#HoxeEscriboEn 2023: Relatos para viaxar polos concellos da provincia da Coruña

 A Biblioteca Provincial e Turismo da Deputación da Coruña lanzan unha nova edición do concurso #HoxeEscriboEn. Porque, 93 concellos da provincia dan para moito escribir. Trátase dunha iniciativa que busca sacar á luz o noso talento creativo, ao mesmo tempo que fomentar o patrimonio dos concellos nos que vivimos.

Para participar, redacta un relato ambientado ou referido ao concello no que vives; pode estar relacionado coa historia local, con unha lenda, con unha tradición do teu concello, con un persoeiro destacado, cos valores positivos do teu concello, a riqueza natural, cultural ou medioambiental... calquera aspecto que axude a destacar o lugar no que vives.

O prazo de presentación dos textos é dende o 1 de xullo ata o 31 de agosto. Podes consultar as bases de participación premendo aquí.

Anímate a participar e presume do teu concello! 

Seguir lendo

A brionesa Mariña Souto Pazó acada un accesit no certame “Coñece o teu concello” de La Voz de Galicia

A brionesa Mariña Souto Pazó, estudante no CEIP de Pedrouzos, ven de acadar na categoría de redacción un dos accésits do concurso “Coñece o teu concello”, una iniciativa promovida polo xornal La Voz de Galicia en colaboración co Concello de Santiago e a Deputación da Coruña.

Mariña, de dez anos de idade, escribiu en dous días unha fermosa historia sobre os cabalos da Fonte de Praterías e o seu afán por converterse en unicornios. Para conseguilo, deberán visitar o lugar de Cornanda no Concello de Brión, na procura dos desexados cornos cos que acadar a súa arela.

Comenta Mariña en “La Voz de Galicia” que ultimamente na escola escribe bastante, e mesmo que goza de facelo, “aínda me gusta máis a ciencia”. A rapaza brionesa foi unha das seis premiadas neste certame do xornal La Voz, onde participaron máis de mil crianzas dos vinte e cinco concellos da contorna de Santiago. Todas e todos mostraron a súa particular visión do mundo que os rodea, dun xeito “diferente e cristalino” como comenta o delegado do mencionado xornal en Compostela, Ignacio Carballo.

O rexedor compostelán, Sánchez Bugallo, foi o encargado de pechar a entrega de premios. Non só felicitou ás gañadoras e aos gañadores, tamén a todas e a todos os participantes, a nais e pai e a mestras e mestres, “que son os que canalizan esta participación”.

Seguir lendo

Xavier Lama recibe en Brión o premio de teatro Laudamuco

O xoves, 16 de maio, ás 12:00 h. tivo lugar na Sala Municipal de Exposicións de Brión a cerimonia de entrega do Premio Laudamuco para textos teatrais que na súa primeira edición recaeu en Xavier Lama. Un certame literario organizado polo Concello de Brión en colaboración coa Asociación Galega de Teatro e a editorial Positivas.

O autor participou neste certame coa obra “Na miña alma ouvea un lobo”, presentada baixo o lema “Refachos de dor”. O texto dramático foi seleccionado entre os 54 traballos presentados por un xurado que o escolleu pola "capacidade do autor para explorar, con notable eficacia dramática e a través de sucesos e personaxes tomados da realidade, zonas escuras de funcionamento dos estados modernos, sen impoñerlle ao lector puntos de vista únicos"

Xavier Lama recibiu un premio en diñeiro por valor de 7.000 euros. Unha cantidade que o converte no premio teatral de maior dotación económica dos existentes no panorama galego. Asemade, levou unha peza artística conmemorativa orixinal deseñada polo artista Xosé Vizoso e a editorial Positivas publicará o texto premiado.

Ao acto asistiron diversos persoeiros do mundo da política, as artes escénicas e a cultura, encabezados por José Luís García, alcalde de Brión. Como oradores tamén participaron na cerimonia Francisco Macías, da editorial Positivas; o escritor Manuel Guede, representando ao xurado do certame e Eduardo Alonso, vicepresidente da Academia Galega de Teatro. Unha sorpresa  foi a intervención do presidente da Real Academia Galega, Víctor  Freixanes. O acto rematou coa intervención do autor, que minutos antes recibiu o  recoñecemento ao seu talento da man do rexedor brionés.

O premio Laudamuco toma a súa denominación do personaxe central do texto dramático de Roberto Vidal Bolaño "Laudamuco, señor de ningures", co que a Compañía "Antroido" deu un paso decisivo na historia do Teatro Galego outro 16 de maio, pero do ano 1977. Con esta iniciativa, o Concello de Brión quere que esta data se converta  nun momento para o recordo, o recoñecemento e a celebración das nosas artes escénicas.

Seguir lendo

Dous brioneses premiados no XVI Certame Literario do Concello de Ames

O pasado 10 de maio o Concello de Ames deu a coñecer o nome das premiadas e dos premiados no XVI Certame Literario Concello de Ames. Na edición deste ano dúas novas promesas brionesas da escritura acadaron cadanseu recoñecemento.

