Club de lectura: serán na biblioteca con Eduardo Rojas

A última reunión do club de lectura foi moi especial. Unha xuntanza na que contamos coa presenza na biblioteca municipal de Eduardo Rojas, autor de “Y apenas nada”, unha novela e unha experiencia lectora que nos ocupou as últimas semanas.

Eduardo, escritor mexicano afincado en Galicia desde hai máis de dúas décadas, atendeu con enorme xenerosidade a invitación do club para compartir connosco os recantos do proceso creativo desta súa última obra, publicada en 2025 pola editorial Drácena.

Durante un serán que se estendeu case hora e media, tivemos a oportunidade de explorar da súa man os espazos narrativos da obra, a arquitectura íntima dos personaxes e os camiños, ás veces incertos, da creación literaria. As nosas impresións lectoras atoparon resposta, diálogo e complicidade nun intercambio vivo e fondamente enriquecedor que nos deixou un grato e duradeiro pouso.

Eduardo Rojas é, ademais, un vello e querido coñecido do noso club de lectura. En 2016 xa acudira a outra xuntanza para falarnos da súa novela “La mujer ladríllo”, outro título do autor que nos deixara unha profunda pegada.

En nome das persoas que integramos esta actividade da biblioteca municipal, só nos queda transmitir o noso agradecemento a Eduardo pola súa simpatía, amabilidade e total dispoñibilidade para participar nesta inesquecible xuntanza.

Seguir lendo

Club de lectura: "Y apenas nada" de Eduardo Rojas

Despois de achegarnos á obra do vigués Pedro Feijoo, o noso club de lectura cruza o Atlántico para recibir un autor que, malia a distancia xeográfica, sentimos moi próximo. Referímonos ao escritor mexicano Eduardo Rojas, un vello coñecido do noso club, ao que regresamos nesta ocasión para ler a súa última novela, Y apenas nada, publicada en 2025 pola editorial Drácena.

Nado en Ciudad de México, Eduardo é natural de Baixa California, por orixe e sentimento. Estudou Historia na Universidad Autónoma de México e na Universidade de Santiago de Compostela. Preto da capital galega reside e escribe dende hai anos.

“Y apenas nada” é un relato evocador, sinxelo no argumento, onde plasma a relación dunha nai co seu fillo desaparecido nunha aldea costeira do Golfo de California. Melancólica, escrita cunha prosa cargada de lirismo, Eduardo constrúe un relato que se le con avidez e se goza dende as primeiras páxinas ata as derradeiras.

Para comentar a obra, reunirémonos na biblioteca municipal o vindeiro 9 de abril ás 20:00 h. Unha xuntanza moi especial, pois desta vez contaremos nela coa presencia de Eduardo Rojas que nos acompañará para compartir connosco a súa experiencia creativa e recibir as nosas impresións lectoras.

Seguir lendo

O escritor Eduardo Rojas participa na xuntanza do Club de lectura

Se na anterior reunión do club de lectura contamos coa presenza de Manuel Iglesias Turnes para comentar a súa última novela, nesta ocasión visitou a biblioteca municipal de Brión o autor mexicano afincado en Galicia Eduardo Rojas Rebolledo, que nos acompañou o pasado mércores, 14 de decembro, para charlar sobre a súa obra “La mujer ladrillo”.

Editada polo Fondo de Cultura Económica, a novela narra a historia de Milagro, unha muller que naceu cunha discapacidade severa nunha vila da rexión de Baja California. Segundo nos presenta a propia editorial, a trama, en harmonía co personaxe, posúe unha estrutura circular, o lector inicia e termina o seu percorrido co recordo da protagonista asasinada polo asfalto baixo a follaxe; é, sobre todo, nas páxinas intermedias onde o lector descubrirá poderosas estampas que descobren os momentos máis esenciais da narración. Instantes que, polas súas imaxes, provocan no que cruza as súas páxinas incomodidade, proído.

Eduardo tivo a xentileza de asistir á xuntanza e comentar connosco a lectura en común que fixemos os integrantes do club. Unha oportunidade única e irrepetible para coñecer de primeira man o proceso creativo dunha novela moi recomendable, chea de lirismo e imaxes poéticas que espertan as emocións do lector.

Dixo o escritor Alfredo Conde que “Eduardo Rojas Rebolledo escribe límpido e pulido, diáfano como o aire da Baixa California, o que te leva dende o mar por unha estrada á que os cactos lle cobren a carreira”. Unha prosa que convida a ler de vagar, gozando das evocadoras imaxes que nos trasladan aos territorios da memoria do propio autor.

Eduardo Rojas naceu na cidade de México en 1970. Estudou a licenciatura en Historia na Facultad de Filosofía y Letras, da Universidad Nacional Autónoma de México. É fundador de revista “Epitafios”, da cal foi coordinador editorial ata 1994. En 1996 foi nomeado codirector do suplemento "Revista Mexicana de Cultura", do xornal El Nacional; colaborou en “Excélsior”, El Nacional e nas revistas “Tierra Adentro” e “Etcétera”. En 1991 obtivo mención honorífica no Concurso “Punto de Partida”, polo fragmento da súa novela inédita “A doble llave”. De 1994 a 1995 foi bolseiro do “Instituto Nacional de Bellas Artes” no xénero de novela e, en 1995, obtivo a bolsa do “Fondo Nacional para la Cultura y las Artes para Jóvenes Creadores”. Actualmente está afincado na Galicia, onde cursou estudos de posgrao na Universidade de Santiago de Compostela.

Fonte: Ed. FCE

Eduardo na BPM de Brión con varias das integrantes do Club de lectura.

Seguir lendo