Biblioteca pública municipal de Brión

Estamos na Carballeira de Sta Minia dende 1989.

Un amplo espazo dominado pola luz

Sala xeral. Estudo, lectura e acceso a Internet.

Para os máis pequenos, un espazo de seu.

Sala infantil, cálida e luminosa.

Unha biblioteca aberta ás novas tecnoloxías

Acceso á información a través dos novos soportes dixitais.

Ven, entra e coñécenos

A biblioteca de todos e cada un.

xoves, 29 de xaneiro de 2015

Paco Nogueiras presenta en Brión ''Brinca vai! de aquí a acolá''

O actor e músico Paco Nogueiras presenta no Centro Social Polivalente o espectáculo de animación para xente miúda “Brinca vai!, de aquí a acolá”. Unha actividade organizada pola Piscina Cuberta Municipal de Brión (Aquafit), coa colaboración do Concello de Brión, e especialmente dirixida aos máis pequenos da casa.
O serán consiste nun concerto obradoiro baseado no libro “Brinca vai!” publicado pola editorial Kalandraka. Unha proposta de animación con música, humor e moito enxeño e creatividade, onde os nenos realizarán unha viaxe ao longo dos meses do ano achegándose ás tradicións, a natureza, aos xogos e ás festas populares do país.
A data escollida é o día 7 de febreiro ás 18:00 h. 

A entrada é de balde, ata completar aforo. Non faltes!

xoves, 22 de xaneiro de 2015

Club de lectura: "A viaxe de Gagarin" de Agustín Fernández Paz

Despois dos “bichiños” e demais familia de Gerald Durrell, regresamos á neboenta e chuviosa Galiza deixando atrás a soleada e calorosa Corfú para ler unha historia máis próxima. Trátase dunha novela do recoñecido escritor Agustín Fernández Paz que Edicións Xerais publicou a pasada primavera e que xa vai pola segunda edición.
Nela Agustín narra as lembranzas de Miguel Mendiguren, un home na fronteira dos sesenta anos que recorda a proeza do cosmonauta ruso Iuri Gagarin. Daquela el tiña dez anos e gañara un concurso escolar de redacción cun traballo sobre esa primeira viaxe espacial. A raíz diso, os outros nenos pasan a chamarlle Gagarin, un sobrenome que o acompañará durante toda a súa infancia e adolescencia. Mentres se apaga a vida da nai, Miguel lembra os seus anos mozos, na Coruña da década dos sesenta. Os seus rexentan unha imprenta e unha libraría de barrio, aparentan ser unha familia coma as outras. Mais esconden perigosos segredos que Miguel irá desvelando a medida que se abre á complexidade da vida. Unha vida na España desa época, coa ditadura de Franco e a represión das liberdades máis básicas, coa ameaza permanente da Brigada Político Social, a policía secreta do Réxime.
“A viaxe de Gagarin” é a obra escollida para ler e comentar o vindeiro mércores 18 de febreiro a partir das 20:30h. Como de costume, na biblioteca municipal.

Fonte imaxe e argumento: Ed. Xerais de Galicia

xoves, 15 de xaneiro de 2015

O escritor Manuel Iglesias Turnes acompañounos na reunión do club de lectura

O club de lectura recibiu esta semana a un ilustre visitante. Trátase de Manuel Iglesias Turnes, autor da novela “As rapazas de Xan”, unha das lecturas con mellor acollida que realizamos o pasado ano no noso club. (ligazón coa entrada no blog)

Grazas ás xestións de María Tilve e Mariló, unha das integrantes do club, gozamos da presenza dun autor que con esta primeira incursión no xénero está a acadar gran recoñecemento por parte da crítica e os lectores.

“As rapazas de Xan” é unha historia coral que nos sitúa nos difíciles días da posguerra para falarnos de amor, traizón e relacións humanas nunha aldea galega en tempos de pobreza e emigración. Unha narración que cativa ao lector de comezo a fin a través personaxes e situacións dunha Galicia que xa só existe na memoria e que as páxinas desta novela perpetúan para o recordo. 

