Club de lectura: "El retrato de una dama" de Henry James

Continuamos as lecturas no Club, esta vez coa obra dun autor clásico da literatura norteamericana que imos ler en lingua castelá. Trátase de Henry James que entre 1880-1881 publicou de xeito seriado nas revistas The Atlantic Monthly e Macmillan's Magazine “El retrato de una dama” = The Portrait of a Lady , considerada unha das súas obras mestras.

A novela narra a historia de Isabel Archer, unha muller estadounidense que "afronta o seu destino", destino que atopa abafador. Tras herdar unha gran fortuna, convértese na vítima dun maquiavélico plan. Do mesmo xeito que outras moitas novelas de James, transcorre principalmente en Europa, particularmente en Inglaterra e Italia.

Esta fío narrativo serviu para que o escritor irlandés John Banville escribise “La señora Osmond”, coa historia de Henry James como pano de fondo. Unha obra que limos no Club de Lectura nunha temporada anterior.

Traducido por María Luísa Balseiro, o libro que agora nos ocupa será tema de conversa e debate na vindeira xuntanza do Club de Lectura da biblioteca municipal, que celebraremos o xoves 15 de xaneiro de 2026.

Ata entón, Felices Festas e boas lecturas!

Seguir lendo

"As peripecias de Xurxo", un espectáculo de títeres e clown para conmemorar o Día das Bibliotecas

Para conmemorar a celebración do Día das Bibliotecas (24 de outubro), a biblioteca municipal presentou en Brión “As peripecias de Xurxo” con Jouse García. Un serán de animación destinado a público infantil e familiar que se celebrou o xoves, 23 de outubro, ás 18:00 h. na Sala Municipal de Exposicións. Un espectáculo de narración oral con monicreques que tratou a temática do “bullying”, o acoso escolar e a autoestima, empregando os títeres e o clown.

A actividade, organizada pola biblioteca municipal, tivo unha moi boa recepción, cunha asistencia de público que superou as trinta persoas, entre crianzas e adultos acompañantes. O espectáculo contou co patrocinio do programa Ler conta moito.

Seguir lendo

Nova lectura do club: "Eu servín ao Rei de Inglaterra" de Bohumil Hrabal

Co inicio do outono, comezamos unha nova temporada de lecturas no Club. Para por en común na primeira xuntanza, arrancamos cun título do autor checo Bohumil Hrabal, publicado en lingua galega pola editorial Rinoceronte na colección Contemporánea.

Falo de “Eu servín ao Rei de Inglaterra”, un relato en primeira persoa dun aprendiz de camareiro no hotel Praga Dourada como fío condutor. Un mozo aparentemente insignificante pero extraordinariamente ambicioso, que soña con facerse rico e respectado servindo ás persoas adecuadas.

Cunha voz chea de ironía e humor, o protagonista vai percorrendo hoteis de luxo, situacións absurdas e episodios históricos tan brillantes como tráxicos, mentres observa —ás veces con inocencia, outras con descaro— como funciona realmente o mundo. Vivencias persoais enmarcadas na historia de Checoslovaquia dende os anos anteriores á ocupación nazi ata a chegada dos soviéticos e o comunismo.

O autor

Bohumil Hrabal (Brno, 1914 – Praga, 1997) estudou dereito, historia da literatura, arte e filosofía. Obrigado a deixar a vida académica, pasou por diferentes empregos, acumulando experiencias que lle servirían de inspiración para as súas obras, entre as que destacamos “Unha soidade demasiado ruidosa”, “Trens rigorosamente vixiados” ou esta que nos ocupa.

 

Para comentar o libro, reunirémonos o xoves 27 de novembro na biblioteca municipal, ás 20:00 h.

Seguir lendo

Iniciamos nova temporada do Club de Lectura da biblioteca

Trala pausa estival, en breve regresa ao programa de actividades da biblioteca o Club de lectura (adultos). Unha actividade de dinamización dirixida a maiores de 16 anos con gañas de compartir experiencias lectoras con outras persoas.

Funcionamento da actividade

Tras a lectura dunha obra literaria en lingua galega ou castelá (de xeito alterno), realizaremos unha xuntanza na biblioteca para unha posta en común das nosas experiencias lectoras. Unha reunión na que, máis alá da obra literaria, os libros e a lectura serven de fío condutor para a análise e a reflexións sobre diversos temas de actualidade. 

Inscrición na actividade

Para inscribirte no club de lectoras/es da biblioteca só é preciso que che guste ler (ou que queiras iniciarte neste enriquecedor hábito) e que lle dediques un pouco do teu tempo de lecer ás xuntanzas periódicas que faremos.
Se precisas máis información ou queres inscribirte na actividade, por favor, diríxete á biblioteca a través do correo electrónico ou chama ao tfno. 981 50 99 69.

Seguir lendo