Introcución á escrita creativa: un obradoiro con Gisele Mato para celebrar o Día da Poesía e o Día do Teatro en marzo

No mes que comeza, celebramos dúas datas enormemente significativas relacionadas coa literatura: o Día da Poesía, 21 de marzo, e o Día do Teatro, o 27 de marzo. Aproveitando estas efemérides, dende a biblioteca municipal desexamos convidar a toda a cidadanía a participar nun obradoiro de creación literaria dirixido a persoas maiores de 18 anos.
Baixo a denominación “Introdución á escrita creativa”, a actividade vai ofrecer un espazo de aprendizaxe e experimentación no que as persoas interesadas en escribir poden mellorar as súas habilidades, compartir e recibir comentarios das súas creacións. Este interesante serán será impartido por Gisele Mato, psicóloga e escritora, que comezou a escribir dende moi nova, acadando coa súa obra recoñecementos como o Premio de Poesía Pérez Parallé en 2022 ou o Premio Manuel Lueiro Rey de Poesía en 2024.

Requirimentos para participar

Para participar no obradoiro só será preciso ser maior de idade e ter interese na creación literaria. Unicamente precisas dun caderno e lapis e poderás ter ou non experiencia previa.
A actividade é totalmente de balde. Será preciso realizar unha inscrición previa a través deste formulario. Se o prefires, tamén podes porte en contacto coa biblioteca municipal a través dos medios habituais, ben sexa para recibir máis información ou anotarte na actividade.

 

Seguir lendo

Rosalía, tod@s por igual: un obradoiro lúdico para celebrar o Día de Rosalía

Para conmemorar o 24 de febreiro, Día de Rosalía, o sábado 29 a B.P.M. de Brión organizará un obradoiro lúdico-creativo a cargo dos amigos de Tarabelos. Unha actividade centrada no personaxe de Rosalía de Castro e no seu libro "Cantares gallegos", no que descubriremos a súa desconformidade diante das desigualdades de xénero, idioma, clases sociais, etc.

Da man de Esteban e Marcos Acuña, entoaremos os cantares de Rosalía e xogaremos con eles. Narrarán un dos seus contos e proporán aos/ás asistentes unha "rosaliada": un gran cadro entre todos no que se plasmará de xeito artístico unha mensaxe de igualdade, utilizando a arte como fixo Rosalía.

A actividade, que estará dirixida a crianzas a partires dos 5 anos, celebrarase na Sala Municipal de Exposicións (Casa da Cultura) a partir das 12:00 h. A asistencia será de balde ata conformar un grupo de 25 participantes, polo que será preciso inscribirse previamente para poder participar. O trámite poderá efectuarse na Casa de Cultura e na Biblioteca Pública Municipal de Brión. (Tfnos.: 981 50 99 08, mañás / 981 50 99 69, tardes)

Seguir lendo

Obradoito gratuíto de clown con Fran Rei e Pedro Brandariz

O Concello de Brión e o programa de dinamización lingüística da Xunta de Galicia “Falaredes” propóñenche a actividade gratuíta “Obradoiro de Clown”. Un taller impartido por Fran Rei e Pedro Brandariz de “Os sete magníficos mais un” que vai ter lugar os venres 10, 17 e 24 de outubro de 2014.

Consiste en sesións de tres horas e media máis a demostración final de fin de curso. Está dirixido a mozos/as maiores de 16 anos, cun máximo de 25 alumnos, que poderán tramitar a inscrición na Casa da Cultura de Brión totalmente de balde.

Seguir lendo

Os monicreques toman a biblioteca

Os integrantes de “Títeres sin cabeza”, grupo aragonés que actuou no XVII Festival de Títeres de Brión, participaron nun divertido “Obradoiro de títeres” que se desenvolveu na biblioteca municipal de Brión o xoves 3 de xaneiro, entre as 11 e as 13 horas.

Os destinatarios da actividade foron nenos e nenas de todas as idades, acompañados os máis cativos por un adulto. A pesar de que a actividade se anunciou con pouca antelación, foi un éxito de participación, pois contou coa asistencia de case 20 rapaces máis os seus pais.

O taller consistiu na elaboración de sinxelos pero vistosos monicreques empregando materiais para desbotar que todos temos ao noso alcance no fogar. Provistos de papel de xornal, fixo, garrafas, tapóns e bolsas de plástico só é necesario botar a imaxinación a voar para crear divertidos monicreques para pasar un divertido intre xogando ao teatro de monicreques; iso si, sempre coa supervisión dun adulto, principalmente os máis pequenos.

Ao rematar o obradoiro os participantes marcharon para a casa con cadanseu boneco feito por eles mesmos. Iso si, cun pouco de axuda dos monitores e seus pais. Agora só queda darlles vida como se dun teatro de marionetas se tratase. E para aprender a facelo, que mellor que asistir estes primeiros días do ano ao XVII Festival de Títeres de Brión que está a celebrarse no Centro Social Polivalente a partir das 17:30 h. Que o espectáculo e o xogo continúe.

Seguir lendo

Obradoiro de Títeres

O xoves 3 de xaneiro o grupo aragonés "Títeres sin cabeza", que participa no XVII Festival de Títeres de Brión, vai impartir na BPM de Brión un obradoiro de títeres onde poderás aprender a facer e manexar monicreques construídos empregando materiais reciclados. A actividade, que é de balde, comezará ás 11:00 h. e prolongarase durante dúas horas. Nela poderán participar nenos e nenas de calquera idade. Os menores de 5 anos deberán vir acompañados dun adulto. Non é necesario inscribirse, só achégate á biblioteca ás 11 de mañá.

Resumo da actividade:
Lugar de celebración: BPM de Brión
Data: xoves 3 de xaneiro
Horario: de 11 a 13 horas.
Destinatarios: nenos e nenas de calquera idade. Os menores de 5 anos acompañados dun adulto.
Actividade de balde

Seguir lendo