"Para toda a vida" de Eva Moreda, nova lectura do club

Despois dunha emotiva viaxe polo Xapón da man de Hiromi Kawakami, regresamos a paisaxes e situacións que nos resultarán máis familiares, recreadas pola pluma dunha autora do país, Eva Moreda. Porque a vindeira lectura do club vai ser "Para toda a vida", unha novela curta da mencionada escritora publicada en 2020 por Aira Editorial.

A obra narra a historia de Paula, unha muller que, tras varios anos emigrada no Reino Unido e despois dun revés na súa vida, decide regresar á súa vila natal para comezar de novo. Abandona a súa carreira na docencia e investigación universitaria para dedicarse á artesanía de instrumentos musicais. Nesta etapa da súa vida, Paula cuestiona se realmente paga a pena perseguir aquelas cousas que se consideran "para toda a vida".

A novela aborda temas como a emigración, o retorno ás raíces e a busca de sentido na estabilidade. A través dunha narrativa concisa e unha representación auténtica da oralidade, Eva Moreda explora a complexidade das relacións humanas e a constante procura de identidade e propósito.

A autora naceu na Veiga de Ribadeo. Obtivo o Premio Terra de Melide, o Narrativas Quentes, o Manuel Murguía e o San Clemente entre outros. É profesora titular de Musicoloxía na Universidade de Glasgow.

Para comentar a obra, reunirémonos o xoves 24 de abril a partir das 20:00 h. Coma sempre, na biblioteca municipal.

Publicado en: actividades , animación á lectura , club de lectura , Eva Moreda