Manuel falounos do proceso creativo da obra, a súa primeira incursión no mundo da narrativa. Unha novela inspirada en lembranzas da súa nenez nunha parroquia da veciña comarca da Barcala. Lugares concretos e recoñecibles pero totalmente extrapolables ao conxunto da Galicia rural dos anos cincuenta do pasado século. 

O enriquecedor serán serviu para coñecer de preto ao autor, falar con el sobre diversos aspectos da obra e intercambiar de novo impresións sobre a lectura da novela. Un libro que dende a biblioteca recomendamos ler a todos os nosos usuarios. 

A Manuel queremos transmitirlle o noso máis sincero agradecemento por acompañarnos nun  inesquecible e agradable serán, malia a choiva e o mal tempo. Axiña esperamos contar con el novamente; de seguro, cando presente a súa segunda novela. Esperamos con ansia por ela.

mércores, 7 de xaneiro de 2015

Gañadores do concurso de tarxetas de Nadal 2014 (Editado)

Un Nadal máis, o Concello de Brión convocou o tradicional concurso de tarxetas de Nadal destinado aos escolares dos centros de ensino do municipio.

Despois dunha difícil selección, o xurado deu a coñecer o seu veredicto, escollendo as que considera mellores postais de Nadal deste ano.

A todos os concursantes, moitas grazas pola vosa participación e por agasallarnos estas festas cunhas tarxetas desbordantes de imaxinación e calidade artística.

 PREMIOS:

•Vale de 40 euros para as aulas da escola de educación infantil dos Ánxeles.
•Vale de 25 euros para as aulas da escola de educación infantil de Sabaxáns.
•Vale de 20 euros para a aula da escola de educación infantil de Luaña.
•Vale de 65 euros para as aulas de educación infantil de Pedrouzos.
•Vale de 25 euros para a escola infantil municipal.

PRIMARIA

1º PREMIO: VALE DE 30 EUROS CANXEABLE POR LIBROS, XOGOS OU MATERIAL ESCOLAR
2º PREMIO: VALE DE 25 EUROS
3º PREMIO: VALE DE 20 EUROS


1º CICLO DE PRIMARIA

1º PREMIO: MARA VILLAMARIN GARCÍA DE 2º C
2º PREMIO: CAROLINA E LUCAS MUÑOZ ROMERO * DE 1º C
3º PREMIO: CARMEN MIGUENS BOTANA DE 2º B

2º CICLO DE PRIMARIA

1º PREMIO: ANA CRUSAT DEZA DE 4º A
2º PREMIO: ALEJANDRO MATA SOUTO DE 4º C
3º PREMIO: CLAUDIA RODRÍGUEZ LORENZO DE 3º C

3º CICLO DE PRIMARIA

1º PREMIO: ALBERTO PRIETO TABOADA DE 6º B
2º PREMIO: BRAIS PÉREZ LÓPEZ DE 5º C
3º PREMIO: ALYSSA VIDAL CASAL DE 5ºB

Ademais, levaran un libro de agasallo do Concello os/as seguintes finalistas:

Valentina Rodríguez Ferreiro de Inf. 4B
Iván Becerra Rodríguez de Inf. 4A
Rosalía García Fernández de Inf. 5A
Paula Villamarín García de Inf. 5B
Candela Alonso Bello de Inf. 6A
Ainhoa Rincón Carrillo de Inf. 6B
Pablo Grille Basante de 1A
Julia Rama González de 1B
Adrian Diéguez Curros de 2A
Sofia Casal Gómez de 3A
Manuel Alonso Bello de 3B
Claudia Rodríguez González de 4B
Uxía Gómez Pérez de 5A
Mateo Fernández Fernández de 6A
Angela Pérez Vieito de 6C

Parabéns a todos os premiados!

Ligazón á galería de imaxes das postais premiadas

*NOTA: Corriximos un erro detectado no 2º Premio na categoría 1º Ciclo de Primaria