Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

Amosando publicacións coa etiqueta María Antonia Cao López. Amosar todas as publicacións
Amosando publicacións coa etiqueta María Antonia Cao López. Amosar todas as publicacións

luns, 2 de outubro de 2023

María Antonia Cao presentou en Brión a súa última novela, Vivencias en el puente

O venres 29 de setembro, María Antonia Cao López presentou en Brión o seu último libro, “Vivencias en el puente”, unha novela con elementos autobiográficos recentemente publicada pola editorial Letrame.

Aínda que na actualidade reside en Barcelona , María Antonia naceu e pasou os seus primeiros anos na parroquia de Os Ánxeles, lugar que visita con frecuencia e onde conserva familia e numerosas amizades. Por iso, as súas ligazón afectivas con Brión son estreitas, algo que a motivou para realizar a primeira presentación da súa segunda novela en Brión.

Despois de acadar recoñecemento con “Rosas y espinas”, María Antonia regresa ás librarías con “Vivencias en el puente”, un libro onde as experiencias vitais da autora son inspiradoras dunha obra que continúa a senda iniciada coa súa anterior publicación.

Enmarcado dentro dos Encontros Literarios que organizada regularmente a biblioteca municipal, o acto do venres celebrouse na Sala Municipal de Exposicións. Nel participaron a autora, que estivo acompañada na mesa polo seu marido, José Eduardo Limiñana, e a súa amiga, Vanesa Castro, que exerceu como presentadora. María Antonia tamén contou coa colaboración de Loli Lema Carballo e Isaura Iglesias Ares. O serán literario, enormemente concorrido, tamén contou coa presenza do alcalde de Brión, Pablo Lago Sanmartín, e da concelleira María Rosa Romero.

Ao remate, moitas das persoas asistentes achegáronse ata a escritora cun exemplar do seu libro na man, aproveitando a ocasión para saúdala, felicitala e solicitar unha dedicatoria. Un libro que xa forma parte do catálogo da biblioteca municipal e se atopa a disposición de todas as lectoras e todos os lectores por cortesía de María Antonia.

 




 

venres, 17 de decembro de 2021

Brión acolleu a presentación do libro “Rosas y espinas” de María Antonia Cao López

A brionesa de Os Ánxeles residente en Barcelona, María Antonia Cao, presentou o xoves 16 de decembro en Brión “Rosas y espinas”, a súa primeira novela publicada pola editorial Letrame. María estivo arroupada por familiares, amigos e unha numerosa veciñanza que acudiu ao evento para coñecer a obra coa que debuta como escritora.
O acto contou coa presenza do alcalde de Brión, Pablo Lago Sanmartín, e da concelleira María Rosa Romero. O rexedor foi o encargado de iniciar o serán literario e, no seu discurso de presentación, destacou as ligazóns que unen a María Antonia con Brión, transmitíndolle á escritora o apoio incondicional de todos os presentes e desexándolle unha longa traxectoria na súa nova faceta como escritora. 
Acompañada na mesa polo seu esposo, José Eduardo Limiñana, e a súa amiga, Vanesa Castro, a autora lembrou emocionada a forte ligazón emocional que a une con Brión, un vínculo inquebrantable a pesares da distancia que separa a Cidade Condal, onde reside na actualidade, da súa parroquia natal de Os Ánxeles, lugar onde transcorreron os seus primeiros anos de vida.
Ao remate do acto, moitas das persoas asistentes achegáronse ata a escritora cun exemplar do seu libro na man, aproveitando a ocasión para saúdala, felicitala e solicitar unha dedicatoria. Un libro que xa forma parte do catálogo da biblioteca municipal e se atopa a disposición de todas as lectoras e todos os lectores por cortesía de María Antonia.

martes, 30 de novembro de 2021

Presentación en Brión do libro de María Antonia Cao López

Marian, con mente prodixiosa, emprende unha viaxe cara a un lugar descoñecido coa ilusión de triunfar no amor e deseñar a súa vida. Eduardo perseguía o mesmo camiño e os mesmos soños de Marian. Estes lévanos ao mesmo encontro coas adversidades que lles impuxo a vida.
Este é o argumento de “Rosas y espinas”, a novela publicada por Letrame que María Antonia Cao López, unha brionesa de Os Ánxeles residente en Barcelona, presentará o vindeiro 16 de decembro na Sala Municipal de Exposicións (Casa da Cultura) ás 20:30 h. Será nun serán organizado pola biblioteca municipal e o Departamento de Cultura ao que está convidada todas a veciñanza.
As persoas que desexen asistir a este acto só deberan enviar unha mensaxe coa solicitude ao enderezo de correo electrónico: bibliotecadebrion@briondixital.org. No correo deberase incluír o nome e apelidos da persoa solicitante e un teléfono de contacto, precisando o número de butacas requiridas. A reserva farase por orde de inscrición ata completar o aforo da sala. 
No acto respectaranse as normas ditadas polas autoridades sanitarias para garantir a seguridade das persoas asistentes. Por iso, será obrigatorio o uso de máscara, o hixienizado de mans na entrada con xel hidroalcólico e permanecer sentados en cadansúa cadeira mantendo a distancia de seguridade entre persoas que non convivan.