Falamos de Noa de Blas Sánchez, que conseguiu o 3º Premio na 1ª categoría (ata 13 anos) da modalidade de poesía e de Daniel Souto Pazó, tamén 3º Premio na 2ª categoría (14 a 17 anos) na modalidade de narrativa.

O concurso literario reuniu un total de 176 traballos procedentes de localidade de toda Galicia e varias do resto de España, a cifra máis elevada dende a creación deste certame. O veredicto recaeu nun xurado que estivo composto pola escritora e profesora Ana R. Figueiredo; o escritor e poeta Rafa Vilar González; e pola investigadora de literatura Carmen Ferreira Boo .

A entrega de premios celebrarase o xoves, 16 de maio, nun acto que se desenvolverá na Casa da Cultura do Milladoiro.A listaxe completa de gañadores pode consultarse na seguinte ligazón. Parabéns ás gañadoras e aos gañadores.

Seguir lendo

Convocado o V Premio Literario Nortear

Ven de convocarse o V Premio Literario Nortear, un certame dirixido aos novos escritores de Galicia e o Norte de Portugal que acadou unha destacada repercusión en edicións anteriores. Trátase dunha das actuacións impulsadas ao abeiro do Programa Nortear, unha iniciativa cultural nada da colaboración entre a Consellería de Cultura e Turismo xunto coa Dirección Rexional de Cultura do Norte de Portugal e a Agrupación Europea de Cooperación Territorial Galicia-Norte de Portugal.

No concurso poderán participar persoas nadas e /ou empadroadas na Rexión Norte de Portugal ou na Galicia, con idades comprendidas entre os 16 e os 36 anos. O prazo para a presentación das obras permanecerá aberto ata o 28 de xuño de 2019 (inclusive). Serán admitidas a concurso todas as obras presentadas, de acordo ao disposto na convocatoria, que teñan data de entrada no seguinte enderezo ata o 28 de xuño de 2019 (inclusive):

Agrupación Europea de cooperación Territorial Galicia – Norte de Portugal
Edificio CETMAR,
Rúa Eduardo Cabello, s/n
36208 BOUZAS – VIGO

Consulta as bases de participación na seguinte ligazón: Bases

Seguir lendo

II Certame Literario IES de Brión 2019. Prazo de presentación ampliado ata o 24 de abril

Para conmemorar o Día das Letras Galegas, o IES de Brión e a ANPA Pedra Viada organizan por segundo ano o Certame Literario IES de Brión 2019. Un concurso que nesta edición presenta o lema "Avoa, cóntame outra vez", en relación coas historias de avoas e avós reais ou imaxinarios, contadas aos seus netos que nos gustaría ter escoitado algunha vez.

O certame de creación literaria está dirixido ao alumnado do centro de Secundaria de Brión, onde os interesados e interesadas poderán participar presentando obras orixinais nas modalidades de relato curto, poesía e ensaio; cun máximo de tres traballos por cada unha das modalidades. 

1. BASES:

 

Poderá participar todo o alumnado matriculado no IES de Brión no curso 2018/19, cun máximo de tres traballos, un por cada unha das modalidades das que consta o certame. Esta cita está pensada para conmemorar o 17 de Maio, así que a lingua empregada será o galego.

2. MODALIDADE DE RELATO CURTO:

-Establécense dúas categorías:

 

Cat. A (Iº ,2º e 3º de ESO)
Cat. B ( 4º de ESO e BAC)

A extensión dos traballos oscilará entre os dous folios de mínimo e os catro de máximo, en tipo de letra Times New Román, tamaño 12 e entreliñado 1,5.

3. MODALIDADE POESÍA:

-Establécense dúas categorías:

Cat. A (Iº , 2º e 3º da ESO)
Cat. B (4º de ESO e BAC)

Os traballos contarán cun mínimo de 20 versos.

4. MODALIDADE DE ENSAIO:

-Establécense dúas categorías:

Cat. A (1º, 2º e 3º de ESO)
Cat. B (4º de ESO e BAC)

A extensión dos traballos oscilará entre os dous folios de mínimo e os catro máximo, en letra Times New Román tamaño 12 e entreliñado 1,5.

5. ENTREGA DOS TRABALLOS:

A data límite para participar no certame é o 24 de abril [PRAZO AMPLIADO]. Os traballos deberán entregarse en conserxería do Instituto no interior dun sobre, que no seu exterior indicará so o lema do Certame Literario. Irán asinados unicamente cun pseudónimo xunto á categoría á que pertencen, acompañados doutro sobre máis pequeno en cuxo interior figurará a identidade real da autora ou autor do traballo.

6. PREMIOS:

 

O xurado elixirá tres premios por cada categoría, en cada unha das tres modalidades:

1º Premio: 60 €
2º Premio: 40 €
3º Premio: 20 €

O fallo do xurado darase a coñecer no IES de Brión, nas vésperas do 17 de maio.

