoñecida autora que en 2022 publicou esta novela que narra a historia épica e emocionante dunha muller dende 1920, coa “gripe española” ata a pandemia de 2020. Unha vida que será moito máis que a historia dun século.
Para comentar a experiencia lectora, reunirémonos na biblioteca municipal o vindeiro 27 de novembro ás 20: 00 h.
Tras a lectura dunha obra literaria en lingua galega ou castelá (de xeito alternativo), realizaremos unha xuntanza na biblioteca para unha posta en común das nosas experiencias lectoras. Unhas reunións nas que, máis alá da obra literaria, os libros e a lectura serven de fío condutor para a análise e a reflexións sobre diversos temas de actualidade.
Para inscribirte no club de lectoras/es da biblioteca só é necesario que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos. Diríxete á biblioteca a través do seus correos electrónicos ou chama ao tfno. 981 50 99 69 para participar nesta actividade.
 |
| Cartel Club de lectura 23-24 |
Publicada en 1962, recolle sete contos (oito na segunda edición) onde a infancia é a protagonista, pois todos están postos en boca de sete rapaces de diferentes idades que van contando experiencias persoais do intenso e ás veces dramático mundo infantil. Estes relatos pertencen, sen dúbida, ao núcleo das mellores páxinas que nos deixou este mestre da moderna narrativa galega.
Para comentalos reunirémonos na biblioteca municipal o martes 27 de xuño, como sempre, ás 20:00 h.
Charo, de xeito amable e desinteresado, achegouse ata a biblioteca municipal para participar na reunión e partillar connosco detalles sobre o proceso creativo da súa última obra, un libro de relatos publicado en 2022 pola editorial Galaxia (que, por certo, presentamos en Brión o pasado ano).
Un enriquecedor e entretido serán no que compartimos impresións e coñecemos, polo miúdo e de primeira man, unha interesante obra que recomendamos ler a todo o mundo.
Moitas grazas, Charo!
 | Concerto: A escola en itinerancia 16/05/2012 |