Un ano máis, o Concello de Brión preparou, a través do Departamento de Cultura e da biblioteca municipal, unha programación especial de actividades para conmemorar o 17 de maio, que se vai estender dende do día nove deste mes ata o seis de xuño.
Un programa que podemos consultar polo miúdo visitando a páxina web municipal a través desta ligazón. Nel están incluídas actividades organizadas ou nas que colabora a biblioteca municipal.
Presentación bibliográfica/encontro literario
O día 5 de xuño, a Sala Municipal de Exposicións (Casa da Cultura) acollerá a presentación do libro “Fermosas: cantigas de amigo e de amor” do grupo Barahúnda (Helena de Alfonso e José Lara Gruñeiro), publicado pola editorial Toxosoutos.
Unha publicación, con códigos QR para descargas as cancións, que xira arredor da lírica medieval galaico-portuguesa, concretamente as cantigas de amor e amigo. Un artefacto musical, literario e divulgativo proxectado, na súa orixe, como un disco temático que reunise as cantigas que o grupo foi creando a través dos anos.
O serán iniciarase ás 20:00 h. no espazo indicado, con acceso libre ata completar a capacidade do local.
“Cantaruxa, Caruxa”: Un contacontos de Aida Cobas
O serán celebrarase na Sala Municipal de Exposicións o venres 6 de xuño ás 18:00 h., con acceso libre ata completar a capacidade do local. Se o desexas, podes reservar a túa localidade a través deste formulario web.
Esta actividade está patrocinada polo programa Ler conta moito da Rede de Bibliotecas de Galicia.
0 comentarios :
Publicar un comentario