A organización do Certame Literario IES DE BRIÓN 2019 resérvase a potestade de publicar o contido dos traballos gañadores. O obxectivo de dalos a coñecer é exclusivamente poñer en valor o esforzo creativo dos participantes e animar a que cada vez máis alumnado se sume a esta cita.

Seguir lendo

O certame literario "As mulleres da miña vida" amplia prazo de presentación de textos

Como xa informaramos neste blog, o IES de Brión a a ANPA Pedra Viada organizan para conmemorar o Día das Letras Galegas 2018 o 1º Certame Literario Maio en Brión, que nesta edición inaugural toma como referencia o lema "As mulleres da miña vida". 

Un concurso dirixido ao alumnado do centro de Secundaria de Brión matriculado no curso 2017/18, onde os interesados e interesadas poderán participar presentando obras orixinais nas modalidades de relato curto, poesía e ensaio; cun máximo de tres traballos por cada unha das modalidades.

Para todas as persoas interesadas en participar, e que aínda non presentaron os seus textos a concurso, hai unha boa nova. Segundo nos informou a organización, ampliase o prazo para facelo ata o vindeiro día 9 de maio. Se queres coñecer as bases que rexen este concurso literario, preme na seguinte ligazón.

Anímate a participar! Anda estás a tempo.

Seguir lendo

As mulleres da miña vida: I Certame Literario Maio en Brión organizado polo IES de Brión e a ANPA Pedra Viada

O IES de Brión a a ANPA Pedra Viada organizan para conmemorar o Día das Letras Galegas 2018 o 1º Certame Literario Maio en Brión, que nesta edición inaugural toma como referencia o lema "As mulleres da miña vida".

Un concurso dirixido ao alumnado do centro de Secundaria de Brión matriculado no curso 2017/18, onde os interesados e interesadas poderán participar presentando obras orixinais nas modalidades de relato curto, poesía e ensaio; cun máximo de tres traballos por cada unha das modalidades.

BASES:

1. Poderá participar todo o alumnado matriculado no IES de Brión no curso 2017/18 cun máximo de tres traballos, un por cada unha das modalidades. Esta cita está pensada para conmemorar o 17 de Maio, así que a lingua empregada será o galego.

2. Os traballos tomarán como referencia o lema do certame: "As mulleres da miña vida". 

3. MODALIDADE DE RELATO CURTO. Establécense dúas categorías:

- CAT A (1º, 2º e 3º de ESO)

- CAT B (4º de ESO e BACH)

A extensión dos traballos oscilará entre as dúas e as catro páxinas, cun corpo de letra 12 e interliñado 1,5.

4. MODALIDADE POESÍA. Establécense dúas Categorías:

- CAT A (1º, 2º e 3º de ESO)

- CAT B (4º de ESO e BACH)

Os traballos contarán cun mínimo de 20 versos.

5. MODALIDADE DE ENSAIO. Establécense dúas categorías:

- CAT A (1º, 2º e 3º de ESO)

- CAT B (4º de ESO e BACH)

A extensión dos traballos oscilará entre as dúas e as catro páxinas, cun corpo de letra 12 e interliñado 1,5.

6. ENTREGA DOS TRABALLOS. A data límite para participar no certame é o 30 de abril. Os traballos deberán entregarse en conserxería no interior dun sobre, que no exterior indicará só o lema do Certame Literario. Irán asinados unicamente cun pseudónimo xunto á categoría á que pertence. No interior doutro sobre máis pequeno deberá figurar a identidade real da autora ou autor.

7. PREMIOS. O xurado elixirá tres premios por cada categoría, en cada unha das tres modalidades.

1º Premio: 60 €

2º Premio: 40 € 

3º Premio: Lote de material
O fallo do xurado darase a coñecer a véspera do 17 de maio.

Seguir lendo

Dous brioneses premiados no XIV Certame Literario de Narrativa e Poesía do Concello de Ames

O alumnado do IES de Brión volta a ser noticia, nesta ocasión, pola excelencia en creación literaria dos rapaces brioneses Daniel Souto Pazó e Manuel Xiráldez Leal. Ámbolos dous veñen de acadar máximos recoñecementos no XIV Certame Literario de Narrativa e Poesía celebrado no veciño Concello de Ames.

Daniel Souto Pazó recibiu o 1º Premio na categoría de narrativa, modalidade de ata 13 anos, coa obra "Vía Libre". Pola súa banda, Manuel Xiráldez Leal destacou en poesía, modalidade 14 a 17 anos, onde obtivo o 1º Premio desta categoría coa obra "De amor en vela".

O xurado deste popular certame estivo composto nesta ocasión pola profesora e crítica literaria Dolores Vilavedra Fernández, que exerce o seu labor docente na Universidade de Santiago de Compostela. Asemade forma parte do consello de redacción da revista Grial e dirixe a sección de crítica literaria. Outro dos membros do xurado foi o escritor e profesor, Manuel Portas. O terceiro membro do xurado foi o filólogo e poeta Ismael Ramos Castelo gañador en varias ocasións no Certame Literario de Ames.

Parabéns aos premiados!

Seguir lendo